Pagbabakuna sa labas ng NCR, dapat ding tutukan

ni Ryan Sison - @Boses | September 10, 2021

Sa kabila ng pagpapatuloy ng mahigpit na quarantine status, tuloy din ang national vaccination program kontra COVID-19.

Sa National Capital Region (NCR), mahigit na sa kalahati ng target na populasyon sa rehiyon ang nakakumpleto ng bakuna kontra COVID-19. Ayon kay vaccine czar Carlito Galvez Jr., nasa limang milyong residente o 52.3% na ang nakakumpleto ng bakuna, habang nasa 81.72% o mahigit walong milyong residente ang nakatanggap ng first dose.

Base sa ulat ng National Task Force on COVID-19 at Department of Health (DOH) noong Setyembre, aabot na sa 35,838,964 doses ng bakuna kontra COVID-19 ang naipamahagi sa bansa. Sa naturang bilang, nasa 15 milyon na ang nakakumpleto ng dalawang dose o maituturing na bakunado.

Target ng gobyerno na maabot ang “population protection” sa Metro Manila at karatig-lalawigan upang mas mapasigla ang ekonomiya sa pamamagitan ng pagbubukas ng mas maraming negosyo.

Kung tutuusin, good news ito para sa mga residente ng NCR dahil ibig sabihin, marami nang tao ang may proteksiyon laban sa malalang epekto ng virus. ‘Yun nga lang, hindi natin dapat makalimutan ang ating mga kababayan sa iba pang panig ng bansa.

Matatandaang, nagkakaroon na rin ng pagtaas ng COVID-19 cases sa mga probinsiya, at kamakailan lang ay kinumpirma ng World Health Organization (WHO) ang pagkakaroon ng community transmission ng Delta variant.

Samantala, bagama’t tumataas na ang bilang ng bakunado sa NCR, ‘di naman ito nangangahulugang relaks na tayo. Dapat kasabay nito ang malawakang pag-iingat sa lahat ng pagkakataon.

‘Ika nga, hindi lamang bakuna ang tutuldok sa pandemya. Nangangailangan din ito ng kooperasyon ng milyun-milyon nating kababayan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Laban-bawing desisyon ng gobyerno, anyare?!

ni Ryan Sison - @Boses | September 09, 2021

Dahil iniurong ang general community quarantine (GCQ) at granular lockdown sa National Capital Region (NCR), mananatili ang mga umiiral na protocols sa ilalim ng modified enhanced community quarantine (MECQ) sa rehiyon.

Kabilang na ang pagbabawal sa indoor at al-fresco dine-in services, personal care services kasama ang salon at parlor, habang papayagan naman ang religious services, basta’t via online lamang.

Matatandaang noon pa inalmahan ng mga labor group ang pagpapatupad ng granular lockdown at nagkaroon ng agam-agam ang ilang health experts gayung puno pa rin ang mga ospital sa rehiyon.

Ngunit tulad ng inaasahan, ang pagbawi ng quarantine restriction ay umani ng iba’t ibang opinyon mula sa taumbayan. Habang pabor ang iba rito dahil sa patuloy na pagtaas ng COVID-19 cases, marami naman ang nadismaya, partikular ang mga negosyante.

Giit ng mga ito, sa pagbawi ng maluwag na protocols, parang binawi rin ang katiting na pag-asa nila upang makapaghanapbuhay.

Ang ilan sa kanila, nagpatawag ng mga empleyado, isang araw bago ang nakatakdang pagpapatupad ng GCQ, naghanda para sa sana’y pagbubukas ng negosyo, pero ang ending, sayang ang lahat ng paghahanda.

Sa totoo lang, nakadidismaya dahil hindi naman ito ang unang pagkakataon na nagkaroon ng pabago-bagong desisyon ang gobyerno. At kahit ilang beses nang humiling ang taumbayan na ‘wag na itong maulit, parang dedma ang mga nakatataas. Ang siste, sa halip na solusyunan ay tuloy ang laban-bawing desisyon ng pamahalaan.

Sa isang pagbawi lang ng desisyon, napakaraming naperhuwisyo at kabilang na nga rito ang mga maliliit na negosyong sumusugal kahit walang kasiguraduhan kung mababawi ang inilabas na puhunan.

Panawagan sa mga kinauukulan, napakarami nang naabala ng ganitong sistema, kaya plis lang, pakiayos ang inyong mga desisyon. Kung magkakaroon ng pagbabago sa quarantine restrictions, dapat ay dumaan sa masusing pag-aaral bago ianunsiyo sa publiko.

Sana ay matuto na tayo sa mga nakaraang pagkakamali upang hindi na maulit pa.

Tandaan na ang kasalukuyang sitwasyon ay nagdudulot na ng malalang stress sa marami sa atin, kaya ‘wag na nating dagdagan pa.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

220,000 violators noong MECQ, ‘di na nakakagulat

ni Ryan Sison - @Boses | September 08, 2021

Mahigpit man o hindi ang umiiral na quarantine restrictions, libu-libong kababayan pa rin natin ang patuloy na lumalabag sa protocols. Ilan sa mga karaniwang nalalabag ay ang curfew at non-essential travel.

Kaugnay nito, inulat ng Philippine National Police (PNP) na umabot sa higit 220,000 katao ang nasita dahil sa iba’t ibang paglabag sa minimum health protocols mula nang pairalin ang modified enhanced community quarantine (MECQ) noong Agosto 21 hanggang Setyembre 6 ang Metro Manila.

Base sa datos ng PNP at kabuuang bilang, 149,110 ang nabigyan ng warning, pinagmulta at inaresto. Ibig sabihin, nasa 8,718 kada araw ang nasisitang mga lumalabag sa minimum health protocols kung saan pinakamaraming nasita sa paglabag sa curfew sa bilang na 53,383 o 3,493 kada araw.

Sa mga nasita naman sa non-essential travels, 759 kada araw ang naitala para sa kabuuang bilang na 12,906. Habang sa mga lalawigan ng Cavite, Bulacan, Laguna at Rizal, kabuuang 572,023 at 134,407 sa curfew violation.

‘Ika nga, hindi na bago ang pagpapasaway ng mga ‘Pinoy kaya kung tutuusin, hindi na nakagugulat kung ganito karami ang naitalang lumabag sa loob ng higit dalawang linggong MECQ sa Metro Manila.

At ngayong nasa mas maluwag tayong restriction, ano nga ba ang dapat nating asahan, mas maraming maitatalang pasaway o dapat tayong magkusa na sumunod sa mga protocols?

Bukod sa patuloy na pagtaas ng COVID-19 cases, hindi maitatangging problema rin ang mga pasaway nating kababayan.

Bagama’t hindi natin nilalahat, ‘yung iba ay talagang no choice kundi lumabag dahil kailangang kumayod, pero mayroon talagang sadyang pasaway lang. Tipong, parang hindi alam ang mga kailangang sundin at dedma talaga sa virus.

Kaya kahit paulit-ulit ang mga paalala at babala, hangad nating ‘wag nang madagdagan pa ang mga naitatalang violators.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com