Ibinuking ng voice coach… MAYMAY, INABOT NG 7 ORAS SA PAG-RECORD NG AMAKABOGERA

ni Reggee Bonoan @Sheet Matters | Nov. 21, 2024

Photo: Maymay Entrata - Instagram

“Be Our Guest,” ito ang imbitasyon at titulo ng show ng RMA Studio Academy sa kanilang annual concert ng celebrity vocal coach/producer/CEO na si Jade Riccio sa December 1 sa Podium Hall.

Matunog ang pangalan ni Ms. Riccio dahil siya lang naman ang naging voice coach ni Maymay Entrata sa awitin nitong Amakabogera na nakatanggap ng Novelty Song of the Year at Viral Tiktok Video of the Year.

Kuwento ni Jade ay inabot sila ng pitong oras ni Maymay para sa recording ng Amakabogera sa ABS-CBN na tanda niya ay muntik nang sumuko ang singer-actress dahil hindi niya ma-perfect ang recording ng awitin.

Pero kuwento ni Jade, nu’ng una ay hindi raw confident si Maymay na nakakakanta siya at talented siya, pero pinursige ito ng una at sinabihan ang PBB Lucky 7 Grand Winner na "Hardwork is always a talent," at ito ang natanim sa utak ng aktres.

Inabot daw ng tatlong linggo bago natapos ang recording ng Amakabogera, “And the rest is history and now she’s one of my investors here in RMA Studio Academy.”

Pawang kilala ang mga estudyante ni Jade tulad ni Atasha Muhlach na kamakailan ay guest ni Arthur Nery sa concert nito sa Araneta Coliseum, kung saan nag-duet sila ng Ako’y Sa 'Yo Ika’y Akin (ASIA) at nag-viral ang video ng dalawa na umabot sa milyong views.

Ang unang celebrity student daw ni Jade ay ang anak ni Ina Raymundo na si Erika Raymundo na nagsimula noong pandemic season kaya home service siya.

Tsinek namin ang video na kumakanta si Erika, biritera ang datingan at maganda ang version niya ng American Boy na originally sung by Estelle.

At that time raw ay brokenhearted si Erika (ex-GF ni Kobe Paras) at sinabi ni Jade na gumawa sila ng kanta at nakabuo naman sila na ang titulo ay Stand Up at kinanta nila

ito sa ASAP.

“That was the first time Maymay saw me and when Erika said that I am her (voice) coach, nakita ko, sabi niya, 'Ha, coach? Mag-uusap tayo mamaya. Madam, magte-text ako, Ma’am, bigay mo sa ‘kin (ang number mo).'

“Du’n nag-start ‘yung Amakabogera and people saw the improvement of Maymay, then sumikat ‘yung kanta. Pero pareho kaming pressured nu’ng una kasi Maymay ‘yan, eh. What if I make destroy her voice or I make her sound not like her, yari ako. Baka sabihin nila, 'Ano ba namang klaseng voice coach ‘yan?'” kuwento ni Jade.

Bukod kina Erika at Maymay ay marami pang sumunod na celebrities na nagpaturo sa kanya at ang pinaka-bunso niyang estudyante ay ang nag-iisang anak na babae ni Quezon City Vice-Mayor Gian Sotto na si Amari.

Samantala, first love ni Jade ang singing dahil ito naman talaga ang tinapos niya, classical music sa loob ng walong taon, pero pangarap din niyang umarte sa harap ng kamera.

Matagal na niya itong nabanggit sa manager niyang si Girlie ‘GR’ Rodis na manager din nina Rachel Alejandro, Cris Villonco, Celeste Legaspi at iba pang mang-aawit.

At ang pangarap niyang makapareha ay ang nag-iisang Piolo Pascual. Tinanong namin kung type niyang mag-voice coach sa actor, “Of course, tanungin ninyo s’ya kung gusto n’ya.” 

Pero nagagandahan na si Jade sa boses ni Piolo, kontrolado raw.

