Shootout sa pag-aresto sa Sulu Ex-Vice Mayor, 5 todas

ni Mai Ancheta | June 26, 2023

Lima katao ang nasawi kabilang na ang isang tauhan ng Philippine National Police-Special Action Force (PNP-SAF) habang 14 ang nasugatan matapos magkasagupa ang mga tauhan ng dating bise alkalde sa Maimbung, Sulu at mga operatiba ng PNP at

Armed Forces of the Philippines (AFP) nitong Sabado.

Ayon kay Maimbung Municipal Police Station OIC Chief Captain Naljir Asiri, apat sa mga tauhan ni dating Maimbung Vice Mayor Pando Mudjasan ang nasawi at isang miyembro ng PNP-SAF, habang 12 pulis at sundalo ang nasugatan at kasamang nadamay ang dalawang sibilyan matapos maipit sa bakbakan.

Sisilbihan sana ng warrant of arrest ang dating bise alkalde na wanted umano sa mga kasong pagpatay sa Barangay Bualo Lipid, subalit agad na nagpaputok ang kanyang mga tauhan.

Sinabi ni Capt. Asiri na bina-validate pa nila ang ulat na may mga nasugatang tauhan si Mudjasan subalit tumakas ang mga ito kasama ang wanted na dating bise alkalde.

Kabilang sa mga nakaengkwentro ng mga suspek ay pinagsamang puwersa ng PNP-Criminal Investigation and Detection Group Region 9, PNP-SAF at 41st Infantry Battalion.

Dahil sa insidente ay napilitang lumikas ang mga residente sa takot na madamay at maipit sa bakbakan.

Sinabi ni Asiri na humuhupa na ang tensyon at unti-unting nagbalikan na ang mga residente.

4 pa sugatan... 2 SAF trainees, todas sa sagupaan sa umano’y NPA

ni Lolet Abania | November 21, 2021

Patay ang dalawang police officers habang apat ang nasugatan matapos masabugan ng isang improvised explosive device (IED) sa isang sagupaan sa pagitan ng mga miyembro umano ng New People’s Army (NPA) sa Northern Samar nitong Sabado ng umaga.

Kinilala ng mga awtoridad ang dalawang nasawi na sina Patrolman Franklin Marquez at Patrolman Jimmy Caraggayan Jr.

Batay sa ulat ng Police Regional Office 8, may apat pang nasugatan matapos ang insidente. Tinamaan ang mga biktima ng IED sa kanilang engkuwentro sa mga tumatakas na rebelde sa Barangay Lonoy sa munisipalidad ng Gamay.

Sa isang Facebook post, nagpahayag ng pakikiramay ang Philippine National Police (PNP) sa mga naulilang mga pamilya nina Santos at Caraggayan.

“Our snappy salute to the bravery they have shown. They were killed in the line of duty defending our country against insurgency. We would want to recognize the valor of four other troop members who were injured during the firefight,” ani PNP chief Police General Dionardo Carlos sa isang statement.

Ayon sa PNP, magbibigay sila ng financial assistance sa mga naulilang pamilya ng dalawang police personnel habang medical aid naman sa apat na iba pa na nagpapagaling na sa ngayon.

Patuloy ring tinutugis ng mga awtoridad ang mga rebelde.

Ang dalawang nasawing pulis ay naka-enroll sa Special Action Force Commando Course (SAFCC) na sumasailalim na sa training para maging kasapi ng PNP-SAF.

SAF, Ipinakalat na sa bansa para sa New Year

ni Lolet Abania | December 31, 2020

Nagtalaga ng mga miyembro ng Special Action Force (SAF) sa maraming lugar sa bansa upang madagdagan ang mga police personnel na nagmo-monitor sa seguridad ng mga mamamayan kasabay ng pagpapatupad ng minimum health protocols.

Ayon kay Philippine National Police (PNP) spokesperson Police Brig. Gen. Ildebrandi Usana, ang mga nasabing kawani ay naka-duty na para sa New Year’s Eve.

“Madaragdagan pa nga po ng puwersa ang ating mga kapulisan galing po sa Special Action Force,” ani Usana.

“Ang layunin naman po, hindi lang po sa seguridad at public order and safety, pati na rin po doon sa mga mamamayan na pumupunta-punta sa mga matataong lugar,” dagdag ng opisyal.

Sinabi pa ni Usana na nag-deploy din ng tinatawag na social distancing patrollers para matiyak na sumusunod ang publiko sa itinatakdang health protocols upang makaiwas sa pagkalat ng COVID-19.

Una nang sinabi ni Joint Task Force COVID-19 Shield commander Police Lt. Gen. Cesar Hawthorne Binag na nagsagawa na ang organisasyon ng doubled deployment ng mga pulis para sa panahon ng Kapaskuhan.

Nakatutok nang husto ang pulisya sa mga lugar tulad ng palengke, simbahan, malls, ports, terminals, at iba pa na inaasahang dinadagsa ng mga tao.