Padios, gold sa Pencak Silat; Beach Handball, naka-silver

ni MC / GA - @Sports | May 12, 2022

Napagwagian ng Team Philippines ang kauna-unahang gold medal sa 31st Southeast Asian Games bago pa man ang pormal na pagbubukas ng biennial event ngayong Huwebes sa Hanoi, Vietnam.

Nasungkit ni Mary Francine Padios ang ginto kahapon nang umaga nang magwagi sa women's seni (artistic) tunggal (single) event ng pencak silat. Naungusan ni Padios si Indonesia's Puspa Arum Sari sa final, 9,960 to 9,945.

Bumalibag naman ng tig-dalawang silver at bronze ang Kurash Philippine team sa unang araw ng kumpetisyon sa Hoai Duc Gymnasium mula kina Helen Aclopen Talongen sa women’s 48kgs at Charmea Quelino sa women’s 52kgs class, at Renzo Cazenas sa men’s 81kgs at George Baclagan sa men’s 90kgs division.

Nagdagdag ng bronze medal ang grupo nina Jefferson Rhey Loon Abilay, James El Mayagma, at Rick Rod Ortega Luarez sa men’s team event matapos na malaglag sa semis noong Martes.

Sumegunda para sa silver medal ang pares nina 2020+1 Tokyo Olympian Cris Nievares at Christian Joseph Jasmin sa men’s lightweight double sculls sa rowing sa oras na 7:05.585 para sa silver medal na ginanap sa Thuy Nguyen Hai Phong Aquatics Center.

Nakakuha naman ng bronze medal ang samahan nina Joanie Delgaco, Amelyn Pagulayan, Josephine Qua, at Kristine Paraon sa women’s quadruple sculls sa oras na 7:28.879.

Samantala, nakapagbulsa rin ng silver ang Philippine men's beach handball team at naungusan ang bronze medal finish noong 2019. Noong Lunes, unang tumiyak ang bansa ng silver medal sa bisa ng panalong 26-21, 22-27, 7-6 laban sa Thailand Tuần Châu.

Hawak ng Pilipinas ang 3-1 record mula sa unang apat na laban sa beach handball, binuksan ang kanilang kampanya sa 2-0 win laban sa Thailand —

ang silver medalist noong 2019 SEA Games.

Natalo sila sa dating gold medalist na Vietnam sa bisa ng 0-2 sweep pero nakarekober sa 2-0 win kontra Singapore noong Linggo.

Ang 10-member team ay binubuo nina Jamael Pangandaman, Josef Maximillan Valdez, Mark Vincent Dubouzet, Andrew Michael Harris, Rey Joshua Tabuzo, Manuel Lasangue, Jr., Dhane Miguelle Varela, Van Jacob Baccay, John Michael Pasco at Daryoush Zandi.

Ginagabayan sila nina coach Aurora Adriano, Luzviminda Pacubas at Tomas Luis Telan.

Lady Booters, dinurog ang Cambodia; 3x3 at Kurash, lalarga

ni GA / Anthony E. Servinio - @Sports | May 11, 2022

Nagpadala ng malaking mensahe ang Pilipinas at dinurog ang Cambodia, 5-0, sa pagbubukas ng 31st Southeast Asian Games Women’s Football Tournament, Lunes nang gabi sa Cam Pha Stadium ng Quang Ninh, Vietnam. Saglit lang ang pahinga at sasabak muli ang Filipinas ngayong Miyerkules kontra sa host at defending champion Vietnam simula 8 p.m. sa parehong palaruan.

Mabagal ang simula ng mga Pinay hanggang naipasok ni bunso Isabella Flanigan ang unang goal sa ika-27 minuto. Kinailangang magbalasa ng manlalaro si Coach Alen Stajcic sa second half at ito ang nagbigay-buhay sa kanilang laro.

Pumasok si Sarina Bolden sa ika-56 minuto kapalit ni Carleigh Frilles at wala pang isang minuto ay pinasahan si Eva Madarang para sa dapat ay pangalawang goal, subalit hindi ito binilang ng reperi. Bumawi si Bolden at inulo papasok ang bola sa ika-64 minuto upang madoble ang lamang.

