Simbang Gabi, livestreaming muna

ni Lolet Abania | December 16, 2020

Ipinagdiwang ng mga Katoliko ngayong Miyerkules ang una sa siyam na sagradong debosyon ng Simbang Gabi bago ang Kapaskuhan sa kabila ng nararanasang COVID-19 pandemic.

Sinimulan ng Jesuit priest na si Fr. Francis Alvarez ang livestreamed mass na dinaluhan ng mahigit sa 4,000 viewers para sa natatanging reflection ng kanyang mensahe sa Simbahan ng Gesu, kasabay ng pagsasagawa rin ng maliliit na grupo sa iba pang mga simbahan.

Ipinaalala ni Fr. Alvarez sa mga dumadalo at pumupunta sa mga simbahan na limitado lamang dapat ang tao at patuloy na isagawa ang health protocols tulad ng pagsusuot ng face mask at face shield at panatilihin ang social distancing upang hindi na kumalat pa ang virus.

"In the prison of our homes during lockdown and quarantine, we can find ourselves doubting," ani Fr. Alvarez sa kanyang homily na ang gospel ay patungkol kay St. John the Baptist. Dagdag niya, “Permit yourself to doubt but do not stop at doubt."

Ipinunto rin ni Fr. Alvarez na marami sa mga Katoliko ang hindi na nakakatanggap ng mga sacraments, lalo na ng Holy Communion simula nang magkaroon ng mga lockdowns noong March subali't binibigyan ang mga ito ng pagkakataon na bigkasin ang "Act of Spiritual Communion."

"That is what is so hard about 2020, presence is limited," sabi ni Fr. Alvarez, kung saan marami rin aniya ang nangungulila sa kanilang mga kaibigan at pamilya na makasama sa Banal na Misa.

Gayunman, hinikayat ni Fr. Alvarez ang mga deboto na magbigay na lamang ng kani-kanyang testimonya sa kabutihan ng Diyos. "Tell stories that testify on presence, help them dispel their doubts," sabi ng pari.

Samantala, ang Jesuit congregation at iba pang mga simbahan sa bansa ay nagsasagawa ng livestreaming ng Simbang Gabi online sa lahat ng social media accounts.

Online Simbang Gabi, Sisimulan ng CCP

ni Twincle Esquierdo | December 12, 2020

Gaganapin ng Cultural Center of the Philippines ang kanilang Simbang Gabi ngayong 2020 gamit ang online platform dahil sa coronavirus disease (COVID-19) pandemic.

Makikipagtulungan ang CCP sa iba't ibang simbahan sa buong bansa para maabot ang mas maraming Katolikong Pinoy sa mundo.

Ayon sa CCP, nais lamang nilang masiguro ang kaligtasan ng mga Pinoy dahil meron pa ring banta ng Covid-19 sa bansa.

"While this year has been shrouded with concerns over safety and fears of contracting the COVID-19 virus, which have upended many traditions that draw large gatherings including dawn masses, nothing should shake the fundamental pillar of the Catholic faithful and hinder the Filipino traditions,” sabi ng CCP.

Samantala, ang Misa de Gallo o misa sa bisperas ng Pasko ay ipagdiriwang sa St. Gregory the Great Cathedral Parish sa Legazpi City, Albay.

Napakaimportante ng Simbang Gabi dahil isa itong tradisyon tuwing sasapit ang Pasko, ayon kay Cardinal Luis Antonio Tagle, prefect ng Congregation for the Evangelization of Peoples ng Vatican.

Curfew time sa Quezon City, pinaikli para sa Simbang Gabi

ni Twincle Esquierdo | December 6, 2020

Pinaikli ng Quezon City government ang oras ng curfew pagsapit ng Disyembre 16, 2020 na mula alas-12 ng hatinggabi hanggang alas-3 ng madaling-araw upang maisagawa ang tradisyonal na Simbang Gabi.

Gayunman, ipinaliwanag ng QC government na kailangan pa rin nilang sumunod sa quarantine protocol na ipinatutupad ng Inter-Agency Task Force (IATF) at ng Metro Manila Council (MMC). “Bahagi na ng pagdiriwang ng Kapaskuhan at ng ating kultura ang Simbang Gabi kaya kahit may pandemya, nais nating panatilihing buhay ang diwa nito,” sabi ni QC Mayor Joy Belmonte.

Binigyang-diin din ni Belmonte na ang mga dadalo sa Simbang Gabi ay hindi dapat lumagpas sa 30-porsiyentong kapasidad ng isang venue at ang pagsunod sa mga minimum protocol tulad ng physical distancing, pagsuot ng face mask at face shield.

“Hindi natin dapat kalimutan na mayroon pa ring pandemya at kailangan tayong mag-ingat upang maiwasan ang pagkalat ng virus,” dagdag pa nito. Ipinagbabawal din ang pag-caroling at hinimok ang mga pamilya na limitahan ang bilang ng mga magdiriwang ng Pasko at Bagong Taon.

Hindi rin pinapayagan na magtipon ang mahigit 10 katao. Bagama't pinapayagan naman ang edad 15 hanggang 65 na lumabas ng bahay, dapat ay may dalang company, school o government-issued ID.

Gayunman, pinapayagan nang lumabas ang 14-anyos pababa kung may kinakailangang bilhin o may importanteng lakad tulad ng medical o dental appointments kasama ang kanilang magulang o guardian.

Pinahihintulutan naman ang mga business meetings, government services, or humanitarian services. Ang mga outdoor o indoor venues para sa special events tulad ng mga restaurants, hotel ballrooms o function rooms at mall atriums ay maaari lamang gamitin kung may kinalaman sa trabaho o commercial purposes, ngunit mahigpit pa ring ipinatutupad ang social distancing.

Kinakailangan namang kumuha ng special permit from the Business Permits and Licensing Department (BPLD) ang mga gustong mag-trade show at bazaar. "Whenever feasible, gatherings should use open-air venues or naturally ventilated indoor venues," sabi pa ni Belmonte.

Gaganapin naman ang fireworks display sa Quezon Memorial Circle at Eastwood na mapapanood online para hindi na kailangang lumabas pa ng mga tao.