Nagbebenta ng Tocilizumab, nangotong — PNP.. 2 pulis arestado

ni Lolet Abania | October 13, 2021

Dalawang pulis mula sa Rizal Province at Quezon City ang napipintong masibak sa serbisyo matapos na maaresto sa magkahiwalay na operasyon ng mga awtoridad dahil sa pagkakasangkot ng mga ito sa ilegal na aktibidad, ayon sa Philippine National Police (PNP) ngayong Miyerkules.

Sa isang statement ng PNP, naaresto ng National Bureau of Investigation (NBI) si Police Staff Sergeant Ariel Yalung sa Quezon City hinggil sa ilegal na pagbebenta at overprizing ng Tocilizumab, isang gamot na ginagamit laban sa COVID-19.

Isinagawa ng NBI ang operasyon dahil sa mga reklamo na mayroong dalawang indibidwal na nagbebenta umano ng Tocilizumab online sa halagang P95,000, na mas mataas ang presyo kumpara sa suggested price na P25,000.

Naaresto naman ng Integrity Monitoring and Enforcement Group si Police Staff Sergeant June Angeles sa isang entrapment matapos na akusahan na nagde-demand ng pera mula sa asawa ng isa mga deatinee sa San Mateo, Rizal.

Ayon kay PNP chief Police General Guillermo Eleazar nakakulong na ang mga suspek at nahaharap ang mga ito sa kasong kriminal at administratibo.

“Tinitiyak ko na matatanggal sa serbisyo ang dalawa sa aming kasamahan dahil sa kalokohang kinasangkutan nila,” ani Eleazar.

Hinimok naman ni Eleazar ang publiko na agad na ipaalam sa mga awtoridad anumang impormasyon hinggil sa mga pulis na nasasangkot sa kahina-hinala at ilegal na aktibidades.

Illegal na nagbebenta ng P50M giant clam shell, nasakote

ni Ronalyn Seminiano Reonico | February 14, 2021

Nakumpiska ng Philippine National Police (PNP) ang P50 million halaga ng endangered giant clam shells o “taklobo” sa Bayawan City, Negros Oriental noong Biyernes.

Kinilala ng awtoridad ang suspek na si Ricarido Santiana Dela Cruz, Jr. at inaresto sa entrapment operations na isinagawa ng Crime Investigation and Detection Group RFU 7 Negros Oriental PFU, Bureau of Fisheries and Aquatic Resources, Bayawan City Police Station, Negros Oriental Police Provincial Office (NOPPO) at 1ST Provincial Mobile Force Company, NOPPO.

Ibinebenta ni Dela Cruz ang 1,000 kg ng giant clam shells (taklobo) sa halagang P5 million sa pulis na nagpanggap na kostumer. Narekober ng awtoridad mula sa suspek ang entrapment money; 1,000 kg ng taklobo na bahagi ng total inventory na tinatayang aabot sa higit-kumulang 10,000 kilos na nagkakahalagang P50 million; isang cal. 45 Colt pistol; isang magazine ng cal. 45 pistol; at 7 live ammunition para sa cal. 45 pistol.

Pahayag ni PNP Chief Police General Debold Sinas, "This accomplishment ensures that the sustainable conservation and protection of fishery and aquatic resources law is being implemented by our local authorities.”

Ayon sa awtoridad, isang Yan Hu Liang, alias Sunny, ang nagmamay-ari ng endangered giant clam shells na tinatayang aabot sa international market value na P918 million.

Sina Dela Cruz at Yan Hu Liang ay haharap sa kasong paglabag sa Fisheries Code sa ilalim ng Administrative Order 208 o "Conservation of rare, threatened and endangered fishery species." Kasalukuyan nang nasa kustodiya ng Bayawan City Police Station si Dela Cruz habang si Yan Hu Liang naman ay hinahanap pa ng awtoridad.