Pangangailangan ng taumbayan at iba pang problema, kayang tugunan, diskarte lang!

ni Ryan Sison - @Boses | April 29, 2021

“Magbigay para sa kalinisan ng kapaligiran, kumuha ayon sa nakalaan.”

Ito ang kataga sa isang barangay sa Mandaluyong City kung saan may kapalit na ayuda ang basurang naiipon ng mga residente sa tinaguriang “community palit-basura”.

Bitbit ang mabibigat na sakong naglalaman ng mga wrapper at plastic sachet, nagtungo ang daan-daang residente sa Andres Bonifacio Integrated School upang mapalitan ng ayuda ang mga dalang basura. Ang iba naman ay nagdala ng dose-dosenang litro ng bote ng softdrink na sinuksukan din ng mga plastic.

Ayon sa ilang residente, pinagtutulungan nila ang pag-iipon sa mga plastic, kaya pati ang ayuda ay pinaghahatian.

Gayunman, aabot sa tig-sampung kilo ang timbang na puwedeng ipagpalit ng mga residente kung saan kasama sa mga ayudang ibinibigay ay kilo ng bigas, mga gulay at ilan pang pagkain mula sa barangay at donasyon.

Ayon sa punong barangay, layon ng proyekto na mabawasan ang naiipong basura mula sa Addition Hills nang may insentibo rin sa mga residente dahil tinatayang libu-libong tonelada ng plastic ang itinatapon sa kanila, lalo’t sila pa ang pinakamalaking barangay sa lungsod.

Noong 2019 pa inilunsad ang proyektong ito, at ipinatupad din nang mag-lockdown noong nakaraang taon para makatulong sa pagkabagot ng mga residente.

Bagama’t may sariling community pantry ang barangay, pansamantala itong isinara para sa palit-basura project.

Nakatutuwang mayroong mga ganitong proyekto kung saan hindi lamang mga residente ang nakikinabang kundi maging ang kalikasan. ‘Ika nga, win-win ang hakbang na ito.

Ngayong tutok ang lahat sa pandemya, marami sa atin ang dedma na sa ibang mga problema gaya ng tambak na basura.

Hangad nating magsilbi itong inspirasyon sa iba pang komunidad upang magpatupad ng mga hakbang na mapakikinabangan ng mas nakararami.

Pero siyempre, kailangang iprayoridad ang ating mamamayan, kaya pakiusap sa mga kinauukulan, kasabay ng pagiging malikhain ay ang kasiguraduhan na matutugunan ang pangangailangan ng taumbayan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Pagkakamali at pagkukulang sa community pantry, ‘wag nang magsisihan!

ni Ryan Sison - @Boses | April 28, 2021

Malaking tulong.

Ito ang dalawang salita na madalas nating naririnig sa ilang mga nakatatanggap ng ayuda mula sa mga nagsulputang community pantry sa iba’t ibang panig ng bansa.

Kahit noodles, itlog, kaunting bigas at delata lamang ay marami sa ating kababayan ang labis na nagpapasalamat dahil kahit paano ay maiibsan ang kanilang kumakalam na sikmura.

Dahil maraming natutulungan, nagsilbi itong inspirasyon sa iba pa nating kababayan na magtayo na rin ng kani-kanilang community pantry upang makapagbigay ng ayuda sa kanilang mga ka-lugar. At hindi lang mamamayan ang game na game tumulong dahil kamakailan, nagtayo rin ng community pantry ang isang aktres.

Bagama’t nakatutuwa na nagsilbi itong inspirasyon para sa iba upang tumulong, nakalulungkot dahil sa kabila ng layuning ito ay may mga pangyayari talagang hindi inaasahan.

Isa na nga rito ang pagkamatay ng isang senior citizen na pumila sa itinayong community pantry ng isang aktres.

