100K doses ng Sinopharm galing UAE, dumating na

ni Lolet Abania | August 11, 2021

Isandaang libong doses ng Sinopharm COVID-19 vaccine na gawa ng China ang bagong dumating sa 'Pinas ngayong Miyerkules nang hapon mula sa United Arab Emirates.

Lumapag ang shipment ng mga COVID-19 vaccines sa Ninoy Aquino International Airport sa Pasay City pasado alas-2:00 ng hapon. Kabilang sa mga sumalubong sa pagdating ng Sinopharm vaccines sina National Task Force against COVID-19 (NTF) Assistant Secretary Wilben Mayor, UAE Embassy Acting Charge Affairs Khalid Alhajeri, at Bureau of International Health Cooperation Director IV Ma. Soledad Antonio.

Ayon kay Mayor, ang mga bagong dating na Sinopharm vaccines ay dadalhin sa mga lugar na may mataas na COVID-19 infections. “Kung saan may surge ng cases ng COVID-19, doon natin ide-deploy dahil 'yun ang nangangailangan ng bakuna,” ani Mayor sa mga reporters.

Batay sa World Health Organization, ang Sinopharm vaccine ay may efficacy rate kontra-COVID-19 ng 79% habang ang efficacy naman laban sa hospitalization ay nasa 79%. Sinabi naman ni vaccine czar Carlito Galvez, Jr. na nagpahayag ang UAE na magdo-donate ng 500,000 doses ng Sinopharm, kung saan natanggap ng vaccine ang emergency use authorization (EUA) sa bansa noong Hunyo.

Gayundin, ayon sa Food and Drug Administration (FDA), plano ng gobyerno na bumili ng mas maraming Sinopharm vaccines. Samantala, matatandaang ini-report ni Galvez sa mga nakaraang Talk to the People na 1 milyong Sinopharm doses na donasyon ng China ang nakatakdang dumating sa Pilipinas sa Agosto 21.

EUA ng Sinopharm COVID-19 vaccines, DOH ang mag-a-apply

ni Mary Gutierrez Almirañez | May 10, 2021

Nilinaw ng Department of Health na sila ang magsusumite ng application para sa emergency use authorization (EUA) ng Sinopharm COVID-19 vaccines at hindi ang Chinese manufacturer nito, batay sa naging panayam kay DOH Secretary Francisco Duque III ngayong umaga, Mayo 10.

Aniya, “Mag-a-apply tayo. Iyan ang proseso. Iyan ang kailangang sundin na proseso, batay sa komunikasyon sa ating FDA Director General Eric Domingo.”

Sabi pa niya, "Ngayong umaga, ang DOH, mag-a-apply ng emergency use authorization sa FDA para sa Sinopharm dahil meron na tayong emergency use listing na inilabas ng WHO nu’ng Sabado.”

Sa ngayon, ang mga bakunang may EUA pa lamang ay ang Pfizer, AstraZeneca, Sputnik V, Sinovac, Johnson & Johnson, Bharat Biotech at Moderna.

Matatandaan namang nagpabakuna kamakailan si Pangulong Rodrigo Duterte at ang Presidential Security Group (PSG) gamit ang Sinopharm ng China, kahit na hindi pa iyon nagagawaran ng EUA.

Emergency use ng Sinopharm, aprub sa WHO

ni Ronalyn Seminiano Reonico | May 8, 2021

Inaprubahan na ng World Health Organization (WHO) ang emergency use ng Sinopharm COVID-19 vaccine ng China noong Biyernes.

Ito ang kauna-unahang Chinese vaccine na binigyan ng WHO ng emergency use approval laban sa infectious disease.

Pahayag ni WHO Director-General Tedros Adhanom Ghebreyesus, "This expands the list of COVID-19 vaccines that COVAX can buy, and gives countries confidence to expedite their own regulatory approval, and to import and administer a vaccine."

Kabilang din sa mga COVID-19 vaccines na nakatanggap na ng emergency approval ng WHO ay ang Pfizer-BioNTech, AstraZeneca, Johnson & Johnson, at Moderna.

Noong April 26 nagkaroon ng pagpupulong ang technical advisory group ng WHO kung saan ni-review ang clinical data at manufacturing practices ng Sinopharm.

Saad pa ng WHO, "Its easy storage requirements make it highly suitable for low-resource settings.”

Ayon kay Tedros, inirekomenda naman ng Strategic Advisory Group of Experts (SAGE) ang pagbabakuna ng two doses ng Sinopharm sa mga edad 18 pataas.

Saad ng WHO, "On the basis of all available evidence, WHO recommends the vaccine for adults 18 years and older, in a two-dose schedule with a spacing of three to four weeks."

Tinatayang aabot naman sa 79% ang efficacy rate ng Sinopharm na dinevelop ng Beijing Biological Products Institute.

Samantala, pahayag din ng WHO, "Few older adults (over 60 years) were enrolled in clinical trials, so efficacy could not be estimated in this age group."

Noong Miyerkules naman, nagsagawa ng review ang mga eksperto ng WHO sa Sinovac Biotech na gawa rin ng China.

Pahayag ni WHO Technical Advisory Group Chair Arnaud Didierlaurent, "We have started to review the report from Sinovac. We actually requested additional information to the manufacturer... which we hope to receive very soon to make a decision."