21 Pinoy seafarers sa Ukraine, safe na sa Moldova — DFA

ni Lolet Abania | March 2, 2022

Dalawampu’t isang Filipino seafarers ang ligtas nang nakarating sa Republic of Moldova na nagmula sa Ukraine, batay sa ulat ng Department of Foreign Affairs (DFA) ngayong Miyerkules.

Ayon sa DFA, naibiyahe ang all-Filipino crew ng MV S-Breeze, mula sa Chornomosk, Ukraine sa tulong ni Philippine Honorary Consul in Moldova na si Victor Gaina at sa pakikipag-ugnayan ng Philippine Embassy in Budapest. Sa report, dumating ang mga Pinoy seafarers sa Moldova ng dalawang batch, noong Pebrero 27 at nitong Marso 1.

Ang mga seafarers ng bulk carrier MV S-Breeze ay naka-drydock para sa ginagawang repair ng barko sa Ilyichevsk Ship Yard sa Port of Odessa, Ukraine simula pa noong Enero 27.

Ayon sa DFA, ang mga crew ay nag-i-stay sa mga accommodations ng naturang barko subalit humiling ng repatriation ang mga ito dahil na rin sa lumalalang labanan sa pagitan ng Russia at Ukraine. Sinabi pa ng ahensiya na tinatayang nasa 27 Pinoy na ang nailikas mula sa Ukraine patungong Moldova.

“Both the Philippine Embassy in Budapest and the PH Consulate in Chisinau assured that they will arrange the repatriation of the seafarers to Manila at the soonest possible time,” pahayag ng DFA.

Samantala, tinatayang 13 Pinoy mula sa Ukraine ang dumating sa bansa nitong Martes ng gabi. Sila ay bahagi ng 40 evacuees na umalis ng Kyiv patungong Lviv at tinanggap ni DFA Secretary Teodoro Locsin Jr. sa Poland border.

86 Refugees, ilang araw na-stranded sa Mediterranean Sea, nasagip ng mga Pinoy

ni Lolet Abania | June 10, 2021

Nasagip ang 86 refugees ng all-Filipino crew, kung saan nahimpil nang mga ilang araw ang barko ng mga ito sa Mediterranean Sea.

Ayon sa crew member na si Mykel Angelo Genilo, ang kanilang container vessel MV Fleur N ay nakatanggap ng impormasyon mula sa Augusta Italian Coastal Navy na madaraanan nila ang isang barko na nangangailangan na agad na ma-rescue habang patungo sila sa Livorno, Italy.

Sinabi ni Genilo na karamihan sa mga refugees ay mula sa Egypt at papunta ang mga ito sa Italy para maghanap ng trabaho.

Nagkaroon ng engine failure ang naturang ship, kaya ang mga refugees ay na-stuck sa barko habang inaanod lamang ito sa Mediterranean Sea nang ilang araw.

Ayon kay Genilo, dahil wala nang pagkain at tubig na maiinom, ang mga refugees ay namumutla at nanghihina na nang kanilang mailigtas.

“Gusto lang naming i-share ‘yung experience na ‘to, give awareness para sa lahat, given any situation, may chance na tumulong, go lang nang go, without any doubt, because helping one person might not change the whole world, but it could change the world for one person,” ani Genilo.

Ang mga refugees ay ligtas na dinala sa Augusta Port sa Italy at nai-turn-over na sa Italian Coast Guard nitong Martes.