Sinopharm, may aplikasyon na ng EUA sa FDA

ni Lolet Abania | March 2, 2021

Kinumpirma ng Food and Drug Administration (FDA) ngayong Martes na naghain na ang Chinese firm na Sinopharm ng kanilang aplikasyon para sa emergency use authorization (EUA) sa COVID-19 vaccine.

“There was an online application filed yesterday afternoon. Our officers are now checking the contents of the submission,” ani FDA Chief Eric Domingo.

Kahapon, inanunsiyo ni Presidential Spokesman Harry Roque na isinumite na ng Sinopharm ang kanilang application subalit ayon kay Domingo, hindi pa niya ito makumpirma.

Matatandaang sinabi ni FDA chief na kinakailangan ng ahensiya ng apat hanggang anim na linggo para ma-evaluate ang Sinopharm vaccine dahil sa kakulangan nito ng approval mula sa stringent regulatory authorities (SRAs) gaya ng US FDA o ng World Health Organization (WHO).

“Depende na lang kung in the meantime, kung in between ng application nila ay magkaroon sila ng ganu’n, ng US FDA (approval) o kaya sa UK o kaya itong mga Asian countries na alam nating stringent sila o sa WHO,” ani Domingo sa isang interview.

Binanggit naman kamakailan ni Roque na mas gusto ni Pangulong Rodrigo Duterte na maturukan ng Sinopharm vaccine.

Gayundin, sa naganap na ceremony ng pagdating ng 600,000 Sinovac doses noong Linggo, sinabi ni Pangulong Duterte na personal niyang hiniling ang supply ng isang COVID-19 vaccine subalit hindi niya binanggit ang pangalan nito.

Ayon pa sa 75-anyos na Pangulo, nais din ng kanyang doktor na isang Chinese vaccine brand ang ibigay sa kanya subalit hindi siya kuwalipikadong tumanggap ng Sinovac shot dahil sa maaari lamang itong gamitin ng mga malulusog na indibidwal na nasa edad 18 hanggang 59.

“Ako naghingi ako, personal. Wala silang stock. Nanghingi ako para sa pamilya ko pati sa akin. I do not know if we would have enough vaccines for everybody, but I think I can accommodate itong Cabinet members,” ani P-Duterte.

Sinopharm, wala pang EUA

ni Mary Gutierrez Almirañez | March 2, 2021

Walang makuhang impormasyon ang Food and Drug Administration hinggil sa umano’y nabakunahan ng Sinopharm ang Presidential Security Group (PSG) kontra COVID-19, batay sa panayam kay FDA Director General Eric Domingo kaninang umaga, Marso 2.

Aniya, "Well, right now, if I tell you frankly, it's a blank wall. We're not getting any information. The DOH is not getting information. Our people are still at it. I don't have any concrete information on that."

Nauna na ring itinanggi ni Department of Health Undersecretary Maria Rosario Vergeire ang isinumiteng aplikasyon para sa emergency use authorization (EUA) ng bakunang Sinopharm na taliwas sa naging pahayag ni Presidential Spokesperson Harry Roque kahapon.

Sa ngayon ay Pfizer, AstraZeneca at Sinovac pa lamang ang mga bakunang may emergency use authorization sa bansa.

Sinopharm vaccine nakitaan ng masamang epekto, clinical trials sa Peru, itinigil

ni Twincle Esquierdo | December 12, 2020

Pansamantalang itinigil ng bansang Peru ang kanilang clinical trials ng COVID-19 vaccine na gawa ng Chinese drug giant company na Sinopharm matapos makitaan ng negatibong epekto ang isa sa kanilang mga volunteers.

Nahirapan umanong igalaw ng volunteer ang kanyang mga braso, ayon sa National Institute of Health nitong Biyernes.

Ayon sa researcher na si German Malaga, nagkaroon ng neurological symptoms o tinatawag na Guillain-Barre syndrome ang kanilang volunteer.

Aniya, "Several days ago we signaled, as we are required, to the regulatory authorities that one of our participants presented neurological symptoms which could correspond to a condition called Guillain-Barre syndrome."

Ang Guillain-Barre syndrome, ay bihirang sakit at hindi nakahahawa ngunit nakaaapekto ito sa paggalaw ng mga braso at binti kaya nagdeklara ang Peru ng temporary health emergency sa limang regions noong Hunyo ng nakaraang taon kasunod ng maraming kaso.

Umabot na rin sa 60,000 ang naturukan ng Sinopharm vaccine mula sa mga bansang Argentina, Russia at Saudi Arabia.

Ayon pa sa Peru, kung magiging matagumpay ang bakunang ito, asahan na bibili ang Peruvian government ng halos 20 milyong doses.

Samantala, ang Peru ang isa sa may pinakamaraming bilang ng mga namatay mula sa Covid-19 na umabot na sa 36,499 nitong Biyernes.