Tito Sen: Headwriter ng EB!, tinatakot ng mga abogado ng TAPE

ni Reggee Bonoan @Sheet Matters | June 5, 2023

Habang wala pang TV network na pupuntahan ang mga original hosts ng Eat… Bulaga! na sina Tito Sotto, Vic Sotto at Joey de Leon ay sa Facebook muna sila magla-live.

Ito ang sabi ni Tito Sen sa panayam sa kanya sa radio station na DWIZ at hindi raw ito mahaharang ng TAPE, Inc. dahil, “Ang may-ari ng Facebook Live ng Eat… Bulaga! is ‘yung mga head writers namin, tao namin. Hindi nakapangalan sa TAPE ‘yun.”

Inamin din ni Tito Sen na may mga nangyayari na ring pananakot sa mga head writers nila.

“Ang alam ko nga, parang tinatakot ng abogado, sinulatan yata kahapon ‘yung isa sa mga head writers, hinihingi ‘yung mga passwords. Again, pati abogado nila ay hindi alam ‘yung istorya.

“Ang ruling ng internet, kung sino ang nakapagrehistro ng e-mail, siya ang may-ari,” katwiran ng eldest sa Sotto siblings.

Target daw talaga ng TVJ na ipagdiwang nila ang 50th anniversary ng EB! sa taong 2029.

“Itutuloy namin ang Eat… Bulaga! in whatever form. Lalo na at nakikita pa namin ‘yung suporta, ‘yung pagtangkilik ng mga kababayan natin,” diin ni Tito Sen.

Nabanggit ni Tito Sen sa panayam sa kanya nina Julius Babao at Tintin Bersola-Babao sa One PH na may alok sa kanila ang TV5, RPN 9 at NET 25 at ang latest ay ang CNN Philippines.

“Nag-text sa akin si Pinky Webb na kung interesado raw kami sa CNN Philippines. Ibibigay daw sa amin ‘yung 12 (tanghali) to 3 (hapon),” pagtatapat ng dating senador.

Sa madaling salita, apat na ang kabuuang bilang ng mga TV networks na nag-aalok sa TVJ at sa iba pang mga Dabarkads na nagbitiw na rin sa TAPE, Inc..

Pero, may pahiwatig na si Joey kung saang network sila lilipat base sa kanyang ipinost sa Instagram na larawan nilang tatlo nina Tito Sen at Bossing Vic na may suot na t-shirt na ang nakalagay ay TVJ.

Ang inilagay pa niyang caption: “Sabi ko noon, we are not signing off, we are just taking a day-off. In other words, pahinga muna. In English, TAKE FIVE!”

So, sa TV5 na nga ba sila mapapanood?

Nagnakaw daw, pinalayas, nagdemanda... RUFFA, TALO SA KASO SA 2 KASAMBAHAY, PINAGBABAYAD

ni Reggee Bonoan @Sheet Matters | April 2, 2023

Pinagbabayad ng korte ang aktres na si Ruffa Gutierrez ng halagang P13,299.92 at unpaid wages pro-rated 13th month pay sa dalawang kasambahay niya dati sa loob ng sampung araw pagkatanggap nito ng Notice of Finality of Decision mula sa Department of Labor and Employment.

Matatandaang pinaalis daw ni Ruffa ang dalawa niyang kasambahay na dalawang linggo pa lang naninilbihan sa bahay niya sa Alabang noong Hulyo, 2022.

Ang dahilan ay inaway daw ng dalawang kasambahay ang mayordoma niyang matagal nang nagsisilbi sa kanya sa loob ng 18 years.

At dahil dito ay nagsampa ng reklamo sa National Labor Relations Commission (NLRC) ang mga nabanggit na kasambahay ng aktres.

Sa madaling salita ay natalo si Ruffa sa asuntong isinampa ng dalawang kasambahay.

Ang nasabing desisyon ay lumabas na ilang buwan ang nakararaan, base ito sa binasa ng content creator at talent manager na si Ogie Diaz sa Showbiz Update YouTube channel nila ni Mama Loi kasama sina Ate Mrena at Tita Jegs na in-upload nu'ng Biyernes nang gabi.

"Nanalo 'yung dalawang kasambahay na pinaalis ni Ruffa Gutierrez sa kanyang Alabang house at nandoon 'yung dalawa sa gate ng Ayala Alabang Village.

"Noong September, 2022 ay sinubukang pag-ayusin sina Ruffa at ang dalawang kasambahay. Pero, parehong ayaw ng mga ito na mag-compromise kaya’t itinuloy ang kaso," sabi ni Ogie.

Walang apelang natanggap ang korte mula sa kampo ni Ruffa kaya’t dinesisyunan na bayaran niya ang dalawang kasambahay.

Sa pagpapatuloy ni Ogie, "Kilala ko naman si Ruffa, in fairness, mabait naman ang batang 'yan. Ilang beses na kaming nagkakausap niyan at nakikita kong mabait si Ruffa. Pero siyempre, hindi naman ako 'yung naging kasambahay, 'ika nga.

