Pagsaklolo sa mga health workers sa NCR, now na!

ni Ryan Sison - @Boses | October 04, 2021

Matatandaang sa nakalipas na buwan, naging punuan ang mga COVID-19 ward at critical care units sa mga ospital sa National Capital Region (NCR), partikular sa Taguig at Quezon City.

Gayundin, karamihan ng health workers ang sumailalim sa iba’t ibang antas ng quarantine dahil sa exposure sa COVID-19 patients.

Dahil dito, umapela ng tulong ang mga natitirang medical frontliners dahil hindi na nila kinakaya ang haba ng oras ng duty at sandamakmak na mga pasyente.

Kaugnay nito, plantsado na ang pagpapadala ng Armed Forces of the Philippines (AFP) ng military medical teams sa mga ospital sa NCR.

Ayon kay AFP Surgeon General Colonel Fatima Claire Navarro, base sa pakikipag-usap nila sa Department of Health (DOH), nurses ang karamihan sa hinihingi ng mga ospital.

Gayundin, naghahanda na ang AFP ng dalawang teams, kung saan ang bawat isa ay binubuo ng isang military doctor at limang military nurse. At kung maaprubahan ang Memorandum of Agreement (MOA) ngayong araw, ang unang deployment ng medical teams ng AFP ay sa St. Luke’s Medical Center.

Samantala, ang bawat team ay isasailalim sa RT-PCR test bago i-deploy at sakaling magnegatibo ang resulta, 14-araw silang naka-duty sa ospital na susundan ng 14-araw na quarantine period.

Tatagal ng isang buwan ang deployment kasama ang quarantine period, at subject ito sa extension o reallocation ng DOH depende na rin sa kanilang evaluation.

Kung mas mabilis na made-deploy ang medical teams sa NCR, mas maganda dahil kung tutuusin, kailangang-kailangan na ng tulong ng ating health workers.

Sana lang, magtuluy-tuloy sa serbisyo ang mga ide-deploy na military medical teams dahil malaking tulong ito, hindi lamang sa health workers kundi maging sa mga pasyente.

Gayundin, hangad nating makabalik na sa serbisyo ang mga medical frontliners na sumailalim sa quarantine upang mas maraming pasyente pa ang mabigyan ng kaukulang tulong.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Mga posibleng aberya sa pagbabakuna sa mga bagets, paghandaan din

ni Ryan Sison - @Boses | October 03, 2021

Habang papalapit ang simula ng pagbabakuna sa kabataang edad 12 hanggang 17, tiniyak ng Department of Health (DOH) na mayroong sapat na suplay ng COVID-19 vaccines na pinapayagang maiturok sa mga menor-de-edad.

Ayon kay Health Undersecretary Myrna Cabotaje, chairperson ng National Vaccine Center, isinasapinal pa ang guidelines, pero ang pagbabakuna sa mga menor-de-edad ay sisimulan sa mga edad 15 hanggang 17 na may comorbidities.

Unang ipatutupad sa ilang ospital sa National Capital Region (NCR) ang pagbabakuna at oobserbahan saka pag-aaralan kung ano pang mga dapat ayusin bago ito gawin sa buong rehiyon at buong bansa.

Dagdag ng opisyal, sapat ang suplay ng Pfizer at Moderna. At dahil kabataang may comorbidities ang unang target, isa hanggang dalawang milyong bakuna ang tinitingnan at sa NCR, sapat na aniya ang daan-libong bakuna.

Gayundin, umaasa silang mas maraming bakuna pa ang dumating sa bansa sa last quarter ng taong ito.

Matatandaang nilinaw na kailangang pumirma ng consent form ng mga magulang at bata para sa pagbabakuna. Ang mga menor-de-edad ay kailangang magpakita ng medical certificates na magpapatunay na sila ay may comorbidity.

Samantala, inaasahan ang mas marami ang suplay ng Pfizer mula sa COVAX facility at binili ng gobyerno, gayundin ang walong milyong doses ng Moderna.

Sa susunod na linggo, lagpas 5.5 milyong doses ng Pfizer ang darating sa bansa, na donasyon ng United States.

Habang naghahanda na ang mga lokal na pamahalaan, gayundin ang mga magulang, sana lang ay talagang plantsado na ang lahat sa oras na simulan ang pagbabakuna sa kabataan.

Mahirap kasi ‘yung marami ngang gustong magpabakuna, pero wala namang suplay.

Kaya hangga’t may panahon, pakiusap nating maging handa rin ang gobyerno sa anumang puwedeng mangyari.

Nariyan ang posibilidad na umatras ang mga nais magpabakuna, kaya alamin din kung ano’ng dapat gawin upang hindi masayang ang suplay. Isa pa, ipagpatuloy ang paghikayat sa mga magulang at kabataan na magpabakuna.

Tandaan na ang lahat ng ito ay ginagawa para sa kapakanan ng lahat at kaunting pagsisikap at tiyaga pa, mapagtatagumpayan din natin ang labang ito.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

‘Pinas, moderate risk na nga ba sa COVID-19?

ni Ryan Sison - @Boses | September 29, 2021

Mula sa pagiging ‘high risk’, bumaba na sa ‘moderate risk’ ang estado ng COVID-19 sa bansa, base sa datos ng Department of Health (DOH) matapos sumadsad sa -4% ang 2-week growth rate o bilang ng nagkakasakit noong nakaraang dalawang linggo.

Nasa “moderate risk” na rin ang bed utilization ng Pilipinas, subalit nananatiling “high risk” ang intensive care unit (ICU) utilization rate, kung saan higit 2,000 ang nabawas sa average COVID-19 cases kada araw noong nakaraang linggo kumpara noong Setyembre 13 hanggang 19.

Ayon sa DOH, sa National Capital Region (NCR) nakikita ang malaking pagbaba ng bilang ng mga nagkakasakit kung saan nasa -13% na rin ang growth rate ng rehiyon.

Sa Pasay City, ramdam ang bahagyang pagbaba ng active cases dahil mula 855 noong Biyernes, 835 na ito ngayon. Gayundin, patuloy ang pagbaba ng datos sa Makati, na nakikitang dahil na rin sa ginagawang enhanced community quarantine (ECQ).

Samantala, “moderate risk” na rin ang Calabarzon at Central Luzon pero nasa “high risk pa rin ang bed at ICU utilization rate sa mga rehiyon.

Gayunman, ayon kay Dr. Alethea de Guzman, direktor ng DOH Epidemiology Bureau, nananatiling maingat ang kagawaran sa pag-interpret ng mga datos.

Kung tunay na nasa moderate risk na ang bansa sa COVID-19, magandang balita ito para sa lahat. Ibig sabihin, mababa na ang hawahan, pero hindi naman ito nangangahulugan na makakampante na tayo. Pero tulad ng palagi nating sinasabi, anuman ang mangyari, dapat tuloy ang pag-iingat dahil sa paligid lang ang virus.

Kung nasa moderate risk na nga tayo, siguro nga ay nagbubunga na ang mga pagsisikap ng pamahalaan tulad ng vaccination program.

Ngunit kasabay nito, ‘wag nating kalimutan ang mga pag-iingat na ating nakasanayan. Hangga’t nariyan ang pandemya, tuloy ang pag-iingat para sa ikabubuti ng lahat.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com