Sikat na bago lumabas sa serye ni Coco… YUKII, MAY 8.6 M SUBSCRIBERS AT 42.7 M VIEWS SA TIKTOK

ni Reggee Bonoan @Sheet Matters | June 10, 2023

Pangarap pala ng content creator na si Yukii Takahashi na maging artista kaya sinubukan niyang gumawa ng mga dance videos sa TikTok noong kasagsagan ng COVID pandemic.

At hindi naman siya nabigo dahil dito na nga siya napansin at nadiskubre ng Cornerstone Entertainment.

Sa kasalukuyan, may 8.6 M subscribers na nga si Yukii sa kanyang TikTok account at dahil palagi ring viral ang mga videos niya, umabot na sa 42.7 M views ang mga ito.

Simpleng buhay ang kinalakihan ni Yukii bilang pangatlo sa apat na magkakapatid na tumutulong din sa gastusin ng kanilang pamilya.

Filipina ang ina ng dalaga at Japanese naman ang ama nito. Pero nang mag-edad 15 siya ay naghiwalay ang kanyang mga magulang at hanggang sa nawalan na siya ng contact at communication sa kanyang ama.

“Sinubukan ko naman pong hanapin, pero wala po akong way para malaman. Hoping po ako na someday ay magkita kami,” sambit ng dalaga nang makatsikahan namin kamakailan sa Cliff Restobar, Timog Avenue, Quezon City.

Mahusay sumayaw si Yukii at naging bentahe niya ito sa Tiktok habang ang pag-arte ay everyday naman niyang natututunan sa kanyang mga katrabahong artista.

Unang programa ni Yukii ay ang SNL o Sunday Noontime Live at noong taong 2022 lang siya nagsimula sa pag-arte.

Malaking advantage para sa kanya ang pagkakaroon ng milyones na followers sa TikTok,

“I feel like yes, merong benefit from it. May advantage talaga but what was lacking is siyempre, the hard work and the passion to get into that level.

“That's why I appreciate 'yung mga kapanahunan noon kasi they really have the passion and the fire to act and to do what the director says. That's why I'm learning that now. I'm trying to embrace it.”

Pero bago pa man umarte-arte si Yukii sa harap ng kamera ay naka-ilang acting workshops muna siya, pati na rin sa pagsasayaw para mas gumaling pa.

At sa tanong naman sa kanya kung marunong din ba siyang kumanta, ang naaalala

naming sagot niya rito, “Uh, opo,” na sa pakiwari namin ay inaaral pa lang niya ito.

“One of my dreams also is to be versatile. I wanna sing, I wanna dance, I wanna act, I even wanna be a model. I've been training to sing and dance during my break days,” kuwento ng baguhang aktres.

Samantala, malaki ang pagbabago sa buhay ni Yukii nang mapasama siya sa seryeng FPJ’s Batang Quiapo, kung saan ginagampanan niya ang karakter ni Camille na love interest ni McCoy de Leon.

Special guest lang siya sa BQ sa loob ng dalawang linggo at marami na kaagad ang nakakilala sa kanya. Sa lahat nga ng lugar na puntahan niya ay tinatawag siyang Camille, kaya naman natutuwa si Yukii.

At dahil nakitaan sila ni McCoy ng magandang chemistry ay naging regular na rin siya sa BQ, bukod pa sa magandang rekomendasyon ng dating Presidente at Chief Content Officer ng ABS-CBN na si Ms. Charo Santos-Concio na ngayon ay nagsisilbing consultant ng network at the same time ay binalikan nito ang kanyang first love, ang pag-arte sa harap ng kamera.

Magkasama sa Batang Quiapo sina Yukii at Ms. Charo, pero hindi pa sila nagkakaeksena dahil sa 2nd unit daw palaging kinukunan ang mga eksena nila ni McCoy bilang magkaklase.

Nakarating sa amin na pinuri ni Ms. Charo si Yukii at sinabi nitong malayo pa ang

mararating niya sa pangangalaga ng Cornerstone.

Sa pakiwari namin ay ang pagiging simple at talented ang nakita ni Ms. Charo sa dalaga, kung kaya’t nasabi nitong alagaan si Yukii ng kanyang management.

At mabenta nga si Yukii dahil hindi lang siya napapanood sa Batang Quiapo, kundi pati na rin sa Puregold YouTube channel nito para sa kanilang online series na Ang Lalaki sa Likod ng Profile kasama si Wilbert Ross.

Regular din siyang napapanood sa sitcom na Ano’ng Meron kay Abok? sa NET 25 with Empoy Marquez na Cornerstone artist din.

Join din si Yukii sa mga pelikula tulad ng I Love Lizzy, Ang Pangarap Kong Oskars at sa HBO limited series na Call My Manager mula sa direksiyon ni Erik Matti.