Totoo na may mga pagkukulang at pagkakamali, pero hindi na tayo dapat magsisihan. Sa halip, gumawa tayo ng paraan upang hindi na ito maulit dahil sa totoo lang, wa’ ‘wenta naman kung matuturuan pa.

Sa kabilang banda, hangad nating magsilbi itong aral at paalala sa lahat na kahit maganda ang ating intensiyon, dapat pa ring matiyak na talagang makatutulong tayo at hindi magiging sanhi ng panibagong problema.

Gayunman, panawagan natin sa mga kinauukulan, hindi dapat makampante ang gobyerno dahil kumikilos ang taumbayan. Kumbaga, kahit maraming natutulungan, kung tutuusin ay “band-aid solution” lamang ang proyektong ito, kaya dapat pa ring magkaroon ng malinaw at pangmatagalang solusyon ang gobyerno.

Lalo pa’t nakikita nating hindi lahat ng community pantry ay nakasusunod sa health protocols, na puwedeng pagmulan ng panibagong hawaan.

At kapag may biglang tumaas ang COVID-19 cases, sino ang may kasalanan, ang gutom na taumbayan o ang mga nais makatulong?

Napakaraming tanong at dapat gawin, pero hangad nating may matutunan ang bawat isa, gayundin magkaroon ng ideya kung paano mas makatutulong sa taumbayan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

MECQ sa NCR Plus, dapat pa bang palawigin?

ni Ryan Sison - @Boses | April 27, 2021

Ilang araw bago matapos ang modified enhanced community quarantine (MECQ) sa NCR Plus, kani-kanyang pahayag ng opinyon at suhestiyon ang mga ahensiya ng gobyerno, gayundin ang mga eksperto.

Kaugnay nito, nagkakaisa ang mga doktor na huwag munang magluwag ng lockdown restrictions dahil mataas pa rin ang bilang ng COVID-19 cases.

Bagama’t aminado ang ilang ospital na may kaunting pagbabago ang sitwasyon at sinabi rin ni treatment czar at Health Undersecretary Leopoldo Vega na unti-unti nang nag-stabilize ang health care utilization rate sa nakalipas na linggo, ang tanong, kailan masasabing puwede nang magluwag?

Para kay Vega, dapat umanong bumaba sa 3,000 hanggang 4,000 ang bagong kaso ng COVID-19 kada araw. Sa nakalipas na linggo, higit 9,000 ang daily average cases, pero bumaba na rin umano ito mula sa dating halos 11,000.

Matatandaang bandang dulo ng Marso, isinailalim sa enhanced community quarantine (ECQ) ang Metro Manila, Bulacan, Cavite, Laguna at Rizal dahil sa pagtaas ng COVID-19 cases, na naging dahilan ng pagkapuno ng mga ospital. Mula naman Abril 12, ibinaba ito sa mas maluwag na MECQ hanggang Abril 30.

Kasabay ng unti-unting pagbaba ng COVID-19 cases, ‘ika nga, hindi tayo puwedeng makampate, lalo pa’t malapit nang pumalo sa 1 milyon ang mga kaso sa bansa.

Ibig sabihin, kailangan pa ring pagbutihin ng pamahalaan ang pagtugon sa pandemya, kaya naman minungkahi ng OCTA Research Group na dagdagan ang testing sa bansa sa 75,000 mula sa higit 50,000 daily average testing sa kasalukuyan upang madaling mahiwalay at matukoy ang may kaso ng COVID-19, kabilang ang mga asymptomatic o walang sintomas.

Gayunman, habang wala pang pinal na desisyon ang gobyerno sa susunod na quarantine classification, hindi puwedeng maghintay lang tayo bago kumilos. Bilang mamamayan, patuloy tayong sumunod sa minimum health standards, maging mas maingat kung lalabas at iwasang maglakwatsa kung hindi naman essential.

At panawagan sa mga kinauukulan, ikonsidera ang suhestiyon ng mga eksperto dahil sila ang nangunguna sa laban na ito.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com