Anyway, sa titulong Be Our Guest, titipunin ng konsiyerto na ito ang mga mag-aaral, pamilya, celebrities, at iba pang A-listers na bisita ng RMA Studio Academy na masasaksihan ang sari-saring galing sa musika at pagtatanghal ng mga estudyante ng RMA sa isang grand concert event.

Bukod kina Maymay at Erika ay kasama rin sa show sina Atasha, Zia Dantes, Scarlet Belo, Max Collins, Olivia Manzano, Rhian Ramos, John Arcenas, Pepe Herrera, Shanaia Gomez, Caitlyn Stave, Ondrea Sotto, Amari Sotto, Denise Laurel, Vivoree, Brigiding Aricheta, Michelle Garcia, Maria Chantal, Sabine Cerrado, Solenn Heussaff, at Ina Raymundo.

Kung sina Alden, Piolo, Maine, tanggap ng fans… NADINE, IPINABOBOYKOT SA PAG-EENDORSO NG ONLINE CASINO

ni Reggee Bonoan @Sheet Matters | Nov. 20, 2024

Photo: Nadine Lustre - IG

Nagatibo ang dating ni Nadine Lustre mula sa ilang netizens at supporters niya dahil sa pag-eendorso ng online casino.

Bago tinanggap ni Nadine ang offer ay dumaan ito sa kanyang management company at tiyak na pinag-usapan nila ang pros and cons kapag tinanggap ito ng aktres.

Ang hindi lang din namin maintindihan ay bakit grabe ang bashing kay Nadine, gayung hindi naman ganito ang ginawa kina Alden Richards, Piolo Pascual at Maine Mendoza na pawang wholesome ang imahe at may mga adbokasiya rin sa pag-eendorso ng online casino.

Ano ang pagkakaiba ni Nadine sa mga nabanggit? 

Anyway, to the rescue ang Pambansang Marites na si Xian Gaza kay Nadine at talagang binarag niya ang mga bashers at haters ng aktres sa kanyang inilabas na open letter sa Facebook (FB) account niya na may 2.2M followers.

“OPEN LETTER TO ALL THE HATERS & BASHERS OF NADINE LUSTRE:

“Matumal na si Nadine ngayon, walang projects. Kung mayroon man, eh, papitik-pitik lang at sobrang barya ng TF (talent fee).

“May mga loan na kailangang bayaran ‘yung tao. May mga bills na kailangang habulin buwan-buwan. May lifestyle na kailangang i-maintain.

“May mga buhay rin na umaasa sa kanya. Ang hindi ko maunawaan, eh, kung bakit n’yo ika-cancel ‘yung tao nang dahil lamang sa isang post promoting a gambling platform?

“Kasi maraming maeengganyo? Maraming buhay ang masisira? In what way? Nag-livestreaming ba s’ya? Hindi naman. Brand ambassadress lang ‘yung tao, napakalaki ng offer.

“‘Yung lahat ng kinita n’ya from June 2022 to September 2024 ay kulang pa sa ibinigay sa kanya para sa isang project na ‘to. Bakit hindi n’ya tatanggapin?

“Napakalinis n’yo naman pala, napaka-righteous n’yo. ‘Yung buhay ng ibang tao ay iniisip n’yo pero ‘yung buhay ng celebrity ay hindi n’yo kino-consider. Masyado na kayong woke, lost in touch na kayo sa reality.

“Nakasira ba s’ya ng pamilya by doing one promotional post? Hell no! ‘Yung maglalaro lang d’yan ay ‘yung mga taong lulong na rin sa ibang platform kagaya ng Casinyeam.

“Kinakapos ‘yung tao financially kaya dumidiskarte siya sa buhay sa marangal na paraan tapos iba-bash n’yo pa at dudurugin ang mental health?

“Grabe naman kayo. Nang-scam ba s’ya? Nanloko ba s’ya ng kapwa? Hindi naman. Sana sa bawat ideyalismo na ating ipinaglalaban, eh, maging realistic din tayo paminsan-minsan.

“Boycottin n’yo ‘yung platform pero ‘wag n’yo namang husgahan ‘yung buong pagkatao ni Nadine nang dahil lamang sa isang bagay na magbibigay ng solusyon sa mga pinagdadaanan niya ngayon sa buhay - Xian Gaza.”

