Ganado na ang U-23 Azkals, naisahan ang T. Leste sa SEAG

ni Anthony E. Servinio - @Sports | May 8, 2022

Tinambakan ng Pilipinas ang Timor Leste sa Men’s Football, 4-0, sa pagsisimula ng aksiyon sa 31st Southeast Asian Games Biyernes nang gabi mula sa Viet Tri Stadium sa Phu Tho, Vietnam. Dahil sa malaking panalo, todo-ganado na ang Azkals papasok sa mahalagang laban ngayong araw ng Lunes kontra sa host at defending champion Vietnam sa parehong palaruan, simula 8:00 ng gabi, oras sa Pilipinas.

Bitbit ang sariwang alaala ng mga hindi magandang resulta sa kanilang mga nakalipas na tapatan sa Timorese, naglaro nang agresibo ang Azkals at nagbunga ito ng maagang goal ni Christian Rontini sa ika-11 minuto. Tumanggap ng bola si Rontini mula sa free kick ni kapitan Stephan Schrock at inulo ito papasok sa goal.

Patuloy na pumukpok ang mga Filipino sa second half at dumating ang pangalawang goal, salamat kay Dennis Chung sa ika-56 minuto. Isa pang beterano na si Jovin Bedic ang nagparamdam at lalong pinalayo ang Azkals sa ika-78 minuto galing sa assist ni reserba Lance Ocampo.

Hindi pa kuntento ang Pilipinas at humirit ng pang-apat na goal si Oskari Kekkonen sa ika-81. Kahit lumalapit sa goal ay ipinasa pabalik ni Oliver Bias ang bola sa humahabol na si Kekkonen para sa malakas na sipa na hindi naharang ni goalkeeper Junildo Perreira.

Sa isa pang laro, nagwagi ang Vietnam sa 2019 silver medalist Indonesia, 3-0, sa likod ng mga goal sa second half nina Nguyen Tien Linh (55’), kapitan Do Hung Dung (74’) at Le Van Do (88’).

Pansamantalang hawak ng Pilipinas ang liderato sa Grupo A dahil mas marami silang goal kumpara sa Vietnam. Bago ang laro sa Timor Leste, mataas ang paniniwala ni Coach Norman Fegidero na may pag-asa na pumasok ang Azkals sa semifinals kung gagamiting batayan ang nakita niya sa kanilang ensayo at paano nabubuo ang samahan ng mga manlalaro.

Huling nakapasok sa semis ang Pilipinas sa semis noong 1991 SEA Games sa Rizal Memorial Stadium kung saan naglaro ang ngayon ay 52-anyos na si Fegidero.

Gentle Giants, sakalam; kickboxers, ready na

ni Anthony E. Servinio / GA - @Sports | May 7, 2022

Patuloy ang pamamayagpag ng Dynamic Herb Cebu Football Club at nanaig sila sa palaban na Maharlika FC Manila, 2-1, sa pagbabalik ng 2022 Copa Paulino Alcantara sa PFF National Training Center sa Carmona, Cavite, Huwebes nang gabi. Tig-isang goal nina Arda Cinkir at Jeremiah Borlongan ay sapat para maitala ng Gentle Giants ang ikaapat na sunod na panalo.

Kahit balot ng benda para sa malalim na sugat sa noo noong nakaraang laro, lumaban pa rin si Cinkir at ipinasok ang unang goal sa ika-36 minuto, salamat sa pasa ni Lorenzo Genco. Ito na ang ikatlong goal sa torneo para sa forward na tubong Turkey at tabla na sila ni Daizo Horikoshi ng defending champion Kaya FC Iloilo sa karera para sa Golden Boot o ang may pinakamaraming goal.

Dahil sa kanilang halos araw-araw na laro, ibinalasa ni Cebu Coach Memet Akil ang kanyang manlalaro at nagbunga ito ng dibidendo sa ikalawang goal buhat sa reserbang si Jeremiah Borlongan sa ika-56 minuto. Unang pinatalbog ni Borlongan ang bola sa kaliwang poste at tinamaan nito ang kanang poste bago tumawid ng linya at nanood na lang si Maharlika goalkeeper Vinci Valdez.

