SK candidate, binaril sa ulo, dedo

ni Angela Fernando - Trainee @News | October 19, 2023

Patay ang isang 23-anyos na estudyante na kinilalang si Mark Allen Tacbobo na tumatakbo bilang kagawad sa nalalapit na barangay elections matapos paulanan ng bala sa Initao, Misamis Oriental nitong Lunes, Oktubre 16.

Sa isang panayam kay Misamis Oriental Provincial Police Office Spokesperson Lieutenant Theofratus Pia, sinabi nito na ayon sa impormasyong kanilang nakalap, binaril ang biktima sa ulo ng dalawang hindi kilalang armadong suspek na sakay ng motorsiklo.

Nagtamo ng tatlong tama ng bala ng baril si Tacbobo na kumitil sa kanyang buhay.

Ngayon ay pinaghahanap pa rin ang mga suspek na agad namang nakatakas matapos ang insidente.

Panukalang batas para sa kompensasyon sa mga SK kagawad, lusot na sa ikalawang pagdinig

ni Jeff Tumbado | January 22, 2022

Aprubado na sa ikalawang pagdinig sa kamara de representantes ang panukalang batas na siyang magbibigay ng “honoraria” at allowances gayundin ang awtomatikong pagkakaroon ng certificate of civil service eligibility sa bawat kagawad ng Sangguniang Kabataan (SK) sa buong bansa.

Sa pamamagitan ng “voice voting”, inaprubahan ng mababang kapulungan ng kongreso nitong araw ng Martes sa kanilang regular session ang House Bill No. 10698 na siyang gagawing batas sa ilalim ng Republic Act (RA) No. 10742 o ang “Sangguniang Kabataan Reform Act of 2015.”

Ayon kay House Ways and Means Chairman Committee Albay Representative Joey Salceda, na siya rin ang principal author, ang nabanggit na panukala ang siyang magbibigay ng karapatan sa bawat SK officials na makatanggap ng “honoraria, allowances at iba pang kompensasyon na naaayon sa batas.

Dagdag pa ni Salceda na ang reporma ay makakatulong din sa pagpapalawak pa ng kanilang kakayahan at karanasan sa pamamagitan ng training, youth empowerment, environmental protection, values education at iba pang programa na makaaapekto sa mga kabataan.

Sa kasalukuyan kasi, ang SK Chairman lamang ang “entitled” sa mga nabanggit na benepisyo.

“If we want to professionalize the SK, we also have to ensure that its efforts are compensated. The SK were very crucial to the fight against COVID-19, as they were among the barangay frontliners that could be mobilized for ayuda distribution and module distribution,” pahayag ni Salceda.

“I believe that the SK is still underutilized. We are giving them more benefits, but in return, we are also giving them more meaningful work,” paliwanag pa ng mambabatas.

Sa kabilang dako umano ay sinabi ni Salceda na inaprubahan na rin sa Senado ang nasabing panukala at tuluyang maaprubahan sa ikatlo at huling pagdinig sa susunod na linggo.

“There is strong minority and majority support for the measure, so I expect very smooth sailing for this proposal,” saad ni Salceda.

“Hopefully, we can do bicam during the session break and ratify during the final six session days before the term expires after elections. Better yet, we can do bicam next week and even ratify by Wednesday next week, if the Senate and House leaders are willing,” dagdag pa nito.

SK President sa Laguna, pinagbabaril sa kuwarto, patay

ni Mary Gutierrez Almirañez | April 15, 2021

Nagdadalamhati ang Lumban, Laguna sa pagkamatay ng 26-anyos na presidente ng Sangguniang Kabataan (SK) na si Renzo Matienzo, ayon sa ibinahagi nilang Facebook post kagabi.

Anila, “Lubus-lubos ang aming pagdadalamhati dahil sa pagpanaw ng aming mabuting Sangguniang Kabataan Federation president. Maganda at masayang alaala ang iniwan mo sa amin na hinding-hindi namin malilimutan. Naging mabuti kang kaibigan at magaling na leader sa amin. You may now rest in peace, Renzo L. Matienzo.”

Batay sa ulat ng Police Regional Office 4A, ilang beses na pinagbabaril si Matienzo habang nasa kanyang kuwarto na naging sanhi ng pagkamatay niya nitong Martes.

Sa ngayon ay patuloy ang imbestigasyon ng pulisya hinggil sa nangyaring shooting incident.