Habang isinusulat namin ang balitang ito ay nasa 34,000 ang engagements at 1,500 shares ang naturang post.

Ang dami na raw pinagdaanan… AMY, AMINADONG NALOKO NA NG ASAWA KAYA MAY 'K' MAGBIGAY NG PAYO

ni Reggee Bonoan @Sheet Matters | Nov. 19, 2024

Photo: Amy Perez - FB

Ang aga ng pa-Christmas-cum thanksgiving presscon nina T'yang Amy Perez at Tita Winnie Cordero sa ilang miyembro ng media at vloggers na ginanap sa Seda Hotel, Trinoma Complex nitong Nobyembre 12 at magkahalong saya at lungkot ang naramdaman nila nang muling bumalik sa ere ang Teleradyo.

Masaya sila dahil may programa sila sa Teleradyo sa DWPM (dating DZMM). 

Si T'yang Amy, may Ako ‘To, Si T'yang Amy program na tungkol sa mental health issues at napapakinggan tuwing 3 PM mula Lunes hanggang Biyernes. Si Tita Winnie naman ay may dalawang programa sa DWPM, ang Tatak Serbisyo na isang public service program, Lunes hanggang Biyernes, 10:30 AM, at Win Today tuwing Sabado, 10 AM. 

Pero malungkot sila dahil marami silang kasamahan sa dating DZMM ang nawalan ng trabaho mula pa noong nawalan ng prangkisa ang ABS-CBN. 

Anyway, bilang tumatalakay sa mental health issues at nagbibigay-payo si T'yang Amy kaya natanong siya kung ano'ng ipinapayo niya sa mga tagasubaybay niya. 

“Marami na kaming pinagdaanan sa buhay. So, 'yung mga pinagdaanan namin na iyon ang siyang baon namin every single day.

“Kapag ako ang nagbibigay ng advice sa mga listeners, hindi ko naman idinidikdik sa kanila, ‘O, eto ang gawin mo because this is how I did it before.’ 

“So, alam ko na hindi siya one size fits all. At the end of the day, I will give you options. Kung ikaw ay aking listener, bibigyan kita ng option nu’ng nangyari 'yan sa akin. Kunwari, kung ang pinag-uusapan ay nag-cheat ang asawa, ‘Eto 'yung ginawa ko. Nangyari 'yan sa akin,'” natawang banggit ng TV-radio host.

At siyempre, ang matinding pinagdaanan ni T'yang Amy sa kanyang unang asawa ang naibahagi niya sa kanyang mga listeners.

Pero ngayon ay, “I’m happy with my second husband. In fact, we’re celebrating our 10th wedding anniversary.” 

Ang kilalang radio host na si Carlo Castillo ang tinutukoy ni T'yang Amy. Biniyayaan sila ng dalawang anak — sina Kyle, 16 years old, at Seyah, 12 years old.

Ang panganay na anak ni Amy na si Adi, 26 years old, ay humiwalay na sa poder nila noong edad 21 ito. 

Anyway, aminado si T'yang Amy na nakaka-relate siya sa mga problema ng mga tagasubaybay niya na naloko ng partner nila at ito ‘yung nangyari sa unang asawa niyang si Brix Ferraris. Ikinasal sila noong 1995 at napawalang-bisa ang kanilang kasal pagkalipas ng siyam na taon.

Going back sa pagbabalik nila sa Teleradyo ay aminadong pressured si T'yang Amy. 

“Masaya na meron ding pressure na nasa balikat naming lahat na nasa DWPM dahil siyempre, alam naman natin na hindi pa tuluyang nakakaahon ang programa, ang istasyon. 

“So, alam namin na sundalo kami na sumusunod at ginagawa ang trabaho namin para sa ikauunlad ng lahat ng nasa DWPM.

“Masaya dahil nakikita pa rin namin ‘yung mga dati naming katrabaho and at the same time, malungkot kasi alam naming nabawasan kami, pero nandito pa rin kami, lumalaban. Sabi nga sa Korea, ‘fighting!’” sambit nito.