89 bgy. captains, suspendido sa anomalya sa SAP

ni Ronalyn Seminiano Reonico | January 19, 2021

Sinuspinde nang anim na buwan ng Office of the Ombudsman ang 89 barangay captains dahil sa umano'y anomalya sa distribusyon ng cash aid sa ilalim ng social amelioration program o SAP.

Sa ginanap na press briefing nu'ng Lunes nang gabi ay isa-isang pinangalanan ni Pangulong Rodrigo Duterte ang 89 kapitan ng barangay.

"Itong mga barangay captain, I warned you, pag-umpisa pa lang sinabi ko, do not f*** with this Pantawid, iyong panahon ng COVID na namigay ang gobyerno ng pera para sa mahihirap.

Sinabi ko na lalo na sa barangay level, huwag na huwag ninyong gawin. Now, ito, suspendido for six months, then mag-hearing sa kaso mo. If a case is filed against you kasi pera ito, either pera na binulsa ninyo or hindi ninyo ginamit o ano mang kabulastugan na ginawa ninyo sa pera, contrary to my injunction na huwag na huwag ninyong gawin iyan.”

Mahigit P200 billion ang inilaan ng pamahalaan para sa social amelioration program sa ilalim ng Bayanihan to Heal As One Act (Bayanihan 1) para sa 18 million mamamayan ngayong panahon ng COVID-19 pandemic.

Sa ilalim naman ng Bayanihan to Recover As One Act (Bayanihan 2), aabot sa P5,000 hanggang P8,000 ang natanggap ng mga “low-income households” sa mga lugar na isinailalim sa lockdown, gayundin ang mga pinauwing overseas Filipino workers at mga nawalan ng trabaho.

Nais din ni P-Duterte na sibakin sa puwesto ang mga ito kapag napatunayang sangkot sa korupsiyon.

Aniya, “Ito, preventive lang ito, suspendido kapag iniimbestigahan ka, but at the end of the investigation, if you are good, then you are exonerated. But if you are guilty, I ask, I am asking, requesting, most respectfully requesting the Ombudsman to dismiss them from service...

When they are finally dismissed, it will always carry, it will be accompanied by the statement that they are no longer eligible for public office, iyan ang masakit diyan. Hindi ka na puwedeng tumakbo maski water boy sa barangay n’yo.”

P250, singil sa mga benipisyaryo ng SAP na gustong mag-cash out

ni Twincle Esquierdo | September 3, 2020

Binalaan ng Department of Social Welfare and Development (DSWD) ang partner-financial service provider (FSPs) na huwag mag-o-overcharge sa mga benepisyaryo ng Social Amelioration Program (SAP) kapag mag-o-over-the-counter cash out ang mga ito.

Ayon kay DSWD Undersecretary Rene Glen Paje, tinawag nila ang atensiyon ng Cebuana

Lhuillier sa Parañaque City, isa sa mga pay-out centers dahil ‘di umano sa paniningil ng P250 insurance fee sa mga benepisyaryo ng SAP, matapos makatanggap ng reklamo sa mula sa social media.

“Tinawag na po ang atensiyon ng ating FSP, ang ating FSP partner, sa Starpay hinggil dito at pinaalalahan po natin na ang Cebuana Lhuillier branches sa Parañaque na huwag na dapat kolektahin ang nasabing halaga,” sinabi ni DSWD Undersecretary Rene Glen Paje.

Aniya pa, “Hindi po sila dapat kumolekta ng ganung halaga at ang insurance ay standard sa mga Cebuana branch subalit ito’y hindi ipinatupad para sa mga benepisyaryo ng Social Amelioration Program,”

Ang Starpay ay isa sa anim na FSPs ng DSWD para sa pamamahagi ng ayuda sa ilalim ng

ikalawang implementasyon ng SAP.

Sa naganap na House Committee on Good Government and Public Accountability ay patuloy na tinalakay ang mga iregularidad sa implementasyon ng SAP. Noong Agosto 26, inirekomenda ni Camarines Sur 2nd District Rep. Luis Raymund Villafuerte Jr. na dapat nilang masuri ang FSPs dahil sa mga katiwaliang ginawa ng mga ito.

Ipinaliwanag naman ni DSWD Undersecretary for Operations Atty. Aimee Torrefranca-Neri, nangyayare ang dagdag na singil kapag ang benepisyaryo ng SAP ay nagpasyang mag-cash-out sa mismong partner-remittance center.

Dagdag pa ni Atty. Torrefranca-Neri, “the remittance center should not charge more than P50 for every cash out by way of a convenience fee, or a cash out fee, if the beneficiaries decide to cash it out from the remittance centers.”

Matatandaang noong Hunyo 30, 2020 ay nilagdaan ng DSWD and Memorandum of Agreement (MOA) sa Land Bank at anim nitong FSPs na BDO, GCash, RCBC, Robinsons Bank, Paymaya, Starpay at Union Bank.

Nakasaad sa MOA na hindi lalagpas sa P50 ang ibabawas sa benepisyaryo kung sakaling

magpasya itong mag-cash out sa mga partner outlets ng FSPs.

Ayon kay Villafuerte, dapat kumilos agad ang DSWD tungkol sa pang-aabuso ng mga FSPs na nag-o-overcharge sa mga benepisyaryo ng SAP.

“While your desire is to partner with partner financial service providers, may nag-o-overcharge.

Dapat huwag n’yo na silang i-accredit, dahil nang-aabuso,” sabi ni Villafuerte.

Ayon din sa kongresista, asahan ng DSWD na 90 percent ng mga benepisyaryo ay mag-o-over-the-counter cash-out dahil bihira sa mga ito ang gumagamit ng online transaction.

Pahayag ni Villafuerte, “I-assume natin na ‘pag nagbigay tayo ng ayuda, ika-cash out nila ‘yan kasi ‘yung iba, hindi talaga sanay sa online transactions. Karamihan d’yan, bibili ng bigas at karamihan ng retailer ng bigas ay hindi naman online.”

“Gusto kong i-point out na maraming nag-o-overcharge na service providers. We will provide the DSWD these complaints, pero huwag na po kayo maghintay sa amin na provide-an namin kayo, i-check n’yo na po on the ground.”

Para sa ilang katanungan, maaaring dumulog ang mga benepisyaryo ng SAP sa linya ng Starpay sa mga numerong 833-7827, 0950-986-7827, 0921-777-7722 at 0939-600-0020.