Dagdag-leave sa mga empleyado, pinalagan

ni Mary Gutierrez Almirañez | May 3, 2021

Pinalagan ni President Sergio Ortiz-Luis ng Employers Confederation of the Philippines (ECOP) ang mga isinumiteng ‘employment leave’ sa Senado, batay sa naging panayam sa kanya ngayong umaga, Mayo 3.

Kaugnay ito sa 5-day mental wellness leave at 10-day paid leave para sa mga empleyadong tatamaan ng COVID-19 na ipinasa sa House of Representatives kamakailan.

Ipinaliwanag niyang maaari namang gamitin ang ibang leave category kung saan magiging bayad pa rin ang araw na hindi papasukan ng isang manggagawa.

Aniya, "Napakadami na, lalo pa nga sa mga babae. 'Pag kinuwenta mo ‘yung mga leave, pati maternity leave, halos wala nang matira sa pagtatrabaho… Hindi lang hindi timely, napakaraming leave na naiisip, meron namang existing leave na magagamit. Pag-isipan muna natin paano makakagawa ng jobs at paano gaganda ang ating trabaho at marami sa 'tin ang makapasok.”

Sa muling pagbubukas ng ekonomiya ay maraming manggagawa na ang nakabalik sa trabaho. Ilang oportunidad na rin ang nagbukas para sa mga unemployed at maraming maliliit na negosyo ang puwede na uling mag-operate.

Inaasahan namang masusunod pa rin ang ipinatutupad na health protocols, partikular na sa mga pampublikong transportasyon at mga establisimyento upang maiwasan ang hawahan sa COVID-19.

Mandatoryong bakuna kontra COVID-19, isinusulong

ni Mary Gutierrez Almirañez | April 27, 2021

Isinusulong sa Senado ni Cavite 4th District Representative Elpidio Barzaga na gawing mandatoryo ang pagbabakuna kontra COVID-19 para maabot ng bansa ang herd immunity, na kaagad namang pinalagan ng ilang eksperto.

Ayon kay Food and Drug Administration (FDA) Director General Eric Domingo, “This is really personal autonomy, to have someone being a healthy person being injected with something. 'Pag nagbigay ako ng EUA, required na kailangan mayroong consent ng patient na magpabakuna… May side effects pa 'yan na hindi pa natin alam. Medyo tricky na 'yung making vaccination compulsory, making a vaccine under EUA compulsory, that’s even a little more complicated for me. That’s a very difficult proposition."

Batay pa sa Section 3 ng House Bill No. 9252 na isinumite ni Barzaga, “The COVID-19 Vaccination Program Act of 2021 shall be mandatory for persons as may be determined by the DOH and shall be given for free at any government hospital or health center, and as provided in Republic Act No. 11525, PROVIDED, That inoculation must, at all times, be science and evidence based.”

Paliwanag ni Barzaga, "Consequently, a mandatory mass wide COVID-19 Vaccination Program is imperative to solve the present COVID-19 pandemic and achieve herd immunity or population immunity… A substantial proportion of a population would need to be vaccinated. This would lower the overall amount of virus able to spread in the whole population."

Tinanggihan naman ni dating Department of Health (DOH) Secretary Esperanza Cabral ang proposal ni Barzaga. Aniya, dapat munang iprayoridad na hikayating magpabakuna ang publiko bago iyon gawing mandatoryo.

Dagdag pa ni President of the Employers Confederation of the Philippines Sergio Ortiz-Luis, "Tingin namin, hindi magpo-prosper (ang bill na 'yan). Unang- una, I think, kahit makalusot sa Kongreso, eh, palagay ko, ibe-veto din ng Presidente ‘yan dahil sinabi ng Presidente na walang pilitan diyan, eh."

Sa ngayon ay tinatayang 1,739,656 indibidwal na ang mga nabakunahan kontra-COVID-19, kung saan 230,998 ang mga nakakumpleto sa dalawang dose at 1,508,658 naman para sa unang dose.