Distance learning, epektibo ba talaga?

ni Ryan Sison - @Boses | April 26, 2021

Napakalaking hamon para sa ating lahat ang maipagpatuloy ang edukasyon ng mga mag-aaral sa gitna ng pandemya.

Mula sa paraan ng pagtuturo, iba’t ibang set-up ng bahay hanggang sa dami ng natututunan ng mga bata, hindi ito naging madali para sa mga guro, estudyante at maging sa mga magulang.

Kaya sa mga unang buwan ng distance learning, hindi maitatangging napakaraming aberya, dagdag pa ang pangamba na hindi makasabay ang ilang mag-aaral.

Kamakailan ay matatandaang lumabas sa survey na nawawalan na ng gana ang mga mag-aaral sa distance learning dahil pakaunti na nang pakaunti ang uma-attend sa klase, gayundin ang mga nagpapasa ng modules.

Samantala, pinatututukan ng mambabatas sa Department of Education (DepEd) ang kalidad ng distance learning sa bansa.

Ito ay matapos lumabas sa pinakahuling survey ng Pulse Asia na wala pang kalahati sa bilang ng mga magulang o guardians ang nagsabing natututo ang kanilang mga anak o inaalagaan na nag-aaral sa basic education.

Sa survey ng Pulse Asia sa mga magulang mula Pebrero 22 hanggang Marso 3, mahigit sa 63% sa 1,200 sinurvey ang may anak o inaalagaan sa basic education.

Lumabas na wala pang 46% sa mga magulang o guardians ang nagsabing natututo ang kanilang mga anak o inaalagaan. Samantala, 25% o isa sa apat ang nagsabing hindi natututo ang kanilang mga anak. Habang tatlo sa 10 o 30% ang hindi matukoy kung natututo ang kanilang mga anak o hindi.

Giit ng mambabatas, ipinakikita ng resulta ng survey na hindi maganda ang kalidad ng distance learning sa gitna ng pandemya. Gayundin, nakakaimpluwensiya aniya ang edukasyon ng mga magulang at guardian sa mga hamong kinahaharap sa distance learning.

Sa totoo lang, hindi nakapagtataka na ganito ang resulta ng distance learning sa kabila ng pagsisikap ng pamahalaan at mga guro na maitaguyod ang distance learning.

Iba’t iba ang kakayahan ng bawat bata, gayundin ang kapasidad ng mga magulang na magturo.

Marami sa kanila ang kailangang magtrabaho para mairaos ang bawat araw, kaya malamang na hindi talaga matututukan ang pag-aaral ng anak.

Kaya pakiusap sa mga opisyal ng sektor ng edukasyon, pag-aralang mabuti kung talagang epektibo ang sistema ng pagtuturo dahil kung ipapasa na lang nang ipapasa ang mag-aaral nang walang natututunan, malaking problema ito pagdating ng panahon.

Maraming bagay na dapat ikonsidera at silipin dahil hindi dapat bumaba ang kalidad ng edukasyon sa bansa.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Balagbag na pagtatapon ng gamit na facemask at face shield, tigilan!

ni Ryan Sison - @Boses | April 24, 2021

Tamang pagtatapon ng gamit na facemask at face shield.

Ito ang paalala ng Malacañang sa publiko bilang tulong umano sa pangangalaga sa kalikasan.

Ayon kay Presidential Spokesperson Harry Roque, sa panahon ng pandemya, maaaring makatulong ang lahat kahit sa munting paraan tulad ng tamang pagtatapon ng pinaggamitan na facemask at face shield. Dagdag pa ng tapagsalita, dapat ding ituro sa mga bata ang tamang pagtatapon ng mga ito.

Ang paalala ay kasabay ng pagdiriwang ng Earth Day noong Huwebes, Abril 22, 2021.

Samantala, matatandaang kamakailan ay nagpahayag ng pagkabahala ang isang environmental protection group sa pagdami ng plastic na itinuturing na “infectious waste” mula sa ilang mga ospital sa Metro Manila.

