Ibinuking ng co-host na si Robi… GELA, CAUSE OF DELAY SA TAPING SA KAIIYAK

ni Reggee Bonoan @Sheet Matters | Jan. 18, 2025

Photo: Robi Domingo at Gela Atayde - Instagram

Bata pa lang si Gela Atayde ay kilala na namin at mahilig siyang makinig sa tsikahan namin ng Mama Sylvia Sanchez niya, gayundin ng kanyang Kuya Arjo at Ate Ria tungkol sa showbiz.

Dahil lumaking puro showbiz ang napag-uusapan sa hapag-kainan bukod pa sa napapanood ni Gela ang mga programa ng nanay niya, pinangarap din niyang umarte sa harap ng kamera tulad din ng kuya at ate niya.

Pero dahil mahigpit ang school kung saan siya nag-aaral ay hindi muna siya pinayagan ng mga magulang na pasukin ang showbiz, tulad din ng ginawa ng Ate Ria niya na nagtapos muna ng college.

Pero hindi ito naging hadlang sa bunsong anak na babae nina Sylvia at Papa Art Atayde dahil sumali siya sa dance group ng eskuwelahan nila kung saan nakikipag-compete sa ibang bansa at laging nananalo.

Kaya ang pangarap na umarte sa harap ng kamera ay napunta na sa pagsasayaw, na sobrang ine-enjoy ng dalaga. At ngayon, heto na siya, nasa harap ng camera pero bilang isa sa mga hosts ng programang Time to Dance (TTD) kasama si Robi Domingo at ang mga hurado na sina Ken San Jose at legit Misfitz coach na si Vimi Rivera.

Sa launching ng Time to Dance nu’ng Huwebes ay ibinuking ni Robi na sa tuwing may nae-eliminate sa dance competition ay walang ginawa si Gela kundi umiyak nang umiyak kaya kinailangan nilang huminto muna sa taping para hintaying maging okay na ang dalaga.

Natatawang kuwento ni Robi, “Every time nagkakaroon ng eliminations or may something, iiyak na naman si Gela. So, okay, hintay na naman tayo. Gela, ano ba’ng nangyayari? Tapusin natin ang programang ito, ha? It’s how she shows her heart.”

Passion project daw kasi ni Gela na magkaroon ng reality dance show para sa aspiring dancers pero kulang sa pinansiyal kaya natanong ang dalaga kung ano ang goal ng programang TTD na mapapanood na ngayong gabi, Sabado, sa Kapamilya Channel at A2Z handog ng Nathan Studios at ABS-CBN Studios.

“We also want to involve the Philippine Dance community, so we really do have guest from someone leading groups from the Philippines like U Peeps, of course Legit (Misfitz), Filipino All Stars and some Kapamilya stars who are credible (judge) like AC (Bonifacio), Darren (Espanto),” sey ni Gela.

Dagdag pa nito, “This is also an advocacy project for me because nakita ko ‘yung mga kulang at sobra. Here, in Time to Dance, I want to do this because I want to be able to help those who want to explore dance more and be inspired like I have teammates kasi who were not really financially stable enough.”

Ang gustong tukuyin ni Gela ay ‘yung mga kasamahan niyang magagaling din pero kapos sa panggastos kapag may competition sila sa ibang bansa at sa Time to Dance ay may mga ganito ring senaryo kaya gusto niyang tumulong sa mga ito, lalo’t nabigyan siya ng pagkakataong makatulong.

At dahil sa passion na ito ni Gela ay nabuo ang concept na ito na inaprubahan ni Direk Laurenti Dyogi bilang ABS-CBN’s Head ng TV Production at pinuno rin ng Star Magic at ng ina ng dalaga na si Sylvia Sanchez bilang producer ng Nathan Studios.

---

HINDI na tuloy ang Manila International Film Festival sa Los Angeles, California, USA sa Enero 30 hanggang Pebrero 2 dahil sa wildfires doon, ayon sa post ng US-based talent-PR manager at vlogger na si Oliver Carnay.

Naka-schedule sanang ipalabas doon ang 10 official entries ng MMFF 2024 na nagtapos nito lamang January 14 matapos ma-extend ang ilang kalahok na pelikula sa mga sinehan sa iba’t ibang bahagi ng Metro Manila.

Base sa post ni Oliver, “Just in: #FLASHNEWS, Manila International Film Festival postpones its second edition due to wildfires.

“Due to the devastating wildfires in Southern California, the Manila International Film Fest postponed its second edition, scheduled from January 30 to February 2, to a later date this year that will be announced.

“MIFF was going to show entries plus special screening films at the TCL Chinese Theatre in Hollywood and hold a closing night awards gala at the International Ballroom of The Beverly Hilton in Beverly Hills.”

