ni Janiz Navida @Showbiz Special | Feb. 5, 2025
Photo: BINI signing / ABS-CBN
“Fake news!” ang sigaw ng leader ng BINI na si Jhoanna Robles kaugnay ng isyung bubuwagin na ang pinakasikat ngayong girl group sa ‘Pinas.
Kahapon nga ay ginanap na ang signing ng renewal of contract ng BINI sa Dolphy Theater ng ABS-CBN kung saan present ang mga ABS-CBN executives sa pangunguna ni Chairman Mark L. Lopez, ABS-CBN President and CEO Carlo L. Katigbak, COO of Broadcast Cory V. Vidanes, and ABS-CBN Head of TV Production and Star Magic Head Laurenti Dyogi.
Ang supposed to be super-sayang renewal of contract ay napuno ng iyakan ng mga members ng nation’s girl group at pati nga mga Blooms (BINI’s fans na present sa event) at press people ay nagpahiran din ng luha dahil sa napaka-emosyonal na mensahe ni Ma’m Cory para sa BINI.
Hindi talaga naiwasang mag-iyakan ng mga BINI members lalo na nang isa-isa nilang balikan ang mga hirap na kanilang pinagdaanan, ang tiwalang ibinigay sa kanila ng
Kapamilya Network mula sa pagiging “nobody” nila, at maging ang suporta ng kanilang mga fans na kahit pa ang dami raw nilang mga bashers ay hindi bumitaw sa kanila at patuloy silang sinusuportahan sa bawat project na kanilang ginagawa.
Pare-pareho talagang napaluha sina BINI Jhoanna, Sheena, Mikha, Stacey, Aiah, Colet at Maloi. Tanging si Gwen lang ang hindi napaiyak sa kanilang pasasalamat na nag-renew uli sila ng contract sa Kapamilya Network.
Hindi raw kasi nila ma-imagine ‘yung mula sa naging buhay nila noon na nag-o-audition pa lang sila sa Dolphy Theater ng ABS-CBN nu’ng year 2019, ngayon ay nagre-renew na sila ng panibagong contract.
Tiniyak naman ni Ma’m Cory na anuman ang mangyari, hinding-hindi nila pababayaan ang BINI dahil mahal na mahal nila ang mga bata na grabe ang hirap na pinagdaanan maabot lang ang kanilang mga pangarap na makilala at mai-represent ang Pilipinas sa ibang bansa.
Yes, going international na nga ang BINI at in-announce mismo ni Ma’m Cory na matutuloy ang world tour ng nation’s girl group dahil may mga bansa nang naka-line-up na pagpe-perform-an ng walong members nito.
Pero bago ang world tour, next week ay ilo-launch muna ang bagong single ng BINI titled Blink Twice.
At sa February 15, tuloy na tuloy ang Biniverse World Tour Phils. concert ng BINI sa Phil. Arena kung saan ngayon pa lang ay super excited na ang mga Blooms sa mga bagong mapapanood sa BINI.
Nakaka-touch nga ‘yung mga mensahe ng Blooms na ipinalabas sa screen kahapon kaya siguro nakadagdag ‘yun para maging emosyonal ang BINI, na sinabayan pa ng mellow music kaya iyak-tawa talaga sina Jhoanna, Sheena, Mikha, Stacey, Gwen, Maloi, Colet at Aiah.
SPEAKING of iyakan, naging emosyonal din ang favorite naming Aegis Band sa ginanap na Day 2 ng kanilang pre-Valentine concert sa New Frontier Theater last Sunday, Feb. 2 titled Halik sa Ulan: A Valentine Special.
As we all know, first major concert ito ng Aegis matapos pumanaw ang isa sa kanilang vocalists na si Mercy Sunot.
Nu’ng mediacon pa nga lang para sa kanilang concert, emosyonal na ang magkapatid na Juliet at Ken Sunot dahil hindi pa rin talaga sila totally nakakapag-move on sa biglaang pagkawala ni Mercy.
Ang ikinagulat ng lahat, nagawan ng paraan ng production na maisama pa rin si Mercy Sunot sa song number nina Juliet at Ken para mabuo ang magkakapatid for one last time sa kabila ng pumanaw na ang una.
Ang galing ng pagkakagawa na pinalabas na buhay si Mercy sa pamamagitan ng pagpapakita ng dating video nito nu’ng buhay pa na kumakanta na sinabayan sa stage ng magkapatid na Juliet at Ken.
Hindi tuloy maiwasan ng mga tao na maging emosyonal at mapaiyak din, lalo na ang mga true blooded Aegis fans.
Successful ang two-night concert ng Aegis kung saan nu’ng first night, ang mga naging special guests ay sina Moira at Martin Nievera, at nu’ng second night, sina Ogie Alcasid, Jonalyn Viray at Julie Anne San Jose naman ang nakasama ng sikat na sikat pa ring banda sa kabila ng mga bago at mas batang nagsusulputan ngayon.
Kudos to Aegis Band and to Direk Frank Lloyd Mamaril para sa tatatak na namang Halik sa Ulan: A Valentine Special concert.
