Nabakunahan vs. COVID-19, ‘wag feeling safe!

ni Ryan Sison - @Boses | May 03, 2021

Dedma na sa health protocols.

Ito ang problema ngayon ng gobyerno matapos makatanggap ng ulat na may mga nabakunahan kontra COVID-19 na hindi na sumusunod sa mga kinakailangang pag-iingat.

Kaya naman, agad na umapela si Health Secretary Francisco Duque III sa mga naturukan ng COVID-19 vaccine na sumunod pa rin sa mga ipinatutupad na health protocols.

Paliwanag ng kalihim, magiging ligtas lamang sa severe conditions ang mga nabakunahan, ngunit hindi pa ganap na makakaiwas sa virus at maaari ring makahawa.

Sa totoo lang, ito ang problema sa ating mga ‘Pinoy. Porke naturukan at alam na malaking bagay ito para makaiwas sa malalang kondisyon, feeling safe na sa virus.

Tulad nga ng sinabi ng kalihim, hindi pa rin garantisadong ligtas sa virus ang mga naturukan, kaya utang na loob, pakitatak ito sa inyong mga kukote.

Samantala, para mapasunod pa rin ang mga naturukan kontra virus, hiling nating magkaroon pa rin ng malawakang information drive, hindi lamang upang mahikayat ang taumbayan na magpabakuna, kundi upang matukoy ang mga dapat at hindi dapat gawin matapos maturukan.

Kaya paalala sa bawat isa — nabakunahan man o hindi — patuloy na sumunod sa mga umiiral na health protocols. Magsuot ng facemask at face shield, tamang social distancing at madalas na pag-sanitize ng mga kamay kapag nasa labas ng bahay.

Mukhang mahaba-haba pa ang ating laban kontra pandemya, kaya habang patuloy itong tinutugunan ng pamahalaan, gawin natin ang ating obligasyon bilang mamamayan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Maraming reklamo sa pamamahagi ng ayuda, nakadidismaya!

ni Ryan Sison - @Boses | May 01, 2021

Habang patuloy ang pamimigay ng one-time ayuda sa mga naapektuhan ng enhanced community quarantine (ECQ) sa mga lugar na kasama sa NCR Plus Bubble, hindi pa rin tapos ang iba’t ibang reklamo ng mga benepisaryo.

Kaugnay nito, sinabi ng Department of the Interior and Local Government (DILG) na higit 23,000 reklamo ang kanilang natanggap hinggil sa distribusyon ng one-time P1, 000 ayuda.

Ayon kay Interior Secretary Eduardo Año, 15,736 sa natanggap nilang 23,292 reklamo ay sumasailalim sa deliberasyon, samantalang ang 3,824 ay naresolba na.

Paliwanag ng kalihim, papasok lang sila sa usapin kung hindi natutugunan ang reklamo at kung kakailanganin ay magsasagawa sila ng kaukulang imbestigasyon.

Kasabay nito, 67% o katumbas ng P15.533 milyon sa higit P22.9 bilyon na inilaan para sa ayuda ang naipamahagi na.

Bagama’t hindi ito ang unang pagkakataon na namahagi ang gobyerno ng ayuda sa mga apektado ng lockdown, nakadidismaya dahil napakarami pa ring reklamo hinggil sa distribusyon.

Kumbaga, sa halip na maayos ang pamamahagi ng ayuda, parang walang kadala-dala kaya heto at sandamakmak pa rin ang reklamong natanggap ng ahensiya.

Hindi natin nilalahat dahil may mga lugar pa ring maayos ang distribusyon kahit pa nagbahay-bahay ang mga lokal na pamahalaan. ‘Yun nga lang, may ilang sablay ang diskarte kaya nauwi sa reklamo.

Gayunman, panawagan sa mga kinauukulan, pakibilis-bilisan ang pagtugon sa mga reklamong ito para mapanagot ang mga dapat managot.

Tutal, may ilang araw pa bago ang deadline ng pamamahagi ng ayuda, hangad nating maging maayos ito at ‘wag umabot sa puntong kailangan pang magreklamo.

At paalala naman sa taumbayan, lalo na sa mga benepisyaryo, ‘pag may nakitang mali, ‘wag matakot magsumbong para maaksiyunan ang ganitong mga isyu.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Mga pasikat at puro boladas na kandidato, ‘wag hayaang maupo sa puwesto!

ni Ryan Sison - @Boses | April 30, 2021

Makalipas ang mahigit isang taong pakikipaglaban natin sa COVID-19 pandemic, napakarami nating natuklasan.

Kabilang na ang kawalan ng maayos na health care system, naaabusong kapangyarihan ng mga nakaluklok sa puwesto, mga wa’ ‘wentang lingkod-bayan at siyempre, nariyan din ang mga talagang handang maglingkod sa kanilang mga nasasakupan.

Pero hindi lang ‘yan, kapansin-pansin din na tila ginagawang stepping stone ng ilan ang kasalukuyang sitwasyon para maitawid ang kani-kanyang layunin — at ‘yan ay ang mangampanya para sa susunod na eleksiyon.

‘Yung akala natin na bukal sa loob na pagtulong sa mga higit na apektado ng pandemya, palabas lang pala para maka-segway. Sinasamantala ang sitwasyon para sa tunay at pansariling layunin.

Paalala lang sa mga todo-pasikat d’yan, nasa kalagitnaan tayo ng pandemya at hindi kampanya. Kaya utang na loob, tigil-tigilan n’yo ang ganyang mga galawan.

Kung gusto ninyong tumulong, gawin nang bukal sa loob at iwasan nang magpa-epal.

Samantala, noong nakaraang taon pa lang, kitang-kita na natin kung sino ang mga may kakayahang maglingkod at ang mga wa’ ‘wentang opisyal ng gobyerno.

Kaya upang hindi na maulit ang ganitong eksena at tuluyan nang masipa sa puwesto ang mga nagmistulang display lang sa gobyerno, dapat nating iluklok sa puwesto ang mga may kakayahang magsilbi sa bayan.

Kaya naman, panawagan sa taumbayan, ngayon pa lang ay mag-isip-isip na kung sino ang dapat paupuin sa puwesto. Gamitin ang internet at iba pang kakayahan para makilala ang mga kandidato at isa pa, hindi porke sikat at maboladas ay iboboto na, dapat du’n tayo sa may “K” talagang maging lider.

Marami kasing lingkod-bayan kuno, pero ‘pag kampanya lang nakikita at ‘pag panahon na ng pangangailangan ay hindi na mahagilap.

‘Ika nga, bilang mamamayan ay may magagawa tayo para matigil ang ganitong sistema sa pulitika. At kung maraming botante ang kikilala sa bawat kandidato, hindi magkakaroon ng “epal” sa gobyerno.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com