"Sila 'yung merong experience o kuwento about Ruffa at ngayon nga ay nabigyan na ng pansin ng DOLE and I’m sure si Ruffa ay tutugon sa desisyon na ito. Maliit na bagay at maliit na halaga lang naman ito, para hindi tuparin ni Ruffa ang kanyang obligasyon doon sa dalawang kasambahay.

"Sana, matapos na ito. At the end of the day, siguro, gusto lang patunayan ng dalawang kasambahay na hindi totoo ‘yung mga ibinibintang sa kanila noong sila’y napalayas sa bahay nina Ruffa at 'ika nga’y nakakahinga na sila nang maluwag sa iisipin ng tao na sila’y may kasalanan o nagnakaw sa bahay ni Ruffa.

"Siguro, lesson na rin ito sa lahat, maging sa akin na ang pagtrato sa mga kasambahay ay para ring kapamilya. At siyempre, sa mga kasambahay, kapag itinuring kayong kapamilya, patunayan ninyo na kahit hindi kayo magkadugo, eh, alam ninyong maaasahan kayo ng inyong mga employer sa lahat ng bagay, lalo na ang tiwala, huwag ninyong sasayangin,"

mahabang litanya ni Ogie.

"Sana rin ay magkaayos na ang dalawang panig at magkapatawaran na rin lalo na ngayong malapit na ang Mahal na Araw," ang hirit naman ni Mama Loi.

Bukas ang BULGAR para sa panig ni Ruffa Gutierrez.

Takot na takot iwan ng mister… YENG, UMAMING NAPRANING, NAGPA-DOKTOR

ni Reggee Bonoan @Sheet Matters | March 3, 2023

Sa panahon ng pandemya noong 2020 ay isa ang vlog ni Yeng Constantino sa mga pinapanood namin sa YouTube channel dahil nga bawal lumabas kaya nasa loob lang siya ng bahay nila ng asawang si Victor Asuncion.

Ibini-video nila ang kanilang daily routine, ang pagluluto at pagtatanim ng gulay sa likod-bahay nila na maliit lang ang lupa dahil sa townhouse sila nakatira.

Ipinakita rin doon ang sinisimulan nilang dream tiny house sa farm na nabili nilang mag-asawa at naroon din nakatirik ang bahay naman ng ama.

Habang isinusulat namin ang balitang ito ay binalikan ulit namin ang vlog ni Yeng na matagal naming hindi nasilip at hayun, tapos na pala ang tiny house nila na nasa gitna ng maraming puno ng saging, anahaw at iba pa na ang preskong tingnan dahil ang buong palibot ng bahay ay balkonahe.

Kaya namin ito naikuwento ay dahil ginawang busy talaga ni Yeng ang sarili para mapangalagaan din ang kanyang mental health na ilang taong walang trabaho ang entertainment industry dahil sa COVID 19 pandemic.

Hindi naman itinago ng songwriter/singer na napraning siya lalo na sa pagsasama nilang mag-asawa at mabuti na lang ay nakaalalay sa kanya si Yan (palayaw ni Victor).

Aniya, “Kasi, dumating 'yung time na ang daming naghihiwalay. Tapos, aware ako roon sa tinatawag na seven-year itch. Talagang nasa isip ko 'yun, na kailangang malampasan namin. Pressure na ginawa ko sa sarili ko.

"Kaya noong naka-8th-year anniversary na kami, talagang panay na panay ang pasasalamat ko sa asawa ko. At salamat kay Lord for that, dahil nagabayan din kami.

“Sa umpisa, siyempre, nagdi-discover pa lang kayo sa mga bagay about each other. Ang mga away o tampuhan, hindi naman nawawala. And we have learned na kapag mataas na 'yung init ng ulo o galit ng isa, dapat na talagang manahimik na muna o magpakumbaba 'yung isa.

"Yeah, umabot din kami sa point na nagpapa-therapy kami. At wala naman kaming nakitang masama roon, kasi it helped. Na kung kailangang may makausap o isangguni ito, it doesn't mean na may masama na sa mga nangyayari. Guidance iyon.”

Among the Cornerstone artists na dalaga pa noong pumasok sa talent management company ay si Yeng ang unang nag-asawa kumpara kina KZ Tandingan at Moira dela Torre.

Sina Yeng at KZ na lang ang masasabing happily married dahil si Moira ay alam namang nahiwalay na kaagad sa asawang si Jason Marvin Hernandez pagkalipas ng tatlong taon.

Going back to Yeng, it pays to be loyal talaga dahil taong 2013 nang maimbitahan siya kasama ang ilang Cornerstone artists na mag-perform sa opening ng Academy of Rock sa Singapore at dahil magaling naman talaga pagdating sa performance ang Pinoy Dream Academy Season 1 grand winner ay napabilib niya ang pamunuan ng AOR (Academy of Rock) at kinuha siyang brand ambassadress for a year.

Pagkalipas ng sampung taon, heto at muli siyang kinuha bilang Global Ambassadress ng AOR.