Sa mga hosting jobs ay napasama siya sa TV5 videoke game show na Sing Galing, reality talent competition ng KUMU na Top Class: Rise to P-Pop Stardom, at NET25 game show na Tara Game, Agad Agad! kasama si Aga Muhlach.

Nag-iipon nang husto si Yukii dahil pangarap niyang makapagpatayo ng isang derma clinic bilang ito ay patok na negosyo ngayon. Alam din ng baguhang aktres na hindi forever ang showbiz.

Umatras magpainterbyu… CRISTY KAY DIEGO: IKAW ANG BUKOD-TANGING LOYZAGA NA BASTOS!

ni Reggee Bonoan @Sheet Matters | June 8, 2023

Oras ng pananghalian sa Australia nang umere ang Cristy Ferminute radio show nina ‘Nay Cristy Fermin at Romel Chika kahapon, Huwebes, at kung sakaling napanood ito ng aktor na si Diego Loyzaga sa One PH YouTube channel ay malamang hindi siya nakakain o baka umiyak pa.

Mabait si Nanay Cristy pero kapag nagalit, matindi.

Ayon sa mahabang litanya ng TV-radio host, “Diego, wala ka pa sa posisyon na pupuwede mong gawin ang ganyan. Ang pamilya mo ay mahal ko, ang nanay (Teresa) mo ay mahal ko.

Kahit sinuman sa pamilya Loyzaga, wala akong kinakitaan ng kabastusan.

“Ikaw ang bukod-tanging Loyzaga na bastos at ‘yan ay kaya kong panindigan kahit saan tayo makarating. Dalawang beses mo nang ginawa ‘yan, hindi na ‘yan mauulit, Diego Loyzaga!”

Nasabi ito ni ‘Nay Cristy dahil sa ginawang pag-atras o hindi pagsipot ng aktor sa live interview niya sa CFM nitong Miyerkules nang tanghali para sana sa promo ng pelikulang Will You Be My Ex na ipapalabas na sa Hunyo 21 under Viva Films.

Pero dahil sa teaser na, “Rebelasyon at pinagpipistahan, Diego Loyzaga, proud tatay na?” ay nawala na ang aktor at hindi na raw makapasok sa StreamYard.

“Alam mo (Diego), ‘wag naman kami! Not us! ‘Wag n’yo kaming pinaglololoko. Kayo pa bang mga kabataan ang hindi magkakaroon ng magandang internet (o) ng mga gadgets? Kung kami nga na mga ordinaryo lamang, pinaghahandaan namin ito.

“Kayo pa kaya na ‘yan na ang mundo n’yo, ‘di ba? Heto ‘yun, Diego, lumanding na ang kuwentong ‘yan sa mga pahayagan,” sabi pa ni ‘Nay Cristy dahil hindi siya naniniwalang nawalan ng internet ang aktor.

Kasunod nito, ibinuking na ni ‘Nay Cristy ang kanyang nalalaman, “Noong nakaraang Marso (2023) ay nagpunta ka sa konsolado ng Perth, Australia. May kasama kang babae na nagdadalantao, inaayos n’yo ang inyong mga dokumento. Noong Marso ‘yan, Hunyo na tayo ngayon.

“‘Yung babae, nanganak na, ‘di ba? Ano ba naman ‘yung itinuloy mo pa rin ang panayam namin sa ‘yo? Puwede mo namang sagutin na, ‘Puwede po ba, Tita, na ‘yung personal ko, ‘wag na nating salatin?’

“Napakabait namin sa ‘yo at hindi kami hihingi sa ‘yo ng detalye. At kung sasagutin mo ng ‘oo o hindi,’ maraming salamat. Ganu’n lang ‘yun, bakit ka natakot, bakit ka naduwag? Bakit umurong ang dapat umurong sa ‘yo?” kuwento ni Nanay Cristy.

Ang ikinagalit nang husto ng CFM host ay nang-iwan sa ere si Diego na mabuti na lang at may mga materyales ang programa.

Hindi lang daw kasi unang beses itong ginawa ng aktor kundi pangalawa na.

“Noong una, nang inaway-away ka ni Barbie Imperial tungkol sa sinabi kong nag-away kayo sa Golden Hills sa lumang bahay ng mga Loyzaga. Tumakbo sa ulanan itong si Barbie, tumakbo ka, hinabol mo siya at ibinalik mo siya sa bahay.

“Tinanong mo ako, ‘Sino po ba ang source n'yo?’ Ang sabi ko, sa hanay naming mga manunulat, hindi kami nagsasabi kung sino ang aming source. Basta detalyado kong mailalahad sa iyo kung paano kayo nag-away ni Barbie Imperial. Tapos ang sabi mo, ‘Ang mommy ko po ba ang source n’yo?'

