P35 taas-sahod sa NCR, aprub sa PCCI

ni Angela Fernando @Business News  | July 4, 2024

Aprub sa Philippine Chamber of Commerce and Industry (PCCI), ang pinakamalaking grupo ng negosyo sa bansa, ang pagtaas ng P35 sa arawang minimum na sahod ng mga manggagawa sa mga pribadong sektor sa National Capital Region (NCR).

Binigyang-diin ni PCCI Pres. Enunina Mangio na mahigpit na susundin ng mga employer ang bagong minimum na sahod na mula P610 hanggang P645 na inaprubahan din ng Regional Tripartite and Productivity Wage Boards ng NCR.

“It’s a decision made by the wage board, we will respect and follow that. On the part of PCCI, we will monitor and evaluate its impact on our micro and small enterprises that we consider the backbone of our economy,” saad ni Mangio.

Dagdag pa ng PCCI chief, makatwiran naman ang P35 na taas-sahod kumpara sa naunang iminungkahing P100. Samantala, nagpaalala rin si Mangio na mahalagang isaalang-alang ang epekto ng pagtaas ng minimum na sahod sa mga negosyo na mapipilitang mag-adjust sa mas mataas na gastos sa paggawa.

₱750 minimum wage vs. taas-presyo

ni Angela Fernando - Trainee @News | October 26, 2023

Nagkaisa ang samahan ng mga manggagawa sa paghiling sa gobyerno na gawing ₱750 ang arawang sahod.

Ayon sa Bukluran ng Manggagawang Pilipino (BMP), dahil sa patuloy na pagtaas ng mga bilihin, hindi nakakabuhay at sapat ang kinikita ng isang ordinaryong Pilipino, bagkus ay nakamamatay ito.

Ito ay matapos ang sunud-sunod na pagtaas ng bilihin, na halos nabalewala na ang ₱40 na idinagdag sa sahod.

"Naghihirap pa rin ang mga manggagawa. Ang hinihingi naming mga manggagawa, suweldong makabubuhay. Pero ang binibigay, suweldong nakamamatay. Cost of living, not cost of dying," ani BMP President Attorney Luke Espiritu.

Hinimok din ng samahan na ibasura na ang Republic Act No. 6727 na mas nagpapahirap lang sa buhay ng mga manggagawa.

Hindi lang taun-taon ang umento.. Sahod ng titser, tataas pa — VP Sara

ni Madel Moratillo @News | August 15, 2023

Tiniyak ni Vice President at Education Secretary Sara Duterte na naghahanap na ng long-term solution ang gobyerno sa panawagang dagdag- sahod sa mga guro.

Ayon kay VP Sara, mula noong 2020 ay nakakatanggap na ng dagdag-sahod ang mga guro sa ilalim ng Salary Standardization Law of 2019, pero mismong si Pangulong Ferdinand Marcos, Jr. aniya ang nag-atas sa kanya na pag-aralan kung paano magagawang hindi lang yearly ang dagdag-sahod kundi maging long-term at kung paano maitataas ang sahod maging ng mga non-teaching personnel ng Department of Education. Hinihintay aniya nila ang resulta ng nasabing pag-aaral.

Ang Alliance of Concerned Teachers, nanawagan ng P50,000 entry level na suweldo para sa mga guro at P33,000 naman para sa Salary Grade 1 employee. Dismayado rin ang ACT sa zero allocation sa 2024 budget para sa salary increases para sa mga empleyado ng gobyerno.