Lumabas na dumami ang infectious waste dahil hindi maganda ang waste management ng ilang ospital dahil sa takot sa COVID-19.

Mahalagang maitapon nang tama ang ganitong uri ng basura dahil hindi lamang dagdag na kalat ang maaari nitong idulot kundi iba pang mga problema sa kalusugan.

‘Ika nga, kasabay ng COVID-19 pandemic, nagkaroon din ng pandemya sa plastic waste, ngunit puwede itong maiwasan.

Kaya naman, umapela rin ang Department of Environment and Natural Resources (DENR) sa mga lokal na pamahalaan na magpatupad ng batas na may kaugnayan sa segregation ng basura.

Karamihan sa mga basurang hindi naitatapon nang tama ay napupunta lamang sa kalsada, ilog at dagat. Bagay na tiyak na magdudulot ng panibagong problema.

At kung magpapatuloy ang ganitong eksena, ano na lang ang mangyayari?

Kaya panawagan sa bawat isa, magkusa na tayong magtapon nang tama at ‘wag na nating asahan ang mga kolektor ng basura pa ang gumawa nito para sa atin.

Kung tutuusin, simpleng bagay lang ang tamang pagtatapon ng gamit na facemask at face shield, ngunit kung lahat tayo ay gagawa nito, malaking tulong ito sa bawat isa, lalo na sa ating kalikasan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Mga umaasa sa community pantry, ‘wag pahirapan!

ni Ryan Sison - @Boses | April 23, 2021

Bukod sa ayuda mula sa gobyerno, kabilang sa inaasahan ng marami nating kababayan ang nagsulputang ‘community pantry’ sa iba’t ibang panig ng bansa.

Ang siste kasi, sinuman ay maaaring magbigay ng donasyong pagkain tulad ng bigas, prutas, gulay, de-lata at kung anu-ano pa, na puwede namang kunin ng mga kababayan nating walang kakayahang makabili.

Araw-araw itong dinaragsa ng mga nangangailangan para kahit paano ay maibsan ang kanilang kumakalam na sikmura.

May mga pagkakataon pa ngang hindi na naoobserbahan ang health protocols kaya kinakailangang umaksiyon ng mga barangay para maging maayos ang venue.

Kaugnay nito, kamakailan ay tiniketan ang limang katao matapos pumila nang mas maaga sa alas-5:00 ng umaga sa Maginhawa community pantry.

Binigyan sila ng isang linggo para magbayad ng P300 multa sa city hall, bagay na inako naman ng alkalde kasabay ng paalala na ‘wag nang ulitin ang paglabag.

Matatandaang ipinatutupad ng lungsod ang curfew mula alas-8:00 ng gabi hanggang alas-5:00 ng madaling-araw matapos isailalim ang Metro Manila at karatig-probinsiya sa modified enhanced community quarantine (MECQ).

Samantala, ikinalungkot naman ng mga natiketan ang nangyari sa kanila at iginiit ng mga ito na sana ay itinaboy o pinagsabihan na lamang sila.

Bagama’t nauunawaan nating may umiiral na patakaran, pero sana ay ikonsidera natin ang sitwasyon ng ilan nating kababayan.

Kung tutuusin, kaya lang naman lumabas nang maaga ang mga ito ay dahil nagbabakasakaling may makuha kahit paano sa community pantry at matiyak na may makakain sila. Pero kung pagmumultahin pa ang mga ito ng P300, ano na lang ang mangyayari?

Sana ay magsilbing paalala sa mga awtoridad ang insidenteng ito na pairalin ang malasakit sa lahat ng pagkakataon.

‘Ika nga, lahat tayo ay apektado ng pandemya at iba’t iba man tayo ng pinagdaraanan, ‘wag nating kalimutan na maging mabuti sa bawat isa.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com