4 pang barangay sa SJDM, oks

ni Mylene Alfonso | March 30, 2023

Ikinatuwa nina San Jose del Monte City Rep. Florida Robes at Mayor Arthur Robes ang resulta ng plebisito sa lungsod na ito para magtatag ng apat pang barangay sa lungsod.

Sinabi ni Robes, tagapangulo ng House committee on good government, na ang pagtatatag ng apat na barangay ay nagbibigay ng mas magandang serbisyo para sa mamamayan.

Nagsagawa ang Commision on Elections noong nakaraang linggo ng plebisito sa 43,771 rehistradong botante sa Bgy. Muzon kung saan 13,322 ang bumoto o 30.44 voter turnout.

Sa 13,322 na botante, 12,324 o 92.51 porsyento ang bumoto ng "oo" upang hatiin ang barangay sa apat -- Bgy. Muzon Proper, Bgy. Muzon East, Bgy. Muzon West at Bgy.

Muzon South.

Habang 969 o 7.27 porsyento lamang ang bumoto ng "hindi."

Ang Bgy. Muzon noong 2020, ay may populasyon na 127,506.

2 bata, nagpaalam na maglalaro, ‘di na nakauwi, natagpuang patay

ni Mary Gutierrez Almirañez | May 13, 2021

Dalawang bata ang natagpuang patay sa mabundok na bahagi ng Barangay Graceville, San Jose del Monte (SJDM) City, Bulacan nitong Miyerkules, Mayo 12.

Ayon sa ulat, hinihinalang ginahasa muna bago pinatay ang 11-anyos na si Jenny De Vera sapagkat wala na itong saplot at iniwang nakatihaya. Habang sa ‘di kalayuan nama’y natagpuan ang 8-anyos na si Lou Anderson Icalla na nakadapa sa damuhan.

Parehong may sugat sa ulo at iba't ibang bahagi ng katawan ang mga bata. Nakita rin sa crime scene ang bato na posibleng ginamit sa pagpatay.

Kuwento pa ng mga kaanak, nagpaalam ang dalawang bata para maglaro nu’ng Martes nang tanghali ngunit mula noon ay hindi na sila nakauwi ng bahay.

Nagtulungan naman ang magkakapitbahay upang hanapin ang mga ito. Pasado ala-una kahapon nang matagpuan ang bangkay ng mga biktima.

Sa ngayon, mayroon nang suspek ang barangay at pulisya. Gayunman, patuloy pa rin ang imbestigasyon para matugis ang salarin at upang alamin ang motibo sa pagpatay.

Nangako naman ang mga awtoridad na paiigtingin ang seguridad sa lugar dahil hindi umano iyon ang unang beses na nagkaroon ng patayan doon.