P-Du30, sinopla sa hirit na arestuhin ang mga ayaw magpaturok… 'Pinas, kulang sa suplay ng bakuna —

Binay

ni Ronalyn Seminiano Reonico | June 22, 2021

Matapos magbabala ni Pangulong Rodrigo Duterte na ipaaaresto niya ang mga ayaw magpabakuna, sinabi ni Senator Nancy Binay na ang suplay ng vaccines ang “biggest problem” kaya marami pa rin ang hindi nababakunahan.

Sa isang panayam, saad ni Binay, “May problema tayo sa supply. It’s not as if ayaw ng mga kababayan nating magpabakuna.”

Sinabi rin ni Binay na maraming Pilipino na maagang nagpupunta sa mga vaccination centers para lang makahabol sa cut-off.

Aniya, “Madaling-araw pa lang pumipila na sila ru’n sa vaccination centers para ‘di sila abutan ng cut-off.

“So at this point, I think vaccine hesitancy is not the problem, vaccine supply is the biggest problem so we need to arrest that.”

Gayunpaman, aniya ay mayroon talagang mga indibidwal na nag-aalinlangang magpabakuna.

Ngunit ayon kay Binay, ang kakulangan sa suplay ng bakuna ang dapat binibigyang-pansin ng pamahalaan bago ang pagpapaaresto sa mga Pilipinong ayaw magpabakuna.

Aniya pa, “At this point, nandiyan pa rin ‘yung vaccine hesitancy but for me, ‘yung urgent need right now is to have more supply of the vaccine.”

Ribbon-cutting sa modular hospital, sayang-oras lang — Binay

ni Mary Gutierrez Almirañez | April 7, 2021

Pinalagan ni Senator Nancy Binay ang ribbon-cutting ceremony sa binuksang Quezon Institute Offsite Modular Hospital na pinangunahan nina Senator Bong Go, Department of Health Secretary Francisco Duque III at Vaccine Czar Carlito Galvez, Jr. sa Quezon City kahapon, Abril 6.

Komento ni Binay, "Pakiusap, kung puwedeng buksan na lang para magamit agad. Sayang lang ang oras sa ribbon-cutting at photo ops. These things are unnecessary and leave a bad taste for families of Covid patients who are racing against life and time.”

Binuksan ang bagong pasilidad bilang extension ng Jose R. Reyes Memorial Medical Center dahil sa patuloy na pagdami ng mga pasyenteng naa-admit sa ospital dulot ng COVID-19.

Sa ngayon, tinatayang 110 na pasyente ang kayang i-accommodate ng modular hospital mula sa referral ng One Hospital Command at hindi muna umano tatanggap ng mga walk-in patients.

Mga mayor, bakunahan na rin, COVID vaccine, 'wag nang ibalik — Sen. Binay

ni Mary Gutierrez Almirañez | March 25, 2021

Dinepensahan ni Senator Nancy Binay ang mga alkaldeng nagpaturok ng bakuna kontra COVID-19 na wala sa prayoridad at ang redeployment ng mga hindi nagamit na bakuna pabalik sa central office ng Department of Health (DOH), ayon sa panayam sa kanya ngayong umaga, Marso 25.

Aniya, “Naiintindihan ko 'yung rationale kung bakit nagpabakuna ang mga mayor. The best way to encourage them is kung nakikita nila ang ama ng bayan na nagpabakuna.

So, ibig sabihin nu’n, safe s’ya. But ang problema, hindi pa 'yun ang policy. Sana dapat, naging panawagan na lang, eh, sana isama na lang sila ru’n sa priority, just to encourage, not because gusto na nilang maunang makuha ‘yung benefits ng vaccines.”

Kabilang sa mga pinagpapaliwanag ng Department of Interior and Local Government (DILG) sa ilalim ng ‘show cause order’ ay sina Tacloban City Mayor Alfred Romualdez at Bataraza Palawan Mayor Abrahan Ibba na nabakunahan noong ika-22 ng Marso, T’Buli South Cotabato Mayor Dibu Tuan at Sto. Niño South Cotabato Mayor Sulpicio Villalobos na binakunahan din noong ika-19 ng Marso, at si Legazpi City Albay Mayor Noel Rosal na naturukan noong ika-16 ng Marso.

Dagdag pa ni Senator Binay, “’Di ba nagkaroon ng order itong DOH, kapag hindi n’yo pa nagamit ‘yung bakuna n’yo sa mga lugar n’yo, ibabalik uli ru’n sa central office? Siguro, itong mga LGU, ‘yung thinking nila, parang nandito na nga ‘yung bakuna, eh. Might as well, use it. I think, nagkaroon ng ganu’ng rationale or reasoning, kaya ‘yung mga hindi health workers, eh, nabakunahan na.”

“Kumbaga, hindi ko maintindihan, bakit kailangang may deadline? Bakit kailangang ibalik pa sa central office? Bakit hindi na lang iniutos ng DOH na, 'Sige, kung wala na sa frontliner, 'yung next in line? Baka puwede na mag-umpisa ‘yung mga senior citizens, kung ang available vaccine, eh, pang-senior citizen. And then kung walang senior citizen, ‘yung next na lang, ‘di ba?”

Iginiit pa niyang hindi na dapat ibalik ang mga bakuna, bagkus ay iturok na lamang sa ibang indibidwal upang hindi na gumastos ang pamahalan sa redeployment.

“Kumbaga, wala nang solian. Kumbaga, ginastusan na natin ‘yung pagpapadala ru’n. Gagastos ka na naman ulit ng pagbabalik dito sa central office.” “So I guess, it’s a maling polisiya rin siguro, ‘yung utusan mo itong mga hindi nagamit na bakuna na ibalik uli sa central office,” sabi pa niya.