K-pop stars, balak ding dalhin sa 'Pinas… MAYOR CHAVIT, NAG-INVEST NG 100 MILYONG DOLYAR SA

NEGOSYO SA SOUTH KOREA.

ni Janiz Navida @Showbiz Special | September 05, 2021

Tiyak na ikatutuwa ng mga adik na adik sa K-Pop stars and K-dramas ang nasagap naming balita na posibleng kapag normal na ang sitwasyon, madala rito sa 'Pinas ng produksiyon ni Narvacan, Ilocos Sur Mayor Chavit Singson ang mga sikat at hinahangaang K-Pop idols ng mga Pinoy.

May bago kasing business-investment si Mayor Chavit sa South Korea, na hello… tumataginting na 100 million dollars lang naman (yes, 'wag n'yo nang ipa-convert sa pesos para 'di na sumakit ang ulo ko mag-compute! Char!)!

Kapipirma lang ni Mayor Chavit ng Memorandum of Understanding para sa 1.7 billion dollars resort development project sa South Korea kasama ang Gangwon Province government, East coast Free Economic Zone Authority, Korea Investment & Securities Co. at Hyundai Asset Management Co.

Kasali sa proyektong ito ang pagpapatayo ng resort centers at ocean complexes sa Donghae City, nasa 260 km silangang bahagi ang layo mula sa Seoul.

Plano rin ng LCS Group na pinamumunuan ni Mayor Singson ang bumili ng mga properties para sa mga sarili nitong businesses doon.

Ang LCS group ang pinakaunang Philippine company na nag-invest para sa real estate development project sa South Korea, samantalang dito sa 'Pinas, ang group of companies ni Mayor Chavit ay nakatutok sa mining, transportation, defense, logistics at telecommunication towers.

Kaya kung magiging successful ang kanyang bagong investment sa South Korea dahil sa kanyang partnership sa Korean government, eh, hindi nga malayong next niya nang project ang pagdadala rito ng mga Korean stars.

Samantala, we heard na tinututukan din ngayon ni Mayor Singson ang pagpapalagay ng solar panel para sa bagong parking lot ng public market sa bayan ng Narvacan, Ilocos Sur. Ang solar panel ang pagmumulan ng supply ng kuryente para sa charging stations ng electric jeepneys sa nasabing lugar.

So, ang bongga lang, 'di ba?

6 na taong nagsama, bigla raw nag-iba… LJ, NAKIPAGBALIKAN KAY PAOLO, INAYAWAN NA

ni Janiz Navida @Showbiz Special | September 02, 2021

Tinutukan namin ang pagpapainterbyu ni LJ Reyes kay Tito Boy Abunda na lumabas sa YouTube channel ng TV host kagabi, Miyerkules, at 6 PM.

Isang oras tumakbo ang interbyu at tiniyaga talaga naming tapusin dahil ang dami-daming nagtatanong sa amin kung ano talaga ang rason ng hiwalayan nila ni Paolo Contis.

Waiting galore ang mga chismosa inside and outside of showbiz kung totoo bang may third party sa hiwalayan nila. Tipong hindi sila na-convince sa ibinigay na rason ng manager ni Paolo na si Manay Lolit Solis na 'na-outgrow' lang ng celebrity couple ang kanilang relasyon kaya naghiwalay.

Sobrang emosyonal si LJ sa naturang interview, which is understandable dahil 6 years nga naman silang nagsama ni Paolo na parang mag-asawa kahit hindi sila kasal, tapos ay mauuwi lang pala sa hiwalayan ang kanilang matamis na samahan.

Habang iniinterbyu ni Tito Boy si LJ, nasa New York na pala ang aktres kasama ang dalawang anak na sina Aki at Summer. Sa bahay daw muna ng mommy at kapatid ni LJ sila tumutuloy ngayon.

Inamin ni LJ na ang 'difficult at painful' na hiwalayan nila ni Paolo ang rason ng pag-alis nila sa 'Pinas ilang araw bago nagtapos ang Agosto.

Gusto raw niyang protektahan ang mga anak mula sa kaliwa't kanang espekulasyon na naglalabasan ngayon kaugnay ng hiwalayan nila ni Paolo.

At kaya raw siya nagsalita at nagpainterbyu kay Tito Boy ay upang ituwid ang mga 'twisted stories' na naglalabasan ngayon sa social media na parang kasalanan pa niya kaya sila naghiwalay ni Paolo.

Ilang ulit tinanong ni Tito Boy kung totoo nga bang may third party sa hiwalayan, pero ilang ulit ding hindi sumagot nang diretso si LJ.

