Senate website hindi na-access dahil sa cyber attack

ni Jasmin Joy Evangelista | October 7, 2021

Dahil sa tinatawag na distributed denial of service attack (DDoS), pansamantalang hindi na-access ang website ng Senado nitong Miyerkules.

Ayon sa pahayag ng Public Relations and Information Bureau ng Senado, “A DDoS attack is an attempt to make an online service or website unavailable by overwhelming it with Internet traffic from multiple sources.”

Dahil dito, isinara muna ng IT department ng Senado ang website dahil sa DDoS attack na napuna nila bago magtanghali.

Nanggaling daw sa iba’t ibang bansa ang DDoS internet traffic at ayon sa kanilang pagsusuri, mayroong mga fake accounts o spoofed ang mga IP address.

Ganito rin daw ang bumiktima sa website ni Senator Richard Gordon noong Lunes.

Kasalukuyang nagpapatutsadahan sina Pangulong Duterte at Senator Gordon dahil sa isyu ng pag-iimbestiga ng Senate Blue Ribbon Committee sa mga umano'y maanomalyang transaksyon ng Pharmally Pharmaceutical Corp. sa gobyerno sa kabila ng pandemya.

Mga senador nagtataka kung bakit sa Kamara nagpa-kustodiya si Mago

ni Jasmin Joy Evangelista | October 3, 2021

Nagtataka ang ilang senador kung bakit sa Kamara humingi ng tulong si Pharmally regulatory affairs head Krizle Mago imbes na sa Senado o NBI.

Ito ay matapos ianunsiyo na inilagay siya sa protective custody ng Kamara matapos ilang araw na mawalan ng komunikasyon sa mga mambabatas, kasunod ng kaniyang testimoniya sa Senate hearing na ibinunyag ang ‘swindling’ ng kanilang firm sa gobyerno hinggil sa pagkalap ng face shields.

“Nakakapagtaka ang paghingi ni Mago ng protective custody sa kamara imbes na sa NBI. Kung protective custody ang gusto ni Mago, bakit sa Kamara siya nagpunta? Kusang loob na umamin si Mago tungkol sa tampering ng face shields at hindi pinilit o tinakot ng mga Senador," ani Sen. Franklin Drilon.

Si Senate Blue Ribbon Committee Chairman Sen. Richard Gordon naman ay ikinaiinis ang paulit-ulit na pangako umano ni Mago.

"Nangako siya babalik na siya, a-attend siya kahapon, di na naman dumating. Katulad nu'ng isang araw, nangako, magkikita kami pagkatapos ng hearing para madagdagan 'yung sinabi niya. Tingin ko, kwan na siya eh, nandu'n na siya, pero ngayon ba't naman siya pupunta sa House? Eh kase raw mabait daw 'yung House. Mabait naman ako sa kanya, wala naman akong ginagawa sa kanya," ani Gordon.

Nitong Biyernes ay sinabi ni Good Government and Public Accountability Chair DIWA Party-list Rep. Michael Aglipay na nasa protective custody na ng Kongreso si Mago, at si Sergeant-at-Arms Mao Aplasca na ang sasagot sa mga tanong.

Sumulat umano si Mago kay House Speaker Lord Allan Velasco noong Setyembre 30 para humingi ng proteksyon.

"Presently, I cannot speak freely about the ongoing investigation on the alleged overprice of medical equipments without feeling threatened due to the undue influence and pressure being exerted from various sources," ani Mago.

Tiniyak naman ni Aglipay sa isang sulat kay Gordon na isasaayos ng Kongreso sakaling kailanganin si Mago sa mga pagdinig sa Senado.

Sumulat na rin si Aglipay kay Aplasca para padaluhin si Mago sa pagdinig ng kamara sa Oktubre 4. Sa Oktubre 5 naman ang susunod na pagdinig ng Senado.

Palit sa Roosevelt Avenue... Fernando Poe Jr. Avenue, aprub na sa Congress

ni Lolet Abania | September 28, 2021

Sumang-ayon na ang House of Representatives sa panukalang inihain sa Senado hinggil sa pagpapalit ng pangalan ng Roosevelt Avenue na gawing Fernando Poe Jr. Avenue sa Quezon City.

Ginawa ang concurrence o pagsang-ayon ng mababang kapulungan ng Kongreso sa plenary session na ginanap nitong Lunes.

Noong Setyembre 13, inaprubahan ng Senado ang House Bill No. 7499, na layong palitan ang pangalan ng Roosevelt Avenue at maging Fernando Poe Jr. Avenue bilang pagkilala sa icon ng Filipino action movies na namatay noong 2004.

Gayunman si Senador Grace Poe na anak ng aktor na si FPJ ay bumoto ng abstain dahil aniya, “conflict of interest.”

Una nang inihain ang local bill para palitan ang pangalan ng Del Monte Avenue, na matatagpuan din sa first legislative district ng Quezon City at isunod sa pangalan ng yumaong aktor, subalit naghain si Senate President Vicente Sotto III ng isang amendment para sa Section 1 ng naturang proposed measure na ang Roosevelt Avenue na lamang ang ipalit dito.

Ang amendment ay tinanggap ni Senador Manny Pacquiao na siyang nag-sponsor ng naturang bill.

Sa ilalim ng panukala, ang Department of Public Works and Highways (DPWH) ang naatasang mag-issue ng nararapat na panuntunan, orders, at circulars para ipatupad ang provisions sa loob ng 60 araw mula sa itinakdang effectivity nito.