Pagre-resign ng mga doktor at nurse, wake up-call sa gobyerno

ni Ryan Sison - @Boses | September 13, 2021

Pagod dahil sa napakaraming COVID-19 patients ang hinihinalang dahilan ng pagbitiw sa trabaho ng ilang nurses sa Philippine General Hospital (PGH).

Una rito, hindi na pumirma ng kontrata ang 11 doktor na kinuha ng Department of Health (DOH) para sa PGH nang mapaso ang kontrata. Gayunman, may natitira pang 11 doktor mula sa DOH na nakatalaga sa naturang ospital.

Pag-amin ng tagapagsalita ng ospital, labis na makakaapekto ang pagkawala ng mga doktor at nurses sa pagtrato nila sa mga pasyente dahil nasa 65% hanggang 75% ng mga ito ang severe at nasa kritikal na kalagayan.

Noong Biyernes ng umaga, puno pa rin ang lahat ng COVID-19 beds sa PGH maliban sa isang OB bed. Habang mayroon pang anim na COVID patients na nananatili sa Emergency Room at isolation room na naghihintay ng bakanteng higaan.

Hindi natin masisisi ang mga health workers dahil sa totoo lang, nakalulungkot na napilitang umalis na lang ang ilan sa kanila dahil sa pagod at dami ng pasyenteng kailangang tugunan.

Sana lang ay maging wake-up call ito sa mga nakatataas na hindi biro ang pagod at sakripisyo ng ating medical frontliners. Literal na buwis-buhay sila magmula nang pumutok ang pandemya para mailigtas ang napakaraming buhay ng ating mga kababayan.

At kung tutuusin, ilan lang ang nawala sa puwesto pero maraming pasyente ang apektado.

Kaya panawagan sa mga kinauukulan, pahalagahan at alagaan ang ating magigiting na health workers bago pa mahuli ang lahat.

Kapag naubos ang mga tao sa kanilang hanay, paano na ang laban kontra pandemya?

Tiyak na malaking problema ito ‘pag nagkataon kaya dapat ngayon pa lang ay galaw-galaw na tayo.

Totoo na hindi natin kontrolado ang pagkalat ng virus, pero baka naman may paraan para mabawasan ang hirap at problema ng ating health workers.

‘Ika nga, hindi madali ang kasalukuyang sitwasyon para sa lahat, pero plis lang, ‘wag nating isnabin ang hinaing ng mga nasa frontline.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

ECQ at GCQ with alert level, ilalarga sa NCR

ni Ryan Sison - @Boses | September 12, 2021

Para mapanatiling bukas ang mga industriya sa kabila ng pagpapatupad ng mga granular lockdowns, magpapatupad ng bagong polisiya ang pamahalaan na sisimulan sa National Capital Region (NCR) kaugnay ng pagtugon sa COVID-19 pandemic.

Dalawa na lamang ang pamimiliang quarantine classifications sa NCR at ito ang enhanced community quarantine (ECQ) at general community quarantine (GCQ) with Alert Level.

Ayon kay presidential spokesperson Harry Roque, aprubado sa Inter-Agency Task Force on Emerging Infectious Diseases ang guidelines para sa susubukang bagong alert level system sa NCR na posibleng ipatupad mula Setyembre 16 hanggang 30, 2021.

Sa bagong polisiya, tanging health at allied health professionals lamang ang ikokonsiderang authorized persons outside of residences (APOR).

Ang bagong sistema ay may apat na alert levels mula Levels 1 to 4. Magkakaroon ng klasipikasyon ang mga industriya na tatawaging “3Cs” para sa closed crowded at close contact industries.

Sa mga lugar na may case cluster, istriktong ipatutupad ang pagbabawal sa paglabas ng mga tao maliban na lamang sa mga health care workers at non-health personnel katulad ng mga nagtatrabaho sa mga ospital, labs, dialysis, facilities; OFWs na may international travel at mga pabalik ng bansa at nakumpleto na ang facility-based quarantine.

Panibagong polisiya, panibagong adjustment para sa lahat.

At dahil susubukan pa lamang ito at walang kasiguraduhan kung magiging epektibo o hindi, panawagan lang natin na paghandaan ang lahat.

Grabeng pagtitiis at sakripisyo na ang dinanas ng milyun-milyon nating kababayan, kaya pakiusap, dapat tayong magkaroon ng mas epektibo at makatotohanang hakbang kontra COVID-19.

Gayunman, anumang itawag sa quarantine classification sa isang lugar, paalala sa lahat na kailangan ang ibayong pag-iingat sa lahat ng oras at hindi kung kailan lang natin gusto.

Tandaan na ang layunin ng mga polisiyang ito ay para sa ekonomiya at kaligtasan ng lahat at hindi upang magparelaks-relaks.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Bakuna para sa mga 12 hanggang 17-anyos, handa na ba?

ni Ryan Sison - @Boses | September 11, 2021

Matapos aprubahan ang Moderna at Pfizer vaccines kontra COVID-19 para sa mga edad 12 hanggang 17, kani-kanyang paghahanda na ang ilang local government units (LGUs) sa Metro Manila.

Kaugnay nito, bukas na ang online registration sa Pateros para sa mga residenteng menor-de-edad. Ang siste, may QR code para sa mga 12 hanggang 17-anyos na eksklusibo sa lungsod. Ayon sa LGU, hinihintay na lamang ang go-signal ng nasyonal na pamahalaan.

Sa Marikina City naman, inililista na ang contact details at pangalan ng mga magulang na nagtatanong kaugnay ng pagbabakuna sa mga menor-de-edad, pati na ang pangalan ng kanilang mga anak. Kasabay nito, nananawagan si Marikina Mayor Marcelino Teodoro na maglabas na ng guidelines kaugnay dito.

Gayunman, pabor ang ilang magulang na mabakunahan ang kanilang mga anak kontra COVID-19. Ang ilan sa kanila, payag na maturukan ang mga anak para protektado kapag pinayagan na ang face-to-face classes.

At tulad ng inaasahan, hindi pabor ang ilang mga magulang dahil sa pangamba sa side effects ng bakuna. Dahil dito, ibayong pag-iingat na lang ang gagawin upang hindi dapuan ng sakit ang anak.

Sa totoo lang, mahaba-habang usapan at proseso pa bago mabakunahan ang mga bata, pero mabuting ngayon pa lang ay paghandaan na ito para pagdating ng panahon, handang-handa na ang lahat.

Siyempre, ang unang dapat paghandaan ay ang suplay. Tiyaking sapat ang mga ito para mabakunahan ang target na bilang ng kabataan. Ikalawa, handa bang magpabakuna ang mga menor-de-edad, ang mga magulang, payag na ba? Bagama’t hindi natin masisisi ang ilang mga magulang kung nauunahan sila ng takot, pero hindi dapat dito matapos ang lahat. Kailangan nating makuha ang tiwala ng mga ito na ligtas ang bakuna at kaya nitong mabigyang-proteksiyon ang mga bata laban sa malalang epekto ng virus.

‘Ika nga, mas okay nang maghanda nang maaga kaysa sa mangapa at nga-nga pagdating ng panahon.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com