Pero kung pagbabasehan ang mga binitiwan nitong pahayag na, "It's been so hard for the past several months, the past two months have been revelation after revelation," at "May mga taong out of concern would message me about events or sightings, pero I would ask (Paolo), siyempre po, walang confirmation," of course, ang iisipin mo ay may mga nakarating na info kay LJ na nakita si Paolo na may ibang kasama sa iba't ibang pagkakataon o panahon.

'Pag tinatanong naman daw niya si Paolo tungkol sa mga nakakarating sa kanyang balita, ang palusot nito ay paano siya makikilala ng mga nakakakita sa kanya gayung naka-face mask at face shield siya?

Inamin din ni LJ na hindi mutual ang hiwalayan katulad ng sinabi ni Manay Lolit dahil matagal na raw niyang nararamdamang humihiwalay na sa kanila si Paolo at hindi na ito tulad ng dati na homebody. Napansin daw niyang lagi na itong wala sa bahay kaya bilang babae ay kinutuban na siya.

When asked kung mahal pa rin niya si Paolo, iyak nang iyak na sabi ni LJ, "Hindi ko po masagot 'yung tanong n'yo kasi all throughout this happening, grabe talaga 'yung kapit ko sa Diyos na tulungan ako kasi hindi lang naman sa akin 'yung pinagdadaanan ko, pati sa mga anak ko. It's been difficult Tito Boy, tinry kong i-balance, tinry kong saluhin lahat.

"Umabot ako sa puntong 'Lord, Kayo na po ang bahala, 'di ko na kaya. Sabihin N'yo po sa akin ano'ng kailangan kong gawin at ano'ng gagawin ko.'"

Sa tanong kung sinubukan ba niyang alamin kay Paolo ang totoo sa mga nakakarating sa kanyang balita, ani LJ, "Tito Boy, ayoko po siyang makausap. Parang natatakot po akong kausapin siya kasi parang pakiramdam ko, totoo 'yung sinasabi niya sa akin, pero Tito Boy, marami kasi akong nalaman na hindi totoo.

"Parang na-manipulate 'yung alam kong facts. 'Yung revelations and information na dumating sa akin nu'ng mga past 3 months, hindi po 'yun madaling i-digest."

At kaya matindi ang paniniwala ni LJ na may 'something' talaga kay Paolo ay, "'Yung ibang bagay, meron po akong proof. Siyempre, alam mo naman kung kailan nagsasabi nang totoo sa 'yo o hindi."

Dagdag pa niya, "I can't be wrong, siguradung-sigurado po ako na totoo 'yun. Ang dami ko na pong nakausap na nagpakita sa akin ng katotohanan kung paano siya kapag nakatalikod ako or… Kaya ang hirap po sa akin kasi ito 'yung nakita ko, and may ibang katauhan 'pag nakatalikod na ako."

When asked kung sinubukan ba niyang i-save pa ang relasyon nila, sagot naman ni LJ, "Yes Tito Boy, sa totoo lang, for the past several months, 'yun po ang ginagawa ko. Umabot na nga sa point na nag-break na po kami, after few days, na-realize ko, hindi puwedeng ganito dahil may mga bata. Nagbaba po ako ng pride kahit alam kong ako ang nasasaktan. Titiisin ko po 'yun para sa mga bata.

"Tinanong ko siya, 'Do you want to take us back?' pero hindi na raw," iyak pa nang iyak na rebelasyon ni LJ.

Sayang lang at hindi naitanong ni Tito Boy kung bakit sa kabila ng mga kuwento ni LJ, bakit parang si Paolo Contis pa ang galit sa aktres kaya una itong nag-unfollow sa Instagram?

Magsasalita rin kaya si Paolo ngayong nagsalita na si LJ?

Abangan!

Miss U, 'di naman daw pinilit para patulan ang aktor... HIRIT NI JANUS: GERALD AT PIA, PAREHO LANG

NG KASALANAN SA PANLOLOKO KAY BEA.

ni Janiz Navida @Showbiz Special | August 30, 2021

Parang nabunutan ng malaking tinik sa dibdib si Janus del Prado nang isa-isa niyang ilabas ang mga sama ng loob niya sa kaibigang (or ex-friend?) si Gerald Anderson, na itinago niya sa initial na "G", sa panayam sa kanya ni Ogie Diaz sa vlog nito sa YouTube.

Ayon kay Janus, three years niyang kinimkim ang mga nangyari at nanahimik sila sa 'ghosting' issue nina Gerald at Bea dahil 'ika nga niya, 'pinatay' ang isyung ito that time.

