'Di pa raw safe… Face shield, kailangan pa rin — Nograles

ni Lolet Abania | June 17, 2021

Kinakailangan pa rin ang pagsusuot ng face shield sa ibabaw ng face mask sa gitna ng patuloy na laban sa pandemya ng COVID-19, ayon kay Cabinet Secretary Karlo Nograles ngayong Huwebes.

Ito ang naging tugon ni Nograles matapos ang pahayag ni Department of Health (DOH) Undersecretary Leopoldo Vega kahapon, hinggil sa hindi na kailangang isuot ang face shield sa ibabaw ng face mask kung nasa labas. “We will run this through the IATF meeting later,” ani Nograles sa interview sa CNN Philippines.

Ang Inter-Agency Task Force (IATF) ay nagsisilbing policy-making body ng gobyerno sa pagtugon sa COVID-19 pandemic.

“Face shields are still required,” diin ni Nograles.

Sinabi naman ni Senate President Vicente Sotto III na pumayag si Pangulong Rodrigo Duterte na ang face shields ay dapat na lamang gamitin sa mga ospital.

“Last night, the President agreed that face shields should only be used in hospitals. Allowed us to remove ours! Attn DOH!” ani Sotto sa Twitter ngayon ding Huwebes.

Gayunman, wala pang kumpirmasyon ang Malacañang tungkol sa pahayag ni Sotto.

Nauna rito, si Presidential Spokesperson Harry Roque, na nagsisilbing tagapagsalita para sa IATF ay nananatili sa kanyang pahayag na ang pagsusuot ng face shield sa ibabaw ng face mask ay nakapagdaragdag ng proteksiyon laban sa COVID-19.

Ang naging pahayag ni Vega ang nag-udyok din kay DOH Undersecretary Maria Rosario Vergeire para banggitin ang Joint Memorandum Circular 2021-0001, kung saan nakasaad sa memo na “face shields are required to be worn in enclosed public spaces, schools, workplaces, commercial establishments, public transport and terminals, and places of worship.”

Subalit sa pareho ring memo, nakasaad na ang face shields ay kailangang isuot sa “other public spaces wherein 1 meter physical distancing is not possible and there is gathering of more than 10 people at the same venue at the same time” tulad ng sitwasyon sa mga palengke.

Samantala, ipinahayag ni DOH Secretary Francisco Duque III na iaapela niya kay Pangulong Duterte ang naging desisyon umano nito na i-require na lamang ang paggamit ng face shields sa mga ospital.

Giit ni Duque, hindi pa napapanahon para balewalain ang paggamit ng face shields sa dahilang ang pagbabakuna ng gobyerno ng COVID-19 vaccine sa mga mamamayan ay nananatiling mababa.

“Any layer of protection is better than less protection,” ani Duque.

Kinumpirma naman nina Senators Joel Villanueva at Juan Miguel Zubiri ang naging pag-uusap nina Pangulong Duterte at Sotto nitong Miyerkules ng gabi, subalit ito anila ay isa lamang “off the cut” at hindi opisyal na talakayan.

Face shield, sa mga ospital na lang - P-Du30

ni Ronalyn Seminiano Reonico | June 17, 2021

Nanawagan si Senate President Vicente Sotto III sa Department of Health (DOH) ngayong Huwebes at pinaalalahanan ito hinggil sa paggamit ng face shield dahil aniya, sumang-ayon na si Pangulong Rodrigo Duterte na sa mga ospital na lamang magsuot nito.

Tweet ni Sotto, "Last night, the President agreed that face shields should only be used in hospitals. Allowed us to remove ours! Attn DOH!"

Matatandaang sinabi ni Health Undersecretary Leopoldo Vega na maaaring alisin na ang mga face shields kapag nasa labas dahil sa mababang panganib ng transmission ng COVID-19 sa mga open spaces.

Ngunit iginiit naman kamakailan ni Department of Health Secretary Francisco Duque III ang patuloy na paggamit ng face shield dahil mababa pa ang bilang ng mga nababakunahan kontra-COVID-19.

Nabakunahan na, ‘di na kailangan ng 14-day quarantine — Sotto

ni Ronalyn Seminiano Reonico | June 3, 2021

Ipinatatanggal ni Senate President Vicente Sotto III sa Inter-Agency Task Force (IATF) ang requirement na 14-day quarantine sa mga papasok sa bansa na fully vaccinated na.

Saad ni Sotto, “Calling on IATF [or the Department of Health] to remove the 14-day quarantine on fully vaccinated persons entering the Philippines as long as health standards are followed.”

Dagdag pa ni Sotto, “Why do fully vaccinated people have to still do the two-week quarantine when traveling to the Philippines? It doesn’t make sense! It defeats the purpose of vaccinating so we can open the economy.”

Aniya pa, maraming investors na fully vaccinated na ang maaaring mag-alinlangan o hindi pumunta sa bansa dahil sa ipinatutupad na 14-day mandatory quarantine.

Saad pa ni Sotto, “Vaccinated investors won’t come because they have to quarantine or even Filipinos who are vaccinated are having second thoughts.”

Samantala, ayon naman sa chief epidemiologist ng DOH na si Dr. Alethea De Guzman, kailangan pa ring sumailalim sa quarantine ang mga papasok sa bansa kahit ang mga nabakunahan na.

Aniya, "Our action has always been very strong border control and that’s why part of our border control is ensuring that all arrivals, regardless of vaccination status, should be placed under quarantine.”