Ang official statement naman ni Omen Ortiz, MIFF chairman and co-founder, “Because of the catastrophic wildfires that are heavily affecting Southern California, we at the Manila International Film Festival (MIFF) are postponing our second 2025 edition, originally scheduled from January 30 to February 2, to a later date to be announced.

“We are devastated by the tremendous impact of the wildfires on many people, including the Filipino community.

“At this time, as we pray for the people experiencing trauma and loss, we ask all to continue supporting the fire relief efforts.

“We look forward to announcing the new dates of this year’s MIFF where we plan to honor the frontline workers and volunteers, including the Filipino first responders, who are heroically battling the wildfires.”

‘Di raw makalimutan ang naranasan… SITTI, PINATAYAN NG MIC, PINAURONG PA SA STAGE NG CO-SINGER SA ASAP

ni Reggee Bonoan @Sheet Matters | Jan. 16, 2025

Photo: Sitti Navarro - Instagram

‘Kaaliw ang ginanap na mediacon ng Sessionistas na binubuo nina Ice Seguerra, Juris Fernandez, Princess Velasco, Sitti, Kean Cipriano, Duncan Ramos at Nyoy Volante dahil nag-reminisce sila ng mga unforgettable experiences nila noong nasa ASAP pa sila.

Sa mga hindi pa nakakaalam ay ang programang ASAP ang bumuo sa grupong Sessionistas na nagsimula noong 2009 at nawala sila sa show nu’ng 2015, pero sobrang nagpapasalamat ang mga nabanggit sa show dahil nabuo sila.

Walang sama ng loob ang mga nabanggit kung bakit sila nawala at kung anuman ang naging dahilan ng programa o ng network at naiintindihan nila ito.

Pero outside ASAP ay magkakaibigan sila, as in super close, at itinuring na mga kapamilya nila ang isa’t isa, lalo na kapag may mga pinagdaraanang problema, mapa-pamilya, personal o anupaman.

Perfect example na parehong brokenhearted noon sina Ice at Sitti sa kanilang respective relationship at dahil parehong masama ang loob ay umaming nag-inuman at nalasing sila sa Burgos Circle sa BGC, Taguig.

Si Duncan naman ay umaming laging late sa call time dahil puyat at may gig kinagabihan (Sabado) at wala pa siya sa mood kapag rehearsals pero alam niyang hindi excuse iyon kung may ganap.

May nasambit din si Kean na uso sa showbiz ang plastikan pero hindi na siya nag-elaborate kung ano ang experience niyang iyon, natawa na lang siya.

Pero si Sitti ay nagkuwento ng hindi niya makakalimutang senaryo habang nagba-blocking sila sa ASAP.

“May na-experience ako, pinatayan ako ng mic. Siyempre, blocking bago mag-perform,” simula niya.

Hirit ni Kean, “Plastikan ‘yan!”

Patuloy ni Sitti, “Nu’ng sumalang na kami, inurong na niya (kapwa singer), inurong na niya ako ru’n sa gilid (mula sa gitna), so may mga ganu’n.”

Kinukulit ang bossa singer kung sino ito, pero hindi niya binanggit at tapos na raw iyon, naalala lang niya.

Nagtatawanan ang ibang miyembro kung nasa ASAP pa ba ito at ano ang hit song, pero tumawa lang si Sitti.

Ang saya-saya ng naging takbo ng mediacon ng Love, Sessionistas: A Pre-Valentine concert na gaganapin sa February 8, The Theater at Solaire, 7 PM presented by Fire and Ice Entertainment at produced ng Fire and Ice LIVE, in partnership with Profero Aesthetics.

Samantala, si Ice raw ang nakaisip na magkaroon ng reunion concert ang Sessionistas.

Nag-okay naman daw ang lahat at nagbigay ng kanilang mga schedules at natapat na bago mag-Valentine ang show nila.

“Kaya nga ang sarap din na magkakasama kaming pito. Kasi we’re celebrating our friendship as well, that has stood the test of time.

“Ang tagal na rin naman talaga. So, ang sarap lang na alam mo ‘yun, we’re singing about lovers, we’re singing about friendship, we’re singing about all these amazing things.

“And alam mo ‘yun, nothing feels better than singing it with your friends na nasa tono.

“We have so many nice surprises for you, guys. Kakarating lang ng mga study, ng mga arrangement. And it’s so nice,” sey ni Nyoy Volante.

McCoy, Irma at 2 pa, tsinugi para may bagong pumasok… ANDREA, JOIN NA RIN SA SERYE NI COCO

ni Reggee Bonoan @Sheet Matters | Jan. 15, 2025

Photo: Ang Batang Quiapo, Coco Martin, Mccoy De Leon at Andrea Brillantes - IG

Bilang na ang mga araw ni McCoy De Leon bilang si David sa FPJ’s Batang Quiapo (BQ) dahil malapit na rin siyang matsugi.

