Kaalaman tungkol sa bakuna, mas kailangan ng madlang pipol kaysa kulong

ni Ryan Sison - @Boses | September 24, 2021

Layunin ng national vaccination program na mabigyan ng proteksiyon ang mamamayan laban sa malalang epekto ng COVID-19.

At mula Marso ngayong taon, 19.37 milyon na ang fully vaccinated sa bansa.

Gayunman, habang marami tayong kababayan na nag-aabang na mabakunahan, mayroon din namang ilan na nagdadalawang-isip pa at ‘yung iba, desidido nang hindi talaga magpapabakuna.

Kaugnay nito, isinusulong ng isang mambabatas na gawing mandatory ang pagbabakuna laban sa COVID-19 sa lahat ng mga Pilipino sa bansa.

Sa inihaing House Bill (HB) 10249 o An Act Providing for Mandatory COVID-19 Vaccine for All Filipino Citizens Eligible to Receive the Vaccine, kailangang mabakunahan ang lahat ng Pilipino at mga residente ng Pilipinas na kuwalipikadong makatanggap ng bakuna. Ang mga tatangging magpabakuna ay makukulong nang 30-araw at magmumulta ng P10,000.

Alinsunod sa HB 10249, ang lahat ng gastusin sa bakuna ay sasagutin ng gobyerno, habang ang mga pribadong kumpanya ay maaari ring bumili ng bakuna para sa kanilang mga empleyado, basta’t ibibigay ito nang libre.

Gayunman, hindi saklaw ng panukala ang mga taong may ibang paniniwala sa relihiyon at maging ang mga may kondisyong medical na makakasama ang pagbabakuna kung walang sertipikasyon ng mga doktor.

Samantala, ang mga fully vaccinated ay bibigyan ng Vaccine Pass para sa access ng mga ito sa public tourism resort, accommodation, assembly o amusement center.

Sa kabila ng panawagan ng medical experts at gobyerno na magpabakuna na ang publiko, tulad ng inaasahan, hindi lahat ay susunod.

‘Yung iba, ayaw magpabakuna dahil kulang sa kaalaman, pero kung tutuusin, puwede pa natin silang makumbinsi at madadaan sa pagbibigay ng edukasyon tungkol sa bakuna, gayundin ang kahalagahan nito upang makaiwas sa malalang epekto ng sakit.

Kaya ang tanong, kailangan ba talagang umabot sa punto na may makulong at magmulta para lang makumbinse ang taumbayan na magpabakuna o baka naman may iba pang paraan?

Huwag tayong magsayang ng oras at enerhiya sa mga wa’ ‘wentang bagay. Sa halip, magpokus tayo sa makabuluhan at makatotohanang hakbang kontra pandemya.

Tandaan, layunin pa rin nating maprotektahan ang isa’t isa laban sa sakit. Kaya kung sa kulungan ang bagsak ng mga ayaw magpabakuna, mananatili silang walang proteksiyon laban sa virus at ang ending, tataas lang ang bilang ng kaso at hindi madadagdagan ang bilang ng mga bakunado. ‘Wag din nating kalimutan na virus ang kalaban natin dito at hindi tao.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Diskriminasyon at takot ng mga nagpositibo sa COVID-19, ‘wag nang dagdagan

ni Ryan Sison - @Boses | September 23, 2021

Ang bawat lokal na pamahalaan ay may kani-kanyang hakbang upang ma-monitor ang kanilang mga residente na nagpopositibo sa COVID-19.

Matatandaang sa National Capital Region (NCR), nagpapatupad ng Alert Level System at granular lockdown sa mga lugar na may positibo sa sakit nang sa gayun ay maiwasan ang malawakang hawaan at mahigpit na mabantayan ang mga tinamaan ng sakit.

Pero, paano kung pinaniniwalaan at ginagawang paraan ng lokal na pamahalaan upang ma-monitor ang kanilang residente ay posibleng magdulot ng diskriminasyon sa komunidad?

