Mga aberya sa pamimigay ng ayuda, dapat nang tuldukan!

ni Ryan Sison - @Boses | April 22, 2021

Dahil iba-iba ang laki ng bawat siyudad sa NCR Plus, hindi pare-pareho ang ganap sa pamamahagi ng ayuda.

Mayroong nagbahay-bahay para hindi na kailangang lumabas ng mga benepisaryo, ang iba naman ay nagpapunta sa barangay hall at iba pang venue dahil hindi kakayaning mag-house to house.

Ngunit sa kabila ng iba’t ibang diskarte, hirap talaga ang ilang lungsod na makasunod sa deadline, kaya matatandaang nanawagan ang ilang lokal na pamahalaan sa NCR Plus na palawigin pa ang pamamahagi ng ayuda dahil hindi kakayaning maipamigay ito agad dahil sa laki ng ilang siyudad.

Ang ibang lugar naman, natigil pa ang pagbibigay dahil sa lockdown at pagtaas ng kaso ng COVID-19 sa ilang lugar.

Dahil dito, pinalawig ng gobyerno ang deadline para sa pamimigay ng ayuda sa Metro Manila, Bulacan, Cavite, Laguna at Rizal na sumailalim sa enhanced community quarantine (ECQ) kamakailan.

Ayon kay Presidential Spokesperson Harry Roque, puwedeng ipamahagi hanggang Mayo 15, 2021ang pinansiyal na tulong mula sa gobyerno.

Una rito, inatasan ang Department of the Interior and Local Government (DILG) ang mga lokal na opisyal na tapusin ang pamimigay ng ayuda sa loob ng 15 araw kung ito ay pera at 20 araw kung ito naman ay in-kind.

‘Ika nga, good news ito para sa mga lugar na talagang pahirapan sa pamimigay ng ayuda dahil malaki ang nasasakupan.

Ngunit sa pagpapalawig na ito, hangad nating maging maayos at mapayapa na ang pamamahagi ng ayuda.

Matatandaang kamakailan kasi, sandamakmak na reklamo ang hinarap ng mga LGUs tulad ng nawawalang pangalan ng mga benepisyaryo sa listahan, kulang-kulang na ayuda at dagsaang benepisaryo sa venue.

Kaya naman hangad nating matugunan ang mga reklamo o aberyang ito nang sa gayun ay maiwasan ang mas matagal na pamamahagi ng ayuda, gayundin upang maging sapat na ang karagdagang panahon na ibinigay ng gobyerno.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Nakaimbak na relief goods para sa mga kalamidad, ipamigay na!

ni Ryan Sison - @Boses | April 21, 2021

Habang tumatagal ang ating pakikipaglaban sa COVID-19 pandemic, pakonti nang pakonti ang tulong na natatanggap ng mga pamilyang apektado ng pandemya mula sa gobyerno.

Kung noon ay panay ang pamamahagi ng relief packs ng mga lokal na pamahalaan at tuluy-tuloy ang pagbibigay ng tulong-pinansiyal, bagama’t ngayon ay mayroon pa rin, hindi na ganu’n ang bigayan.

Kaya ang siste, kani-kanyang diskarte ang mamamayan para may makain sa araw-araw, gayundin upang makatulong sa mga kapwa nangangailangan.

Nauso na nga ang ‘community pantry’ sa iba’t ibang lugar sa bansa kung saan puwedeng maglagay ng bigas, gulay, prutas at kung anu-ano pa na puwedeng kunin ng mga walang kakayahang bumili. Pero dahil galing lamang ang mga pagkaing ito sa donasyon, hindi tiyak kung hanggang kailan ang suplay nito.

Samantala, hinihimok ng isang mambabatas ang Department of Social Welfare and Development (DSWD) na ipamigay na ang relief goods na nakaimbak sa bodega ng ahensiya para matulungan ang mga pamilyang apektado ng pandemya.

Giit ng mambabatas, ang nasabing relief goods ay nakatambak lamang sa mga bodega ng DSWD at National Food Administration (NFA), na bahagi ng pondo ng ahensiya para sa taong 2021.

Dagdag pa rito, inilaan umano ang mga relief goods para sa posibleng pagtama ng iba pang kalamidad sa bansa tulad ng malalakas na lindol at bagyo.

Kung tutuusin, may punto naman ang mambabatas, kaya sa halip na masayang ang sandamakmak na relief goods para sa taumbayan, mabuting maipamahagi na ito habang napakaraming pamilya ang nagugutom.

Tutal, sa pera rin naman ng taumbayan nanggaling ang pondo para rito, hayaan nating mapakinabangan ito ng nakararami.

Kaya pakiusap sa mga kinauukulan, isip-isip na bago masayang ang mga nakaimbak na ito. Tandaan nating napakaraming kumakalam na sikmura na nakaasa lamang sa tulong ng gobyerno para lamang maitaguyod ang bawat araw.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

‘Community pantry’, ‘wag haluan ng pulitika, plis lang!

ni Ryan Sison - @Boses | April 20, 2021

Kamakailan ay viral ang “community pantry” sa Maginhawa St., Quezon City kung saan puwedeng maglagay ng pagkain tulad ng bigas, gulay, prutas at de-lata at iba pa na puwede namang kunin ng mamamayang walang kakayahang bumili.

Matapos umani ng atensiyon at papuri mula sa netizens at maging sa Malacañang, nagsulputan na rin ang marami pang community pantry sa iba’t ibang lugar sa bansa.

Kaugnay nito, giit ng isang senador, dapat umanong tularan ng gobyerno at mga pribadong kumpanya ang nagsusulputang community pantry sa iba’t ibang bahagi ng bansa.

Dahil kung tutuusin ay maliit na bagay ang pamamahagi ng ilang pangangailangan, ngunit malaking tulong ito sa marami nating kababayan.

Bagama’t aminado ang gobyerno na hindi kakayanin kung solo nilang tutugunan ang pandemya, malaking bagay na may ganitong inisyatibo ang mamamayan. Kumbaga, pare-pareho lang naman tayong hirap dahil sa pandemya, pero marami pa ring gumagawa ng paraan para makatulong sa mga higit na nangangailangan.

Gayunman, habang tuluy-tuloy ang ganitong proyekto sa iba’t ibang lugar, hangad nating maayos itong masagawa — masunod ang health protocols kung sakaling dumagsa ang mga residente, hindi maabuso at higit sa lahat, ‘wag haluan ng pamumulitika. ‘Ika nga, ‘wag epal!

May mga kumakalat din kasing larawan sa isang siyudad na tila inangkin ng lokal na pamahalaan ang community pantry na itinayo ng mamamayan. Kaya pakiusap sa mga kinauukulan, nasa pandemya tayo at hindi kampanya kaya utang na loob, tigil-tigilan ang ganitong mga galawan.

Hangad nating mas marami pang gumawa nito, lalo na ang mga lokal na pamahalaan at iba pang may kakayahan. Ngunit tulad ng nabanggit, iwasang haluan ng pulitika dahil sa panahon ng pandemya, ang layunin natin ay matulungang makaraos sa araw-araw ang ating mamamayan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com