Hidilyn Diaz, wagi uli ng gintong medalya sa 31st SEA Games

ni Lolet Abania | May 20, 2022

Muling pinatunayan ni Olympic gold medalist Hidilyn Diaz na walang makapipigil sa kanya habang nadagdagan pa ang gintong medalya na kanyang nakolekta mula sa 31st Southeast Asian Games sa Hanoi, Vietnam.

Ngayong Biyernes, tinapos ng kauna-unahang Olympic gold medalist ng Pilipinas, ang women’s weightlifting 55 kg event at nasungkit ni Diaz ang gintong medalya para sa 31st SEA Games.

Binuhat ni Diaz ang kabuuang 206 kg sa event matapos makakuha ng 92 kg in snatch at 114 kg in clean and jerk. Sinubukan niyang mag-set ng bagong SEA Games record ng 121 kg para sa clean and jerk, pero nabigo siyang gawin ito.

Sinira naman ni Diaz ang dating SEA Games record na kanyang nakuha para sa snatch ng 91 kg, ngunit kalaunan ay nasira ito ng isa pang weightlifter.

Nakalaban ni Diaz ang limang lifters, kabilang na rito si Sanikun Tanasan ng Thailand, na isa ring gold medalist mula sa 2016 Rio Olympics, bagaman ito ay nasa lighter weight class.

Ito na ang ikalawang gold medal ni Diaz sa biennial meet matapos na makuha ang isang medalya noong 2019 edition na ginanap sa Pilipinas. Nakamit din niya ang silver medals mula sa 2011 at 2013 edition, at bronze noong 2007 sa Thailand.

Santiago at Valdez, bumida sa panalo kontra Malaysia

ni GA - @Sports | May 14, 2022

Sinimulan ng Philippine women’s volleyball team ang kanilang kampanya sa idinaraos na 31st SEAG sa bisa ng 25-14, 25-20, 25-15 paggapi sa Malaysia kahapon sa Quang Ninh Gymnasium sa Hanoi, Vietnam.

Pinangunahan nina Jaja Santiago, Alyssa Valdez, Ria Meneses, Mylene Paat at Ces Molina ang nasabing unang panalo ng koponan pagkaraang mabigong makapagtala ng panalo noong 2019 SEA Games.

Ipinamalas ni Santiago ang nakayayanig na quick hits at matinding net defense sa pagbabalik sa national team matapos hindi makalaro noong 30th edition sa Pilipinas. Nakatuwang nila si setter Kyle Negrito, ang last minute replacement para kay Deanna Wong upang ibigay ang panalo sa kanilang Brazilian coach na si Jorge Souza de Brito.

Ang panalo ang una para sa Philippine women’s volleyball team mula noong preliminary round ng 2017 SEA Games sa Malaysia. Nagbanta pang tatabla ang Malaysia sa second set makaraang humabol mula sa 1-8 na pagkakaiwan sa second set at tuluyang agawin ang bentahe, 17-14. Dito nagsanib-puwersa sina Valdez, Santiago at Kat Tolentino upang maibalik sa kanila ang kalamangan, 20-19 na hindi na nila binitawan para sa 2-0 bentahe sa laban.

Sinimulan ng mga Pinay ang third frame sa pamamagitan ng 18-5 na pag-agwat sa mga Malaysians at hindi na tumingin pa hanggang selyuhan ng spike ni Paat ang tagumpay.

Susunod na makakalaban ng Team Philippines ang defending champion Thailand ngayong 3 p.m. Manila time.

Escarpe, gold sa Kurash; bronze naman kay Bianca

ni GA - @Sports | May 14, 2022

Buong-pusong ibinuhos ni Davaoeño Jackielou 'Jack' Escarpe ang kanyang lakas at determinasyon upang maibigay sa Pilipinas ang ikalawang gintong medalya mula sa Kurash event kahapon sa pagtatapos ng naturang event sa 31st Southeast Asian Games sa Hoai Duc Gymnasium sa Hanoi, Vietnam.

Patuloy na nanindigan ang dating national judo athlete mula University of Mindanao para kunin ang gold medal sa men’s 73kgs category nang talunin si Apicha Boonrangsee ng Thailand sa bisa ng 1-0 at maibigay ang nag-iisang ginto para sa national Kurash team. Nakuha nina Mohamad Razlan Rozaidi ng Malaysia at Soe Myint Tun ng Myanmar ang parehong bronze medals.

Hindi nagpatinag ang tubong Generoso, Davao Oriental sa unang laban pa lamang ng silatin ang ang defending champion na si Ngoc Son Vu ng Vietnam sa preliminary round at sinunod na pinatumba si Soe Myint Tun ng Myanmar.

Nahigitan ni Escarpe ang bronze medal performance sa men’s judo team event noong 2019 SEAG sa 'Pinas. Hindi pinalad si Estie Gay Liwanen na muling magkampeon matapos makuntento sa bronze medal sa women’s 57kgs, habang kinubra ni Bianca Estrella ang isa pang bronze medal sa women’s 70kgs category.

Napagwagian ni Liwanen ang titulo sa women’s 63kgs noong nagdaang tatlong taon, ngunit tinanggal ang kategorya ng host country, habang bumagsak sa third place si Estrella na dating runner-up ng naturang weight category.

Wagi ng gold sa women’s 70kgs si Thi Thanh Trm Nguyen, habang silver si Phyo Swe Zin Kyaw ng Myanmar. Nauna nang nagsipagwagi ng 3 silvers mula kina Charmea Quelino (women’s 52kgs), Helen Aclopen (women’s 48kgs) at Sydney Sy Tancontian (women’s +87kgs), habang may na bronze mula kina playing coach Al Llamas (60kgs), Renzo Cazenas (81kgs) at George Baclagan (90kgs).

Sa kabuuan ay may 1 gold, 3 silver at 5 bronze medals ang Kurash Sports Federation of the Philippines na hinigitan ang 1 silver noong 2019.