Sa Pateros, may ginagawang ‘yellow tagging’ sa mga bahay na may COVID-19 patient. Ang siste, lalagyan ng dilaw na laso ang tahanan para matiyak na mamo-monitor ang mga ito.

Gayunman, nagpahayag ng pagkabahala ang ilang residente, at maging ang Commission on Human Rights (CHR). Habang binibigyang-diin nito na labag ang yellow tagging sa batas na nagbabawal sa hindi awtoridasong pagbubunyag ng pribado at impormasyon hinggil sa medical condition o treatment ng pasyente, naninindigan si Department of the Interior and Local Government (DILG) Undersecretary for Barangay Affairs Martin Diño na hindi ito labag sa batas dahil ang ‘yellow tagging’ ay boluntaryo lamang.

Tulad ng inaasahan, umani ng iba’t ibang reaksiyon mula sa publiko. Giit ng iba, wala itong maidudulot na maganda dahil bukod sa magdudulot ito ng takot, hindi mawawala ang diskriminasyon.

Baka sa halip na matakot sa COVID ang tao, mas matakot pa sila sa reaksiyon ng kanilang mga kapitbahay. Matindi na ang takot at stress na dulot ng sakit sa mga taong nagpositibo kaya plis lang, ‘wag niyo nang dagdagan.

Nauunawaan nating kailangang mag-ingat ng lahat, pero sa totoo lang, puwede naman itong gawin nang walang malalabag na karapatang-pantao.

Tutal, may mga ipinatutupad naman nang granular lockdown, sana’y maging sapat na ito upang matutukan ang mga lugar na mayroong hawaan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Rekomendasyon sa pagbabakuna sa mga menor-de-edad, linawin

ni Ryan Sison - @Boses | September 22, 2021

Habang kani-kanyang paghahanda na ang iba’t ibang local government units (LGUs) para sa pagbabakuna sa mga batang edad 12 hanggang 17, nagkaroon ng paglilinaw ang Department of Health (DOH) hinggil dito.

Kinontra ng DOH ang unang pahayag ng isa nilang opisyal at iginiit na hindi pa umano nila ganap na inirerekomenda ang pagpapabakuna sa mga btang nasa edad 12 hanggang 17.

Paliwanag ni DOH spokesperson Undersecretary Maria Rosario Vergeire, hanggang ngayon ay pinag-aaralan pa ng kanilang Vaccine Expert Panel ang kaligtasan at ang pagiging patas ng pagbibigay ng COVID-19 vaccine sa naturang age group.

Gayunman, ito ay kabaligtaran ng unang pahayag ni Undersecretary Myrna Cabotaje na pumayag na ang VEP na bakunahan ang mga bata at tinitingnan na ang buwan ng Oktubre sa posibilidad ng pag-uumpisa nito. Ngunit paglilinaw ni Vergeire, posibleng ang tinutukoy ng opisyal ay ang emergency use authority na ibinigay sa Pfizer at Moderna.

Matatandaang una nang binigyan ng EUA ng Food and Drugs Administration (FDA) ang naturang dalawang manufacturers ng bakuna para sa mga bata, ngunit magagamit lamang ito sa mga bata kung maglalabas na ng rekomendasyon ang DOH at VEP.

Bagama’t marami pang pag-aaral na kailangang isagawa upang ganap nang payagan ang pagbabakuna sa kabataan, darating din sa panahong sila naman ang kailangang mabakunahan.

Kaya naman hangad nating magkaroon ng malinaw na panuntunan para maiwasan ang kalituhan, lalo na sa parte ng mga magulang.

Hindi naman natin minamadali, pero sana’y magkaroon ng magandang balita sa pag-aaral na ginagawa ng mga eksperto.

Kailangan na rin kasing mabigyan ng sapat na proteksiyon kontra virus ang kabataan, lalo pa’t aprubado na ang face to face classes sa mga lugar na mayroong mababang kaso ng COVID-19.

Isa pa, hangad nating maging ligtas at handa ang lahat sa oras na magsimula ang pagbabakuna sa mga kabataan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com