Negosyong lumalabag community quarantine, ‘wag nang magpalusot!

ni Ryan Sison - @Boses | May 06, 2021

Kahit anong paalala at babala ng lokal at nasyunal na pamahalaan, hangga’t may pasaway ay hindi mahihinto ang mga ipinagbabawal na gawain habang umiiral ang modified enhanced community quarantine (MECQ) sa NCR Plus bubble.

Kabilang na nga rito ang pagbubukas ng mga resort. Bagay na nilabag ng isang resort sa Calamba, Laguna, kamakailan.

Ayon sa Calamba City Public Order and Safety (POSO), huli sa aktong tumanggap ng mga bisita ang naturang resort kahit bawal pa. Sa pamamagitan ng drone video ng Calamba POSO, kita ang lawak ng resort at dalawang bata na nasa loob ng compound.

Bagama’t hindi itinanggi ng may-ari ng resort na hindi niya kamag-anak ang 20 guests na taga-Parañaque City, nagpalusot pa itong hindi alam na bawal.

Kamakailan, sinubukan ng resort na bigyan ng P5, 000 ang mga tauhan ng POSO para hindi sila hulihin habang may tanggap na bisita pero hindi ito umubra. Ang ending, tiniketan ang resort dahil sa paglabag, gayundin mahaharap sa sanction mula sa city hall.

Hindi na bago ang mga paglabag habang umiiral ang MECQ, pero sa totoo lang, nakadidismaya dahil sa halip na harapin ang parusa ay magpapalusot pa.

Kapag nahuli, maging responsable at ‘wag magmaang-maangan pagdating sa mga umiiral na batas. Ang hirap kasi sa atin, huli na sa akto, pilit pang ilulusot para makaiwas sa responsibilidad.

Panawagan sa mga kinauukulan, ‘wag tayong tumigil magparusa sa mga lumalabag na negosyante. Isa pa, ‘wag magpapasilaw sa pera dahil kung ang bawat paglabag ay dadaanin sa ‘pampadulas’, lalo lang darami ang magpapasaway.

Bagama’t nauunawaan nating gusto ring kumita ng ilang negosyo habang may pandemya, hindi tama na umabot sa puntong may paglabag na magaganap. Tandaan, kailangan pa rin nating iprayoridad ang kaligtasan ng bawat isa.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Patuloy na pagbili ng imported PPEs, dapat lang imbestigahan!

ni Ryan Sison - @Boses | May 05, 2021

Sa kabila ng panghihikayat ng pamahalaan sa local production ng personal protective equipment o PPEs, patuloy pa rin ang gobyerno sa pagbili ng imported PPEs. Bagay na naging dahilan upang lalong malugi ang local manufacturers.

Kaugnay nito, nais maimbestigahan ng Makabayan bloc sa Kamara ang patuloy na pagbili ng gobyerno ng imported PPEs, sa halip na lokal na gawa bansa.

Base sa inihain na House Resolution 1735, inaatasan ang House Committee on Trade and Industry na silipin ang patuloy na pagtangkilik ng gobyerno sa imported PPEs na karaniwang galing sa China, upang malaman ang epekto sa local industry ng pagtangkilik ng pamahalaan sa imported PPEs.

Tinukoy sa panukala na iniulat ng Confederation of Wearable Exporters of the Philippines (CONWEP) na sa 120,000 workers sa local garment industry, aabot sa 25,400 manggagawa ang tinanggal sa trabaho, kung saan 3,500 empleyado rito ay mula sa tatlong kumpanya na ini-repurpose para sa local production ng PPEs.

Matatandaang ipinatawag ng pamahalaan ang CONWEP noong nakaraang taon upang punan ang pangangailangan ng bansa sa medical grade PPEs, kaya agad silang bumuo ng Coalition of Philippine Manufacturers of PPE (CPMP) at namuhunan para sa paggawa ng PPEs na aabot sa P1.7 bilyon.

Sa totoo lang, nakadidismaya dahil palagi nating hinihikayat ang taumbayan na suportahan ang mga gawang lokal bilang tulong sa ekonomiya, gayundin sa ating manggagawa, pero sa kabilang banda ay patuloy namang tumatangkilik ng imported ang gobyerno.

Isa pa, nakababahala dahil kahit alam nating may kakayahan at de-kalidad ang gawang lokal, hindi nila kayang makipagsabayan sa demand ng foreign PPEs na ibinebenta sa murang halaga at ang iba ay substandard. Kumbaga, sayang ang gawang Pinoy kung hindi rin tatangkilikin.

Kung tutuusin nga, ngayon talaga natin dapat suportahan ang gawang lokal dahil sa dami ng nawalan ng trabaho, kung magkakaroon ng mataas na demand sa local PPEs, marami ring oportunidad para kumita.

Kaya panawagan sa mga kinauukulan, imbestigahang mabuti ang isyung ito at tiyaking gobyerno mismo ang unang susuporta sa gawa ng ating mga kababayan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Hawaan sa inuman na nauwi sa lockdown, mga perhuwisyo!

ni Ryan Sison - @Boses | May 04, 2021

Hawaan sa inuman.

Ito ang dahilan para mag-lockdown ang dalawang purok sa Iriga City, Camarines Sur, kamakailan.

Nag-umpisa ang lockdown sa Zone 1 at 3 sa Bgy. Santiago dahil 10 katao ang nagpositibo sa COVID-19 noong Abril 29 dahil nagkaroon ng hawaan sa mga purok nang umuwi roon ang ilang tao na dumalo sa isang inuman at kalauna’y nagpositibo sa COVID-19.

Kaugnay nito, nasa 264 pamilya ang apektado ng lockdown sa naturang barangay, na binibigyan ng lokal na pamahalaan ng suplay ng pagkain.

Kung tutuusin, nakalulungkot dahil maraming pamilya ang apektado dahil lamang sa naganap na inuman, pero no choice kundi mag-lockdown para mapigilan ang posible pang hawaan.

Bagama’t likas sa ating mga Pinoy ang pagha-happy-happy sa kabila ng mga kaganapan sa bansa, ‘wag nating kalimutan ang sitwasyon.

Tulad nito, sampu agad ang nagpositibo sa COVID-19, tapos daan-daang pamilya agad ang nadamay. Ang ending, hindi makalalabas ang mga residente at walang kayod.

‘Ika nga, wala namang masama sa pagsasaya, pero sana ay ‘wag umabot sa puntong makaabala o mandamay tayo ng ibang tao. ‘Yung tipong, party-party ngayon, tapos dedma sa mga puwedeng mangyari sa susunod na araw.

Bilang mamamayan, maging responsable tayo sa mga ginagawa natin. Kaya hangga’t hindi pa tapos ang pandemya, iwasan muna ang hindi mahahalagang ganap, lalo na kung alam ninyong magiging sanhi ito ng hawaan sa inyong lugar.

Isa pa, sa halip na magkusa, kailangan pa yata nating magmakaawa na mag-ingat ang bawat isa para mabawasan ang hawaan.

Kaya pakiusap sa lahat, iwasang magpasaway upang hindi madamay ang mga nananahimik nating kababayan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com