Opisyal ng Pharmally, ililipat sa Pasay City Jail

ni Jasmin Joy Evangelista | September 25, 2021

Iniutos ni Blue Ribbon Committee Chairman Senator Richard Gordon na tuluyan nang dalhin si ang opisyal ng Pharmally Pharmaceutical Corporation na si Linconn Ong sa Pasay City Jail at doon ikulong.

Ito ay matapos mapuno ng mga mambabatas sa patuloy na pag-iwas at pagsisinungaling umano ni Ong.

Sa ngayon ay nasa kustodiya ng Senado si Ong matapos patawan ng contempt at ipaaresto ng Senado dahil din sa pagiging mailap sa mga tanong ng mga mambabatas.

“Pagod na rin ako eh, the Chair orders upon motion of Senator Lacson, Drilon, Hontiveros and Pangilinan as approved by the Senate President… Chair orders the Sergeant-at-arms transfer this man to Pasay City Jail,” utos ni Gordon.

Empleyado ng Pharmally, umamin na pinapalitan ang production dates ng mga face shield

ni Jasmin Joy Evangelista | September 24, 2021

Umamin ang empleyado ng Pharmally na si Krizzle Mago na pinapalitan nila ang production dates ng mga face shield.

Ayon sa kanya, ang Pharmally corporate treasurer at secretary na si Mohit Dargani ang nag-utos sa kanya na gawin ito.

Ito ay inihayag sa Senate Blue Hearing ngayong Biyernes hinggil sa umano’y overpriced pandemic items na binili ng gobyerno sa kumpanyang Pharmally.

Sa kasagsagan ng pagpapatuloy ng Senate probe, nagpresenta ng video si Senador Risa Hontiveros ng isang empleyado kung saan ito umano ay nautusan na i-tamper ang mga certificates ng mga face shield.

"Yung mga nakalagay du’n sa certificate niya, production date po is year 2020 pa. Then, ang pinapagawa sa amin is palitan po siya ng certificate na updated this year," ayon sa empleyadong hindi ipinakilala upang masiguro ang seguridad nito.

Doon nito sinabi na si Mago nga ang nag-utos sa kanila na gawin ito.

"Kahit po yupi-yupi yung mga face shield, yupi-yupi na yung mga boxes, kahit po may mga dumi, pinapa-repack pa rin po sa amin nina ma’am … although substandard po…kahit naninilaw, kahit basa-basa na po, yung iba po dun, nababasa gawa po ng tulo sa warehouse," dagdag niya.

Pagkatapos daw i-repack ang mga face shield ay lalagyan nila ito ng sticker na may nakasulat na “Philippine Government Property.”

“Nakalagay po doon, Department of Health, so idea po namin is sa DOH po. Pero sinabi din naman po sa amin nina Ma’am na order po sya ng DOH from Pharmally,” sabi niya.

Dumalo si Mago sa nasabing pagdinig at doon nga inamin na siya ang nag-utos sa mga empleyado na i-tamper ang mga face shield na binili ng gobyerno.

“The instructions came from our management po. I received instructions from the PPC management, particularly Mohit Dargani,” ani Mago.

190 empleyado ng Senado, nabakunahan na

ni Lolet Abania | May 6, 2021

Umabot na sa kabuuang 190 empleyado ng Senado ang nabakunahan kontra-COVID-19, ayon kay Senate President Vicente Sotto III.

“Two hundred muna nu’ng isang araw, 190 lang ang na-vaccinate sapagkat ‘yung 10 ay masyadong matataas ang [blood pressure] at ayaw ng mga doctor na i-vaccinate sila. They will have to come back for another day, ‘yung medyo relaxed na sila,” ani Sotto sa isang online press conference ngayong Huwebes.

Kinumpirma rin niyang ang mga empleyado ng Senate ay naturukan ng China-made na Sinovac COVID-19 vaccines noong Biyernes. Nabibilang sila sa mga nasa A2 at A3 categories.

Gayundin, sinabi ni Sotto, isa pang batch ng mga Senate workers ang matuturukan naman ng Russia-made na Sputnik V COVID-19 vaccine.

Matatandaang binanggit ni Sotto na humingi ang Senado ng mga COVID-19 vaccines para sa kanilang mga health staff workers at empleyado. Kinumpirma rin ni Senate Majority Leader Juan Miguel Zubiri na hiniling ng Senado na makakuha ng 5,000 doses ng Gamaleya Institute na Sputnik V vaccine para sa kanilang 2,500 staff members.

Ayon pa kay Zubiri, inaasahan nilang mababakunahan ang mga Senate employees bago sila bumalik sa sessions sa Mayo 17.