Kung sino ang pumatay, hindi naman siguro si Magellan. Char!

Sa naturang two-part interview kay Janus, inilarawan niya si Gerald bilang "narcissistic, untouchable at manipulative" base na rin daw sa mga ginawa nito hindi lang kay Bea kundi maging sa kanilang mga kaibigan ng aktres.

Bagama't nakatago nga sa initials ang mga taong involved sa isyung ito, inisa-isa naman ni Janus ang pinagmumulan ng 'gigil' niya kay Gerald.

Hanggang ngayon ay masama pa rin ang loob niya rito at sa tanong kung magkakaayos pa sila, aniya, "Manggagaling sa kanya 'yun (first move). 'Wag n'ya nang gawing public, 'wag na siyang magpainterbyu na naman. Sabi ko nga, kung sa simula't sapul pa lang, kung inako n'ya na lahat at nag-sorry s'ya, tapos na 'to by now."

Akuin lang daw ni Gerald ang naging pagkukulang nito kay Bea at sa kanilang magkakaibigan, mapapatawad naman nila ang aktor.

"Man up! Man up!" dagdag pang hamon ni Janus.

Feeling kasi ni Janus, walang sincerity 'yung paghingi ng tawad ni Gerald sa interbyu sa kanya ni Tito Boy Abunda dahil nga isinapubliko pa nito. At feeling din niya, ginagamit ni Gerald ang isyu sa kanila ni Bea para pag-usapan ang show niyang Init sa Magdamag.

"Puwede namang 'di mo sagutin... No comment... Bakit sinagot mo pa?" katwiran ni Janus.

Samantala, sa tanong ni Ogie kung may dapat ba siyang ihingi ng sorry kay Miss Universe Pia Wurtzbach na nadamay sa issue dahil sa inilabas niya sa Instagram post niya na initial nitong "P" at sa milagrong nangyari kina "G" at "P" sa set ng MYP (My Perfect You), sagot ni Janus, wala siyang dapat ipag-sorry.

"May kailangan ba akong ihingi ng sorry? Parang wala, eh.

"Pero sa tingin ng iba, meron pa raw akong idinamay na isa (Pia). 'Yun 'yung nangyari, eh. 'Yun 'yung totoo, eh, and I guess, parehas lang sila ng level ng kasalanan nu'n, 'di ba? Hindi naman s'ya pinilit. Aware naman s'ya na boyfriend 'yun ng kaibigan niya."

Para sa kaalaman ng mga bago pa lang "sumasawsaw" (read: nakiki-chismis) sa isyung ito, naging magkaibigan sina Bea at Pia dahil sabay silang nag-start sa Star Magic ng ABS-CBN.

"Kailangan ko pa bang ihingi ng sorry 'yun kung may nadamay na initials? Tingin ko, wala akong dapat ihingi ng sorry regarding that issue," with conviction pang sabi ni Janus.

Kumakagat din ang mga salitang binitiwan ni Janus laban kay Gerald kung bakit walang nagtatanggol sa aktor sa kabila ng mga banat niya rito sa social media.

Aniya kay "G", "Magtaka ka kung bakit 'di ka ipinagtatanggol ng mga kaibigan mo, G. Ang dami mong kaibigan, 'di ka ipinagtanggol ever since pumutok ang issue. Du'n ka magtaka."

Intriguing din 'yung ibinulgar ni Janus na tinanggihan pala si Gerald ng isang ex-girlfriend niya na makasama sa isang proyekto.

"Madaming may ayaw sa iyo. Biruin mo, 'yung isang ex mo, tinanggihan 'yung show dahil sa 'yo? Ibig sabihin, kailangan mo nang tingnan ang sarili mo," pasabog pa ni Janus.

Pero kung durog na durog si "G" sa mga rebelasyon ni Janus, never naman daw nagbitaw ng masamang salita ang BFF ni Bea Alonzo laban sa GF ngayon ni Gerald na si Julia Barretto.

At dapat ipagpasalamat ni Julia na dahil 'yan sa kanyang amang si Dennis Padilla na sabi nga ni Janus ay napakalaki ng respeto niya sa beteranong aktor-komedyante dahil sa magandang pinagsamahan nila.

Well, sa ngayon, pagkatapos mailabas ni Janus ang mga 'nalalaman' niya, mananahimik na raw siya. Pero may banta rin siyang kapag muling ginamit ni Gerald ang kanyang kaibigang si Bea Alonzo, eh, alam na this!