Samantala, sisimulan ng PBA 3X3 First Conference champion Limitless App Masters ang misyon na maipagtanggol ang korona ng bansa sa basketball 3X3 event sa paglipad ng quartet patungong 31st SEAG sa Hanoi. Nagtungo na nitong Lunes ang grupo nina Jorey Napoles, Marvin Hayes, Reymar Caduyac at PBA draft No.1 pick prospect Brandon Ganuelas-Rosser kasama si Coach Willie Wilson at ang iba pang mga staff, bitbit ang bandera ng Gilas Pilipinas men's 3x3.

Susubukan ng apat na players na matapatan ang nakamit na tagumpay nina PBA 5-on-5 mainstays na sina Mo Tautuaa at CJ Perez ng San Miguel Beer, Chris Newsome ng Meralco Bolts at Jayson Perkins ng Phoenix Super LPG sa inaugural 3x3 competition sa nagdaang SEAG sa Maynila noog 2019.

Samantala, susubukang makasungkit ng dalawang Kurash athletes ng medalya ngayong Miyerkules sa magkahiwalay na preliminary matches para sa women’s 87kgs at men’s 60kgs category sa Hoia Duc Gymnasium.

Tatangkain ng parehong 2019 SEAG medalists at playing Coach Al Rolan Llamas at Sydney Sy Tancontian na mahigitan ang nakamit nilang mga medalya sa pagsabak sa preliminary rounds ng men’s extra-lightweight category at women’s heavyweight class sa magkahiwalay na tagpo, ayon sa pagkakasunod.

Unang sasalang sa preliminary round ang dating Asian Indoor Martial Arts Game (AIMAG) bronze medalist na si Llamas kalaban ang Thailand fighter at sunod na makakatapat ang host country na ang Vietnam sa kanyang bracket.

'Pinas, tinabla ang laban sa Vietnam, lider pa rin

ni Anthony E. Servinio - @Sports | May 10, 2022

Tiniis ng Philippines Men’s Football Team na mabugbog nang 90 minuto bago maiuwi ang dumadagundong na 0-0 tabla sa defending champion at host Vietnam sa pagpapatuloy ng 31st Southeast Asian Games, Linggo nang gabi sa maulan na Viet Tri Stadium ng Phu Tho, Vietnam. Dahil sa resulta, nanatili ang Azkals sa liderato ng Grupo A sa ikalawang sunod na araw at bumuti ang pag-asa na mapabilang sa semifinals.

Nasa Vietnam ang bola sa 75% ng panahon kaya sunod-sunod ang kanilang bomba sa goal, subalit nagtrabaho nang husto ang depensa na nakaangkla kay goalkeeper Quincy Kammeraad na walang duda na Man of the Match. May dagdag din na swerte at lumihis ang mga sipa bunga ng hangin at basang palaruan.

Naglabas ng huling baraha si Coach Norman Fegidero at isa-isang ipinasok ang mga reserbang sina Yrick Gallantes, Lance Ocampo at Sandro Reyes kapalit sina Scott Woods, Dennis Chung at Jovin Bedic sa nalabing 15 minuto upang maka-goal, subalit nabitin ang Azkals. Matapos ang huling pito ng reperi ay nagdiwang ang Azkals habang nakatungo ang Vietnam sabay tahimik ng tinatayang 14,000 nilang kababayan.

Parehong umakyat sa apat na puntos ang Pilipinas at Vietnam, subalit lamang ang mga Pinoy dahil sa kanilang 4-0 panalo sa Timor Leste, habang 3-0 lang ang tagumpay ng Vietnam sa 2019 silver medalist Indonesia noong unang araw ng torneo noong Biyernes. Susunod para sa Azkals ang 2019 bronze medalist Myanmar ngayong Martes sa Viet Tri pa rin simula 5 p.m., oras sa Pilipinas.

Samantala, lalong naging mahigpit ang karera para sa semifinals ng 2022 Copa Paulino Alcantara matapos ang 1-1 tabla ng Stallion Laguna FC at Maharlika FC Manila noong Linggo nang gabi sa PFF National Training Center sa Carmona, Cavite. Sa unang laro, winakasan ng United City FC ang apat na sunod-sunod na panalo ng Dynamic Herb Cebu FC at nagtapos din sa 1-1 tabla.