Ladon, kapalit ni Paalam, para sumabak sa SEAG

ni VA - @Sports | April 28, 2022

Dahil sa iniindang injury sa kanyang kaliwang balikat,hindi isinama sa national boxing team na sasabak sa 31st Southeast Asian Games si Tokyo Olympics silver medalist Carlo Paalam.

Sa halip, pinalitan siya ni Rogen Ladon, ang kanyang naging sparring partner noong nakaraang Tokyo Games na siyang nasa kondisyon upang sumabak sa laban. "Bigayan lang kami, noong nasa Tokyo kami tinulungan niya ako. Siya ang naging sparring partner ko. Ngayong siya ‘yung nasa top form para sa SEAGames, ako naman ang tutulong sa kanya," ani Paalam.

Kasalukuyan ngayong magkakasama ang mga national boxers na nagsasanay sa training camp nila sa Thailand. Parehas ng weight class sina Ladon at Paalam. Kapapanalo lang ng 28-anyos na si Ladon ng flyweight gold sa nakaraang Thailand Open kasama ng mga kapwa SEA Games bound na sina women’s lightweight Risa Pasuit at middleweight Hergie Bacyadan.

Magpo-focus na lang si Paalam sa darating na Hangzhou 19th Asian Games na idaraos sa Setyembre at sa posibleng isa pang stint sa Paris 2024 Olympics. Ayon kina Association of Boxing Alliances in the Philippines Secretary General Marcus Jarwin Manalo at Australian training director Don Abnett, pagkakataon na ni Ladon na magpakitang gilas sa Hanoi. “Carlo (Paalam) is not ready to compete yet while Rogen Ladon is in good form,” ani Abnett. “Rogen has been performing well in training and sparring since the start of the year,” wika naman ni Manalo. “He also won gold in the Thailand Open while Carlo is still catching up with his conditioning.” Ang iba pang sasabak sa SEAGames ay sina Tokyo Olympics bronze medalist Eumir Felix Marcial (middleweight), Ian Clark Bautista (featherweight), James Palicte (light welterweight) at Marjon Piañar (welterweight) sa men's division at sina light flyweight Josie Gabuco, flyweight Olympian Irish Magno, featherweight Nesthy Petecio, Pasuit at Bacyadan naman sa women's.

Gilas, pinaghahandaan na ang mga katunggali sa SEAG

ni MC - @Sports | April 26, 2022

Dumaraan na sa matinding training ang Gilas Pilipinas Women dahil target nilang depensahan ang korona sa nalalapit na 31st Southeast Asian Games sa Mayo 12 -23 sa Hanoi, Vietnam.

Ang kanilang paghahanda sa torneo ay nagsimula pa noong Pebrero na pinangungunahan nina Afril Bernardino, Janine Pontejos, Clare Castro, Khate Castillo, Chack Cabinbin, Andrea Tongco, Camille Clarin, Ella Fajardo, Kristine Cayabyab, at Karl Ann Pingol.

Nagbalik sa lineup si Angel Surada, parehong sa 3×3 at 5×5 tournaments. Sumabak din sa lineup ang bagong recruits na sina Stefanie Berberabe, Gabi Bade, at Katrina Guytingco.

Dalawa sa players ang hindi makalalahok, sina Mai-Loni Henson ay may torneo pa sa France, habang si Jack Animam ay nagpapagaling pa sa ACL injury.

"They would know how to play together and the chemistry and everything just being together for a longer time," ayon kay Gilas Women head coach Patrick Aquino, mula sa official SBP website. "Hopefully, all those time na magkakasama kami, magawa namin lahat ng kailangan naming gawin."

Sinabi ni Aquino na pinaghahandaan na nila nang husto ang mabibigat na katunggali upang maipagtanggol ang unang gold na nasungkit noong 2019, parehong pinagharian ng Philippine men's at women's teams ang SEA Games podium.

Kinokonsiderang underdogs ang Gilas Women laban sa Thailand sa finals, pero kumapit sila sa kumpiyansa at tiwala sa sarili sa kompetisyon para masungkit ang 91-71 na tagumpay.

584 atleta, sasabak na sa 2021 Vietnam SEA Games — POC

ni Lolet Abania | January 21, 2022

Handa nang sumabak ang delegasyon ng Pilipinas para sa 2021 Vietnam Southeast Asian Games, kung saan umabot ito sa 584 athletes matapos na ma-trimmed down, ayon sa Philippine Olympic Committee (POC).

Sinabi ni POC president Abraham “Bambol” Tolentino na ang orihinal na plano ay isang 627-athlete contingent subalit napagdesisyunan ng POC, gayundin ni Chef de Mission Ramon Fernandez at ng Philippine Sports Commission (PSC) officials na magkaroon ng kaunting adjustments dahil sa budget constraints.

Ayon kay Tolentino, nabuo ang naturang bilang ng mga atleta sa ginanap nilang meeting nitong Huwebes.

“We understand the situation because of the budgetary constraint in the PSC, so we have to employ belt tightening measures as regards to officials and equipment,” ani Tolentino sa isang statement.

Sinabi rin ni Tolentino na may 80 atleta pa mula sa iba’t ibang national sports associations (NSAs) ang umaapela sa ngayon para makasali sa delegasyon, kung saan nakapasok sila sa ilalim ng Group B category, na ibig sabihin nito ang kanilang mother federation ang sasagot sa kanilang mga expenses sa SEA Games.

Binanggit naman ni Tolentino na hindi pa nadedetermina ng PSC ang eksaktong budget para sa biennial meet subalit una nang inanunsiyo ni Fernandez na posible itong umabot sa halagang P200 million.

Ani pa Tolentino, ang mga atleta ay aalis patungong Hanoi na mahahati sa 2 batches.

Ang unang grupo ay lilipad sa Mayo 6, habang ang isa pang grupo ay aalis naman ng Mayo 10, para mabigyan ng panahon ang ilang indibidwal na makaboto sa May 9 elections.

“Filipino athletes will still be competing in all but one -- xiangqi or Chinese chess -- of the 40 sports in the Hanoi program. They will be divided into four clusters-1A for Hanoi, 1B outskirts of Hanoi and 2A and 2B outside of Hanoi, including canoe-kayak and rowing in Hai Phong,” batay sa statement.