Pagbabakuna sa mga manggagawa, ‘wag nang patagalin!

ni Ryan Sison - @Boses | May 10, 2021

Matapos umakyat ng essential workers sa A4 category ng priority list mula sa B5, pinamamadali ng isang mambabatas ang pamahalaan at business owners ang pagbabakuna sa mga manggagawa.

Paliwanag ng mambabatas, mas matatag na proteksiyon laban sa COVID-19 ang bakuna kumpara sa pamimigay ng ayuda. Gayundin, kung ang lahat umano ng empleyado ay mababakunahan, tiyak na maibabalik ang operasyon ng mga kumpanyang nagsara at pagbabalik-trabaho ng mga manggagawang natigil sa hanapbuhay dahil sa pandemya.

Sa pamamagitan ng mabilis na vaccination rollout sa mga workers, hindi lamang aniya ang mga manggagawa ang maililigtas kundi pati ang kanilang trabaho at pamilya. Bukod pa rito, mabubuksan na muli ang ekonomiya ng bansa.

Totoo na hindi lamang manggagawa ang makikinabang sa mabilis na pagbabakuna dahil kung magkakaroon sila ng sapat na proteksiyon kontra COVID-19, tuluy-tuloy din ang paggalaw ng ekonomiya. Kumbaga, win-win ang resulta.

Sa totoo lang, hindi puwedeng umasa lang sa ayuda ang mga manggagawang apektado ng pandemya dahil ‘ika nga, ‘di naman forever ang ayuda.

Kaya sa halip na umasa lamang dito, mas mabuting matiyak na makapagtatrabaho nang ligtas ang mga manggagawa at walang pangamba sa malubhang epekto ng sakit.

Kaya panawagan sa mga kinauukulan — gobyerno at negosyante man — galaw-galaw para sa ating mga manggagawa. Maraming makikinabang dito kaya dapat lang na bilisan ang pagkilos para sa kaligtasan ng mga empleyado, gayundin para sa pag-usad ng ekonomiya.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Mental health ng mga menor-de-edad, apektado ng pandemya

ni Ryan Sison - @Boses | May 08, 2021

Tunay na sinubok ng pandemya ang bawat aspeto ng ating buhay.

At isa sa mga higit na apektado ay ang mental health ng karamihan, kabilang ang mga menor-de-edad.

Kaugnay nito, sinabi ng National Center for Mental Health (NCHM) na mula Enero hanggang Abril 2021, nakatanggap ang kanilang crisis hotline ng aabot sa 694 tawag mula sa mga nasa age group na 5 hanggang 17-anyos, kung saan nalagpasan umano nito ang 403 tawag na natanggap ng crisis hotline sa nasabing age group mula Marso 17 hanggang Disyembre 2020.

Ibig sabihin, kung noong nakaraang taon ay nasa 1 hanggang 2 tawag kada araw ang natatanggap ng crisis hotline mula sa menor-de-edad, umabot na sa 6 ang average daily calls na natatanggap nitong nakalipas na apat na buwan.

Karaniwan sa mga rason ng pagtawag ang anxiety o depressive symptoms, problema sa pamilya, referral sa psychiatrist o psychologist, problema sa academics, pag-aaral at pag-ibig.

Iba’t ibang intervention ang ibinibigay sa callers tulad ng psychological first aid at suicide prevention. Gayunman, ang ibang caller ay kailangan lamang umano ng kausap.

Sa kabuuan, umaabot na sa 5,511 ang tumawag sa crisis hotline NCMH mula Enero hanggang Abril 2021, kasama ang mga kabataan ang mga nasa hustong gulang.

Ang pagtaas ng bilang ng callers ay patunay na marami tayong kababayang nais magkaroon ng malalapitan sa mga panahong ito. Isa pa, malaking tulong ito sa mga menor-de-edad na problemado sa mental health, lalo na kung walang mahingan ng tulong sa pamilya.

Pero siyempre, hindi lang ang mga eksperto ang makatutulong sa mga kabataang may problema sa mental health kundi maging tayo rin.

Bilang kapamilya o kaibigan, ‘wag nating kalimutang kumustahin ang ating mga kaibigan at mahal sa buhay kung mayroon tayong pagkakataon. Simpleng bagay lang ito kung tutuusin, pero napalaking tulong sa bawat isa.

‘Ika nga, lahat tayo ay may pinagdaraanan, kaya sa panahon ng pandemya, piliin nating maging mabuti sa lahat ng tao — kakilala man o hindi.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Pag-aayos ng ordinansa vs. ‘di pagsusuot ng facemask, now na!

ni Ryan Sison - @Boses | May 07, 2021

Matapos ang utos ni Pangulong Rod­rigo Duterte na arestuhin ang mga indibid­wal na hindi nagsusuot ng facemask habang nasa pampublikong lugar, aayusin din ng Department of the Interior and Local Government (DILG) ang mga ordinansang inaprubahan ng mga local government units (LGUs).

Paliwanag ni DILG Undersecretary Jonathan Malaya, makikipagpulong sila sa Philippine National Police (PNP) para tuku­yin ang parameters ng bagong direktiba ng Pangulo.

Bagama’t magkakaiba ang penalties na ipinapataw ng LGUs laban sa mga lumalabag sa ordinansa hinggil sa pagsuot ng face­masks, sa kasalukuyan ay maaari lamang arestuhin ang indibidwal na lumabag kung hindi ito susunod sa mga pulis.

Kung tutuusin, matagal nang mandatory ang pagsusuot facemask, lalo na kapag nasa labas ng bahay, kaya nakadidismaya dahil hanggang ngayon ay marami pa ring lumalabag dito. At kung naka-facemask man, madalas itong hindi isinusuot nang tama.

Hindi na nga dapat magkaroon ng ordi­nansa para lang magsuot ng facemask ang mga tao dahil sa totoo lang, dapat kusa na itong ginagawa. Pero dahil may mga kababa­yan tayong pasaway sa kabila ng mga paalala at babala, no choice kundi parusahan para magtanda.

Kaya pakiusap sa taumbayan, ‘wag nang hintaying masampulan bago pa sumunod sa ordinansa.

Isa pa, kahit paulit-ulit na, panawagan sa gobyerno, ‘wag tayong mapagod magpaalala at magturo ng kahalagahan ng tamang pagsusuot ng facemask.

Gayunman, hangad nating pag-aralang mabuti ang direktiba ng Pangulo kung kailangan ba talagang umabot sa pang-aaresto dahil sa ganitong uri ng paglabag.

At habang isinasaayos ang mga umiiral na ordinansa hinggil sa pagsusuot ng facemask, mahalaga ring maipaunawa natin sa taumbayan na hindi lang nila ito dapat gawin para sa kanilang sarili kundi maging sa kaligtasan din ng ating kapwa.

Kung sa simpleng pagsusuot pa lang ng facemask ay ligwak na tayo, paano pa natin matatalo ang hindi nakikitang kalaban?

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com