P20-M shabu, nasabat sa big-time drug operator ng Sulu

ni Mary Gutierrez Almirañez | March 15, 2021

Nasabat ang mahigit P20 milyong halaga ng shabu na nakasilid sa 3 kilong Chinese tea bags mula sa kinilalang big-time drug operator na si Ejek Abduhalim sa isinagawang operasyon ng Philippine Drug Enforcement Agency Bangsamoro Region (PDEA-BARMM) sa Port Area Extension, Barangay Waled Jolo, Sulu kahapon, Marso 14.

Ayon kay PDEA-BARMM Regional Director Juvenal Azurin, “Kung makikita ang packaging ng illegal drugs, from outside sources, ibig sabihin imported. We already identified where is the source of the said confiscated illegal drugs and hopefully we can conduct follow-up operations.”

Iginiit niya na ang Golden Triangle Cartel ang nag-o-operate at nagpo-produce ng mga kontrabando sa border ng Myanmar, Thailand at Cambodia.

Aniya, mula sa Malaysia ay ibinibiyahe ng mga ito ang droga papunta sa Basilan, Tawi-Tawi at Sulu upang i-distribute sa bansa. Dagdag pa niya,

“We have just started. There is good transfer of intelligence, we have a good relationship with other government security forces in collaboration and coordination. Hopefully, we can get a better and bigger picture of how illegal drugs trade thriving in Sulu.”

Sa ngayon ay kasong paglabag sa Comprehensive Dangerous Drugs Act of 2002 ang haharapin ng suspek na si Abduhalim.

Hinalo sa fried chicken … Bebot, arestado sa droga, marijuana

ni Lolet Abania | March 6, 2021

Isang babae ang nahuli matapos na tangkang ipuslit sa loob ng Davao City Jail ang hinihinalang marijuana at ilegal na droga mula sa dala nitong pritong manok.

Kinilala ang suspek na si Audrey Madelo Millomeda, 37-anyos at residente ng Deca Homes, Barangay Cabantian, Buhangin District, Davao City.

Sa ulat, mahigpit na ipinatutupad ng mga tauhan ng Davao City Jail ang pagsasagawa ng inspeksyon sa mga papasok sa nasabing pasilidad.

Habang ininspeksyon ng jail guard ang mga dalang pagkain ng suspek, napansin nito na may nakahalo sa pritong manok na pakete at lumabas na ang laman ay ilegal na droga at marijuana.

Tumitimbang ng 50 grams ang ilegal na droga na may street value na P800,000. Inihahanda na ang isasampang kaso na paglabag sa Republic Act 9165 o Comprehensive Dangerous Drugs Act of 2002 laban sa suspek.

Matatandaang, maraming beses na ring nakarekober ng malalaking halaga ng ilegal na droga ang nasabing city jail, kung saan nakakuha nito mula sa idinikit sa mga walis na ibinigay umano ng isang religious group.

P1.36 milyong shabu, nasabat sa Bulacan

ni Twincle Esquierdo | September 3, 2020

Nasabat ng Bulacan Police sa isang lalaki ang 200 gramo ng shabu na nagkakahalaga ng P1.36 milyon sa isinagawang buy-bust operation kahapon, Setyembre 2, sa San Miguel, Bulacan.

Kinilala ang suspek na si Gilbert Catiis Y. Cobarubias, residente ng Bulualto, San Miguel,

Bulacan na isa sa mga nasa listahan ng PNP PDEA, ayon kay Bulacan Police Chief Capt.

Lawrence Cajipe.

Base sa ulat ni Police Chief Lt. Col. Voltaire Rivera, dakong alas-4:15 ng hapon nang isinagawa ang buy bust operation na pinangunahan ng undercover intelligence operative na nagkunwaring buyer.

“The suspect suddenly sensed that he was transacting to a police officer, ran and drew a gun towards the operatives that prompted the latter to defend himself and shot the suspect,” pahayag ni Capt. Cajipe.

Agad namang dinala sa ospital ang suspek na napilayan habang nakikipagpalitan ng putok sa mga awtoridad bago inihatid sa San Miguel Municipal Jail.

Nakuha rin sa suspek ang isang caliber .45 pistol, isang magazine na may ammunitions, digital weighing scale, maliit na gunting at Bajaj motorcycle.

Dinala sa Bulacan Provincial Crime Laboratory Office ang mga ebidensiyang nakuha habang pinag-aaralan pa ang mga kasong isasampa laban sa suspek.

Ayon pa kay Capt. Cajipe, patuloy nilang pinapaigting ang kampanya laban sa droga sa gitna ng pandemya.