1.26 M doses ng COVID-19 vaccines mula China, dumating na

ni Ronalyn Seminiano Reonico | August 21, 2021

Dumating na sa bansa ang 1.26 million doses ng COVID-19 vaccines mula sa China ngayong Sabado.

Lumapag sa Ninoy Aquino International Airport (NAIA) Terminal 2 ang Philippine Airlines Flight PR 361 na may lulang 1 million doses ng Sinovac COVID-19 vaccines at 260,800 doses ng Sinopharm kaninang umaga.

Samantala, noong Biyernes matatandaang pumalo sa 17,231 ang naitalang bagong kaso ng COVID-19 sa bansa at pahayag ni Sec. Wilben Mayor, head ng Sub-Task Group on Current Operations ng National Task Force (NTF) Against COVID-19, “Malaking tulong ito sa ating mga kababayan para sa pagsalba ng ating mga maysakit at lalung-lalo na ngayong mayroong Delta variant, tumataas ang kaso natin. Kahapon lalo tumaas, malaking tulong itong mga vaccines.”

'Pinas, bibili na rin ng Sinopharm vaccines

ni Lolet Abania | August 08, 2021

Pinag-iisipan ng pamahalaan na bumili ng mas maraming doses ng Sinopharm COVID-19 vaccine na gawa ng China para matugunan ang kakulangan ng bansa sa bakuna, ayon sa Food and Drug Administration.

Sa ngayon, sinabi ni FDA Director General Eric Domingo na inaasahan ng gobyerno ang donasyon ng mahigit sa 1 milyong doses mula sa Sinopharm vaccine, kung saan inaprubahan na ng pamahalaan ang isang emergency use authorization (EUA) noong Hunyo.

“Ang pagkakaalam ko po, may donasyon na 1 million na inaabangan. 'Pag tapos na ‘yun, mayroong ipo-procure pero siguro, sa mga susunod na buwan pa iyon,” sabi ni Domingo sa isang interview ngayong Linggo nang umaga hinggil sa pagkuha ng Sinopharm.

Una nang binanggit ni Domingo na ang Sinovac, na gawa rin ng China, ang pinakamaraming vaccine na ginagamit sa bansa sa ngayon, kasunod ang AstraZeneca at Pfizer, habang ang Sputnik V ay kaunti lamang dahil sa limitadong supply nito.

Matatandaan na ito ang itinurok kay Pangulong Rodrigo Duterte at nakumpleto niya ang dalawang doses ng Sinopharm vaccine at fully vaccinated na. Ito rin ang vaccine na naging kontrobersiyal dahil sa paggamit ng mga miyembro ng Presidential Security Group (PSG), bago pa binigyan ng EUA ng pamahalaan.

Samantala, sa datos na ipinrisinta ng National Task Force Against COVID-19, nakasaad na ang bilang ng fully vaccinated population sa bansa ay umabot na sa 10.28 milyon hanggang nitong Agosto 5, 2021.

P-Du30, fully vaccinated na laban sa COVID-19

ni Ronalyn Seminiano Reonico | July 13, 2021

Natanggap na ni Pangulong Rodrigo Duterte ang ikalawa at huling dose ng Sinopharm COVID-19 vaccine noong Lunes, ayon kay Senator Bong Go.

Ipinost ni Go sa kanyang Facebook page ang mga larawan ni P-Duterte habang binabakunahan ni Department of Health (DOH) Secretary Francisco Duque III.

Samantala, ang Sinopharm ay napagkalooban ng emergency use authorization (EUA) ng Food and Drug Administration (FDA) noong June 7.