Kaya tumakbong senador…"PARA 'DI NA AKO DEDMAHIN NG MGA GOVT. OFFICIALS" — RAFFY

ni Vinia Vivar - @Frankly Speaking | October 05, 2021

Dahil nagbigay ng pahayag si Raffy Tulfo some months ago na hindi siya interesadong pumasok sa pulitika, naba-bash tuloy siya ngayon dahil nga sa pagbabago niya ng plano.

As we all know ay tuloy na tuloy na ang pagtakbo ni Raffy bilang senador at nag-file na nga siya ng kanyang Certificate of Candidacy (COC) last Saturday.

Binalikan tuloy siya ng mga netizens at ipinaalala ang dati niyang pahayag na hindi siya tatakbo dahil kaya naman daw niyang tumulong kahit wala siyang posisyon sa gobyerno.

Sa latest vlog ni Ogie Diaz and Mama Loi, nakausap daw niya si Raffy at nagpaliwanag kung bakit nga nagbago ang kanyang isip.

“Ang sabi niya, 'Siguro, kung magiging senador ako, mas malalapitan ko ang mga government officials, mas malalapitan ko ‘yung mga gabinete at ‘yung mga inirereklamo ng taumbayan sa gobyerno. Kasi senador na ako at hindi nila ako puwedeng dedmahin,’” pagbabahagi ni Ogie sa usapan nila ni Raffy.

Dagdag pang paliwanag ni Ogie, madalas daw kasing mangyari na 'pag government official ang inirereklamo kay Raffy ng isang tao, hindi raw ito sinasagot ng public servant na involved.

“Ngayon daw, kung mananalo siyang senador, haharapin na siya kasi senador na siya. At the same time, mapapalawak pa ang kanyang mga tinutulungan,” sey pa ni Ogie.

Anyway, kahit naman maraming bashers si Raffy ay nananatili siyang nangunguna sa Pulse Asia poll ng senatorial race.

Suriin lang daw mabuti…"HINDI LAHAT NG ARTISTA, TRAPO" — AIKO

ni Rohn Romulo - @Run Wild | October 05, 2021

May panawagan si Aiko Melendez sa kanyang IG post para sa mga boboto sa 2022 national election at sa mga nanlalait-nangmamaliit sa mga artistang tatakbo na gusto lang ng pagbabago at maglingkod.

Sabi ng premyadong aktres, “Ngayon ang tamang panahon para ang mga boboto ay titingin sa plataporma ng bawat kakandidato. Suriing mabuti. 'Wag pera-pera ang tingnan. 'Yung walang bahid ng corruption dapat.”

Sa pagpapatuloy niya, “Du'n sa mga taong maliit malimit ang tingin sa mga tatakbong artista po, 'wag n'yo lahatin, pumili ng kakampi na maaasahan n'yo dahil malay n'yo, 'yung kumakandidato na 'yun ang manindigan sa mga taong nawalan ng trabaho sa entertainment industry.

“Isipin nating mabuti kung ilang libo ang nawalan ng trabaho sa mga kasamahan natin sa ating mundo na ginagalawan. Mahalaga sa bawat tao ang marunong manindigan. 'Yung kaya kayong tayuan, may kapalit man o wala. In public service, wala dapat safe side, paninindigan ang mahalaga.

“Kapag wala tayong tao na mapagkakatiwalaan na maging boses natin sa entertainment industry, paano naman din 'yun? Matatalino na ang mga tao ngayon.

“Ngayon tayo magsama-sama na kilalanin ang mga karapat-dapat na maging boses ng industriya natin. Mapa-national, local or anumang posisyon… Hindi naman lahat ng artista na tatakbo, ibig sabihin, bored lang, walang magawa dahil pandemya, matuto rin tayong tumingin kung anong klaseng artista ang ating pipiliin. Hindi lahat ng artista, trapo. Marami nga d'yan, 'di artista, pero ano ba napala natin?”

Marami naman ang nag-agree sa opinion ni Aiko. Ilan dito ang mga celebrity friends niyang nagpapakita ng suporta sa kanyang muling pagsubok sa pulitika.

Serye nila ni Xian, stop taping muna… JENNYLYN, HIHINTAYIN NG GMA-7

ni Erlinda Rapadas - @Teka Nga! | October 05, 2021

Kahit na may mga namba-bash kay Jennylyn Mercado dahil pansamantalang matitigil ang teyping ng serye niyang Love. Die. Repeat. katambal si Xian Lim dahil sa kanyang kalagayan ngayon, walang balak ang pamunuan ng GMA Network na siya ay palitan ng ibang artista.

Okey na rin na ma-shelved muna ang serye hanggang sa kaya na ni Jennylyn na magtrabaho.

May pasabi ang ilang insiders ng GMA-7 na willing na maghintay ang Kapuso Network sa availability ng Ultimate Star.

Ganu'n mag-alaga at magbigay ng importansiya ang GMA sa kanilang contract artist. Inuunawa nila ang kalagayan at inaalalayan nila ang kanilang mga artista, tulad din ng pag-aalaga nila noon kay Marian Rivera nang ito ay magpakasal kay Dingdong Dantes hanggang sa magkaroon na ito ng mga anak.

Hindi basta binabalewala ng GMA-7 ang mga artista nilang naging loyal sa network sa loob ng maraming taon. At isa nga ru'n si Jennylyn Mercado na produkto ng StarStruck 1.

'Yung tungkol sa ginagawang isyu ng ilang bashers na maraming production staff at crew ng Love. Die. Repeat ang nawalan ng trabaho dahil kay Jennylyn, sana ay maunawaan nila ang sitwasyon ng aktres. Hindi naman niya sinadya o ginusto na matigil ang teyping ng kanyang serye. May mga pangyayari lang na sadyang hindi inaasahan.