Batanes at Babuyan Island, Signal No. 2 pa rin dahil kay “Siony”

ni Thea Janica Teh | November 6, 2020

Nakataas pa rin sa Tropical Cyclone Wind Signal (TCWS) No. 2 ang Batanes at Babuyan Island habang patawid sa Misanga Island sa Itbayat, Batanes ang Severe Tropical Storm Siony ngayong Biyernes, ayon sa PAGASA.

Samantala, nakataas naman sa TCWS No. 1 ang northern portion ng mainland Cagayan kabilang ang Cagayan (Santa Ana, Gonzaga, Lal-Lo, Allacapan, Santa Teresita, Buguey, Camalaniugan, Aparri, Ballesteros, Abulug, Pamplona, Sanchez-Mira, Claveria, Santa Praxedes); northern portion ng Apayao (kabilang ang Santa Marcela, Luna, Calanasan), at northern portion ng Ilocos Norte (kabilang ang Adams, Pagudpud, Bangui, Dumalneg, Burgos, Vintar, Pasuquin, Bacarra).

Sa inilabas na update kaninang alas-8 ng umaga ng PAGASA, patuloy na gumagalaw ang Bagyong Siony papunta sa west-northwestward at tatawid sa southern coast ng Taiwan sa loob ng 12 oras.

Ito ay may sustained wind na 95 kph at bugso ng hangin na 115 kph. Mapapanatili ng Bagyong Siony ang kanyang lakas sa 95 kph at maaari pang tumaas sa 100 kph sa loob ng 24 oras. Inaasahan naman na makakalabas na ang bagyo sa Philippine Area of Responsibility (PAR) ngayong Biyernes nang gabi.

Cagayan, handa na sa baha dahil kay 'Siony'

ni Lolet Abania | November 5, 2020

Naghahanda na ang lalawigan ng Cagayan sa inaasahang pagtama ng Severe Tropical Storm Siony sa Northern Luzon sa Biyernes nang umaga, ayon kay Gov. Manuel Mamba.

Ayon kay Mamba, nagtalaga na ang lokal na pamahalaan ng Cagayan ng mga pulis at sundalo sa hilagang bahagi ng lalawigan para i-monitor ang sitwasyon at kalagayan ng mga residente.

May mga inilaan na ring evacuation centers para sa mga magsisilikas sa lugar. “At this point in time po, handa naman tayo. Sanay po tayo dito because this is happening to us every year po, sa totoo lang,” sabi ni Mamba sa Laging Handa briefing kanina.

“We prepare more not only doon sa bagyo, pero more on the flooding brought by the rains ng mga bagyong ito,” dagdag pa ni Mamba.

Sa inilabas na report ng PAGASA ngayong Huwebes, itinaas na sa Tropical Cyclone Wind Signal No. 1 ang hilagang bahagi ng Cagayan, kabilang dito ang Santa Ana, Gonzaga, Lal-Lo, Allacapan, Santa Teresita, Buguey, Camalaniugan, Aparri, Ballesteros, Abulug, Pamplona, Sanchez-Mira, Claveria at Santa Praxedes.

Gayundin, sa forecast ng weather bureau, ang Bagyong Siony ay may lakas na 120 kilometro kada oras na tatama bukas nang umaga malapit sa buong Batanes at Babuyan Islands. “We do not expect so much damage,” ani Mamba. “Of course, we prepared for the worst.”

Batanes at Babuyan Island, Signal No. 2 dahil kay 'Siony'

ni Thea Janica Teh | November 5, 2020

Itinaas na sa Tropical Cyclone Wind Signal (TCWS) No. 2 ang ilang lugar sa Northern Luzon dahil sa paglapit ng Bagyong Siony sa Luzon Strait.

Sa inilabas na Severe Weather Bulletin ng PAGASA kaninang alas-4 ng madaling araw, namataan ang bagyo sa 595 km east ng Basco, Batanes na may maximum sustained wind na 95 kph.

Ito ay may bugso ng hangin na 115 kph habang papunta ng west southwestward sa 10 kph. Kaya naman itinaas na sa TCWS No. 2 ang Batanes at eastern portion ng Babuyan Island (Balintang Island, Babuyan Island, Didicas Island at Camiguin Island), habang TCWS No. 1 naman sa natitirang bahagi ng Babuyan Island, northern portion ng mainland Cagayan (Santa Ana, Gonzaga, Lal-Lo, Allacapan, Santa Teresita, Buguey, Camalaniugan, Aparri, Ballesteros, Abulug, Pamplona, Sanchez-Mira, Claveria, Santa Praxedes), northern portion ng Apayao (Santa Marcela, Luna, Calanasan) at northern portion ng Ilocos Norte (Adams, Pagudpud, Bangui, Dumalneg, Burgos, Vintar, Pasuquin, Bacarra).

Inaasahan na ang mata ng bagyo ay dadaan o lalapit sa bayan ng Batanes o Babuyan Island sa Biyernes nang umaga na may lakas na 120 kph at lalabas din ng Philippine Area of Responsibility (PAR) sa Biyernes nang gabi.