ni Janiz Navida @Showbiz Special | March 13, 2022
Tiyak na may bagong pagpipiyestahan ang mga Marites sa hiwalayang Carla Abellana at Tom Rodriguez matapos sabihin ng tatay ng aktres na si Rey PJ Abellana sa panayam sa kanya ni Ninang Cristy Fermin sa YouTube show nitong Cristy Ferminute na nakipag-one-night stand ang mister ng kanyang anak.
Kung matatandaan, nang unang pumutok ang balitang hiwalay na sina Carla at Tom tatlong buwan matapos silang ikasal, ang unang kumalat na bulung-bulungan ay na-caught in the act umano ni Carla ang mister na may ibang kalambutsingan.
Nadamay pa nga ang pangalan ng Kapuso actress na si Kelley Day na nakasama ni Tom sa nakaraang serye nila nina Alden Richards at Jasmine Curtis-Smith.
Sa panayam kay Rey PJ ni Ninang Cristy, inamin niyang kinausap na siya ni Tom sa problema nila ni Carla at nagpaliwanag ito. Ang anak pa nga raw niya ang ayaw pa ring makipag-usap sa kanya hanggang ngayon para sabihin kung ano ang totoong problema.
"Nanggigigil ako sa anak ko, eh, ayaw mag-open up," sabi ni Rey PJ na kilala namin sa pagiging totoong-totoo at hindi "showbiz" na tao.
Sa tanong nga ni Ninang Cristy tungkol sa third party na dahilan daw ng hiwalayan, sabi ni Rey PJ, "Hindi po natin mako-consider na third party ang sitwasyon. Kasi po ang pangyayari, eh, one-night stand, eh. So, hindi po natin kino-consider 'yun na third party."
Awww! Kaya ang tanong ngayon ng mga Marites, sino ang naka-one-night stand ni Tom?! Hala!
Pero dagdag pa ni Rey PJ, naiintindihan niya si Tom dahil nangyayari raw talaga 'yun sa buhay ng mga lalaki tulad din niya nu'ng kabataan niya.
"Naiintindihan ko po 'yan. Ang nangyari sa tukso ay hindi po mortal sin, para sa akin. Bilang isang totoong tao, natural sa buhay 'yan."
Hindi rin naman daw maituturing na krimen ang ginawa ni Tom para ikulong.
Samantala, tinanong din ni Ninang Cristy si Rey PJ sa duda ng ilang netizens na bading daw si Tom at baka ito raw ang natuklasan ni Carla kung kelan kasal na sila.
Sagot ng aktor, hindi siya naniniwala na bading ang kanyang manugang lalo't 7 yrs. munang naging mag-BF-GF ito at si Carla. Imposible naman daw na sa haba ng panahong 'yun ay hindi nalaman ni Carla kung totoong bakla si Tom.
As we write this, hindi pa namin alam kung ano ang reaksiyon ni Carla sa mga sinabi ng kanyang ama, pero for sure, nawindang din ito sa mga rebelasyon ni Rey PJ Abellana.