Sasabak sa malaking hamon ang Dynamic Herb sa tapatan nila sa United City ngayong Linggo, simula 4:00 ng hapon. Sa pangalawang laro, hahanapin ng Stallion Laguna FC ang unang hakbang upang makasingit sa semifinals sa laban nila kontra Maharlika sa 7:00 ng gabi.

Samantala, handa na ang kickboxers sa aksiyon sa Linggo, Mayo 8 sa layuning makasungkit ng 4 na gold medal sa SEA Games Vietnam. Nakapasa ang kickboxers sa medical examinations kahapon at nagpahayag ng kasiyahan si Samahang Kickboxing ng Pilipinas President Senator Francis “Tol” Tolentino na mananatiling malakas ang performance ng Pinoy athletes.

“All Filipinos are with the Philippine kickboxing team to again bring home pride to our country. More than their winning chances, their sacrifices and disciplined training are proof of the utmost traits of us Filipinos.”

PHL Football, sasalang na vs. Timor Leste sa SEAG

ni Anthony E. Servinio - @Sports | May 6, 2022

Unang sasalang sa aksiyon ang Pilipinas sa simula ng 31st Southeast Asian Games Men’s Football Tournament sa Viet Tri Stadium sa Phu Tho sa Vietnam. Haharapin ng Azkals ang hamon ng Timor Leste, isang koponan na nagbigay ng maraming magagandang laban sa mga nakalipas na taon, simula 4:00 p.m.

Pangungunahan ang atake ng Azkals ng beteranong si Stephan Schrock na magbabalik para sa ikalawang sunod na SEAG. Kasama niya sina Jovin Bedic ng Kaya FC Iloilo at Enrique Linares bilang pinapayagang tatlong manlalaro na lampas sa itinakdang edad na 23.

Karamihan sa mga kasapi ng pambansang koponan ay naglalaro para sa Azkals Development Team sa Philippines Football League (PFL) sa gabay ni Coach Norman Fegidero. Mula sa ADT ay nariyan sina Oliver Bias, Scott Woods, Dennis Chung, Jayve Kallukaran, Jaime Rosquillo, Francis Tacardon, Martini Rey, Jermi Darapang, Lance Ocampo at mga goalkeeper Quincy Kammeraad at Enrico Mangaoang.

Kinuha mula sa iba pang koponan sa PFL sina Oskari Kekkonen at Sandro Reyes ng Kaya at Jacob Pena ng Stallion Laguna FC. Magbabalik din sa Azkals sina Yrick Gallantes, Christian Rontini at Miguel Mendoza matapos lumiban sa mga nakalipas na ilang torneo.

Sa huli nilang pagtatagpo sa 2022 AFF Under-23 Championships sa Cambodia noong Pebrero, nagtapos ang Azkals at East Timor sa 2-2 tabla. Asahan na magbabago ang timpla ng laro ngayon at nandiyan na sina Schrock, Linares at Bedic upang palakasin ang opensa.

Samantala, inilabas din ang opisyal na listahan ng Women’s Team na isa sa mga maagang paborito para sa gintong medalya. Kabilang dito ang mga beterana ng 2022 AFC Women’s Asian Cup India na sina kapitana Tahnai Annis, bise-kapitana Hali Long, Sarina Bolden, Quinley Quezada, Camille Rodriguez, Dominique Randle, Inna Palacios, Jessica Miclat, Olivia McDaniel, Eva Madarang, Sofia Harrison, Carleigh Frilles, Isabella Flanigan, Malea Cesar, Anicka Castaneda, Ryley Bugay at mga idinagdag na sina Alisha del Campo, Kaya Hawkinson, Jaclyn Sawicki at Chantelle Maniti.