“Of course, not! Bakit ka ipapahiya ng iyong ina mismo? Hindi magkukuwento tungkol sa ‘yo ang Mommy Theresa Loyzaga mo dahil kasiraan mo ‘yan.

“Una, pinagbigyan ka namin, pangalawa, ito na naman. Nabahag na naman ang buntot mo, bigla mo kaming iniwan na nakatiwangwang, nakat*nga. Mabuti na lang may nakahanda kaming mga materyales!

“Sa ikatlo, tapos ka na, Diego Loyzaga dahil hindi na kami makakapayag sa ikatlong pagkakataon na gagawin mo na naman kaming tanga!”

Dagdag pa ni ‘Nay Cristy, "Nakikiusap kayo ng promo, pero narinig mo lang ‘yung promo na pinagpipistahan na kung ikaw ba ay proud nang tatay, question mark pa? Sana, exclamation point na lang ang ginamit namin, tutal naman, ‘yun ang totoo, pero bigla kang nawala.

“Ano, ikakatwiran mo na hindi ka makapasok? ‘Wag mo kaming linlangin, ‘Wag mo kaming lokohin. Ang aga-aga mo, nasa news pa si Cheryl Cosim, nasa StreamYard ka na, bigla kang nawala? At Diego, wala ka pa sa estado na pupuwede mo kaming lansihin, wala ka pang gaanong napapatunayan.”

Samantala, pagkalipas nang dalawang oras na umere ang CFM ay nag-post na si Diego ng larawan nila ng anak na nakahilig sa kanya at ang caption niya ay, “The best birthday gift ever (emoji heart)."

Nagpadala kami ng mensahe kay Diego sa kanyang Instagram account para hingan ito ng reaksiyon kung bakit hindi siya natuloy sa panayam kina Nanay Cristy at Romel Chika nu'ng Miyerkules, pero wala kaming natanggap na sagot mula sa aktor hanggang sa matapos naming isulat ang balitang ito.

Umatras sa interbyu ni Cristy… DIEGO, NATAKOT MAGSALITA NA MAY ANAK NA

ni Reggee Bonoan @Sheet Matters | June 8, 2023

Umatras ang aktor na si Diego Loyzaga sa live interview niya kina Nanay Cristy Fermin at Romel Chika sa programang Cristy Ferminute kahapon nang tanghali sa 92.3 Radyo 5 TRUE FM.

Nagtataka ang mahigit 3,000 live viewers ng CFM nu'ng mga oras na iyon kung bakit walang Diego Loyzaga na umere gayung kasama siya sa teaser ng programa.

Ayon sa voice-over ni ‘Nay Cristy, “Rebelasyon at pinagpipiyestahan, Diego Loyzaga, proud tatay na?”

Kaya maraming nag-abang dito, lalo’t naging banner story ito ng isang tabloid pero hindi naman mahanap ang istorya sa pahina.

Base sa pahayag ni ‘Nay Cristy sa pag-ere ng CFM, “Bago po ang lahat, mga kapatid, meron po muna tayong napakaespesyal na panauhin, ‘yung title ng pelikula nila ni Julia Barreto, Will You Be My Ex, mga kapatid, i-welcome po natin, Diego Loyzaga! Magandang tanghali sa ‘yo, Diego?”

“Ay, parang nawala raw yata si Diego sa ere,” sabi kaagad ni Romel Chika.

Sundot ng beteranang manunulat at online host, “Ay, nawawala? Okay, maaaring may problema sa internet. Hindi bale, marami pa tayong pagkukuwentuhan pa, i-cue n’yo lang kami ‘pag nandiyan na."

Pero natapos na ang CFM, walang Diego Loyzaga na umere.

May nakausap kaming taga-Viva na ang dahilan pala ng guesting ng aktor sa programa nina ‘Nay Cristy at Romel Chika ay para i-promote ang pelikula nila ni Julia Barretto na Will You Be My Ex na mapapanood na sa mga sinehan sa Hunyo 21 mula sa direksiyon ni Real Florido. Kasama rin si Bea Binene sa cast.

Nabanggit pa sa amin na baka raw hindi pa handang magsalita o magkuwento si Diego tungkol sa sinasabing anak niya at nagulat sa teaser ng CFM.

Puwede naman niyang ipakiusap na hindi muna siya magkukuwento tungkol sa anak kina Nanay Cristy at Romel Chika, hindi ‘yung basta na lang siya nawala sa ere o umatras siya.

Anyway, abangan na lang ngayong tanghali, baka tuloy na ang guesting ni Diego sa CFM.