Yes, mamamaalam na ang karakter ni McCoy at halata naman sa itinatakbo ng istorya ng BQ. Inuna lang mawala si Irma Adlawan as Olga na pinatay mismo ni Cherry Pie Picache sa papel na Marites dahil papatayin ang anak niyang si Tanggol (Coco Martin).

Iniisa-isa nang patayin ang mga kalaban ni Coco, at sa pagkakaalam namin ay mawawala na rin si King Gutierrez (Colonel Suarez) at isusunod na rin si Julio Diaz (as General Pacheco).

Kaya nagbabawas si Coco bilang direktor/producer ay dahil maraming papasok na bagong karakter sa pangunguna ni Andrea Brillantes.

Yes, matagal nang bulung-bulungan na makakasama na si Andrea sa BQ na dapat nu’ng isang taon pa pero ‘di natutuloy dahil sa hectic schedule ng aktres at marami rin kasing nangyari sa serye.

Ang tanong, isa rin kayang batang Quiapo ang role ni Andrea? At sino ang makaka-partner niya? 

Sitsit ng taga-Kapamilya, “As of now, wala pang partner, pero ‘pag kinagat si Andrea sa Batang Quiapo, saka s’ya bibigyan ng partner.”

Anyway, sa mga haka-haka na magtatapos na ang BQ ay hindi pa raw, pero hindi naman ito magiging kasingtagal ng FPJ’s Ang Probinsyano (AP) dahil kailangan na rin daw ni Coco Martin bigyan ng panahon ang kanyang buhay-pag-ibig.

---

Pagkalipas ng sampung taon ay muling mapapanood ang Sessionistas sa kanilang reunion concert na Love, Sessionistas: A Pre-Valentine na gaganapin sa The Theater at Solaire sa Pebrero 8.

Ang grupo ay binubuo nina Ice Seguerra, Juris Fernandez, Sitti, Princess Velasco, Kean Cipriano, Duncan Ramos at Nyoy Volante at masaya nilang inanunsiyo sa kanilang mediacon nitong Lunes na soldout na ang February 8 show nila kaya’t ang second night nila ay sa April 4, same venue.

Maraming naka-miss sa Sessionistas na nagsimula sa ASAP, kaya naman abut-abot ang pasalamat ng grupo sa Sunday show ng ABS-CBN dahil du’n nga sila nabuo.

Nabanggit din ni Ice na 2019 pa ay nagpaalam na siya sa mga executives ng ASAP na gagawa sila ng show at approved naman ito, kaso inabot ng COVID-19 pandemic.

Sa pagkakatanda namin ay isa ang segment ng ASAP Sessionistas sa mga inaabangan ng manonood sa nasabing programa kaya naman ilang taon din silang nagtagal sa show.

Sa ginanap na mediacon ay inamin ng grupo na sobrang na-miss nilang magsama-sama ulit, kaya’t looking forward silang lahat sa Pebrero 8 at Abril 4.

Sabi ni Nyoy, “We always inspire each other. There's this weird, like, entity that we become kapag magkakasama kami. You have to see it. When we perform, we become something else.”

Taong 2009 nabuo ang Sessionistas at ayon kay Juris, “Early 2009 na nagsimula ‘yung Sessionistas. What I like about being part of the group is that on and off stage, we are having fun. We support each other, ‘yun ‘yung gusto ko.”

Sa concert ay mapapanood ang segment na Dear Sessionistas na ang bida ay ang mga fans na magse-share ng kanilang love stories o tungkol sa nangyari sa buhay nila at kung ano’ng kanta ang request nila na kakantahin ng grupo.

Mapapakinggan din ang mga unreleased songs nina Ice, Juris, Sitti, Princess, Kean, Duncan at Nyoy sa segment na Sessionistas Now.

Mayroon ding Sessionistas at Home segment kung saan may loyal fans ang grupo na mula simula ay naroon na sila sa buhay ng bawat isa at nasaksihan nila ang lahat ng personal na kaganapan.

At sa The Heart of the SESSIONISTAS, malalaman kung anong klaseng samahan mayroon ang grupo sa personal, career, mga masasayang araw at hindi.

Sey ni Princess, “Alam namin kung kailangan mo ng advice or comfort, or maramdaman lang na ‘andiyan kami para sa ‘yo. These are friendships that I formed na lifelong na.”

“‘Yung wit saka ‘yung humor sa relationship namin is sobrang present. We really come from different genres—so different personalities, different characters as one,” sabi naman ni Duncan.

“Para kaming iba’t ibang mutants na pinagsama-sama. Very humbling ‘yung experience sa Sessionistas kasi alam ko ‘pag sumasalang ako kasama ko sila, ‘di s’ya tungkol sa ‘kin, eh. It’s about the music, it's about the message,” ani Kean.

Ang Love, Sessionistas ay presented by Fire and Ice Entertainment at produced ng Fire and Ice LIVE, in partnership with Profero Aesthetics.