Mga may karamdaman, ‘wag nang payagang magmaneho!

ni Ryan Sison - @Boses | May 13, 2021

Talagang walang pinipiling tao at pagkakataon ang aksidente.

At madalas, sa kalsada ito nangyayari kung saan ang kadalasang sangkot ay motorista.

Pero paano kung ang drayber na sangkot ay may karamdaman pala?

Kaugnay nito, nahati ang katawan ng isang siklista sa Meycauayan, Bulacan matapos masagasaan ng isang AUV, kung saan bukod sa biktima, may apat pang rider na nasugatan.

Habang nasa kustodiya na ng pulisya ang driver ng AUV, na isang dating barangay captain, sinabi nitong umatake ang kanyang epilepsy habang nagmamaneho at handa itong mabayad ng danyos sa mga biktima.

Samantala, sa San Jose del Monte City, Bulacan naman, dalawa ang nasawi at marami ang sugatan nang araruhin ng dump truck ang pila ng mga kukuha ng ayudang pinansiyal sa lungsod.

Nangyari ang aksidente matapos atakihin sa puso ang 57-anyos na drayber ng trak, na empleyado ng city hall.

Sa totoo lang, nakalulungkot dahil may mga ganitong insidente, na sana’y naiwasan kung nasa maayos na kondisyon ang drayber. Bagama’t aksidente at wala namang may gusto ng nangyari, hindi puwedeng hayaan na lang dahil dapat nating matiyak na hindi na ito mauulit.

Panawagan sa mga kinauukulan, sa pagkuha ng lisensiya, tingnan at suriin din ang medical history ng aplikante. Hindi ‘yung marunong lang humawak ng manibela, solb na.

Isa pa, kapag may karamdaman, hindi na dapat payagang magmaneho. Bukod sa puwede silang mapahamak, malalagay din sa peligro ang iba pa nating kababayan tulad ng nangyari sa mga naturang insidente.

At kayong mga naghahangad magka-lisensiya, tandaan na ang pagmamaneho ay hindi lamang pribilehiyo dahil kapalit nito ay responsibilidad, hindi lamang sa inyong sarili kundi maging sa inyong kapwa motorista.

Bago sumabak sa biyahe, tiyaking nasa kondisyon ang inyong katawan dahil kung hindi, malamang na hindi lang kayo ang mapahamak dahil posible rin kayong makapandamay.

Hangad nating magsilbi itong aral at paalala sa lahat na napalaking responsibilidad ng pagkakaroon ng lisensiya. Kaya upang hindi na maulit ang ganitong insidente, siguro nga, dapat lang na taasan pa ang pamantayan sa pagkuha ng lisensiya para makapagmaneho.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Pambubugbog sa cameraman ng mga dumagsa sa resort, dapat ding aksiyunan

ni Ryan Sison - @Boses | May 12, 2021

Hindi pa rin humuhupa ang isyu ng pagbubukas ng isang resort sa Caloocan City sa kabila ng umiiral na modified enhanced community quarantine (MECQ), kung saan hindi bababa sa 100 katao ang dumagsa rito.

Marami ang nadismaya dahil sa anila’y kapabayaan ng may-ari at pagpapasaway ng mga dumagsa. Gayundin, maraming dedma na lang dahil ‘ika nga, sadyang pasaway ang mga Pinoy.

Kaugnay nito, viral din ang isang TV cameraman na umano’y binugbog ng tatlo katao na kabilang sa mga pumunta sa resort.

Base sa ulat, duguan ang mukha ng cameraman dahil sa tinamong sugat matapos pagtulungan ng tatlo katao. Kuwento ng biktima, hawak niya ang camera at kinukuhanan ng video ang maraming tao na pumunta sa resort. Nang makita niya ang isang jeep na puno ng pasahero, sinundan niya ito at doon na nangyari ang pananakit sa kanya.

Depensa ng isa sa mga suspek, dinunggol umano ng biktima ang camera sa kapatid nito, ngunit itinanggi ng cameraman ang alegasyon.

Sa totoo lang, nakadidismaya at nakakagalit dahil umabot sa puntong may nasaktan dahil sa pagpapasaway ng ilan nating kababayan. Anuman ang rason, hindi tama na manakit ng kapwa, lalo na kung ginagawa lamang nito ang kanyang tungkulin. Isa pa, kapag kayo ang may mali, maging responsable kayo.

Samantala, panawagan sa mga kinauukulan, panagutin ang mga dapat managot sa nangyaring paglabag at pananakit sa cameraman. Dahil kung tutuusin, walang ganitong insidente kung sa umpisa pa lang ay wala nang nilabag na quarantine protocols.

Kung bukas-makalawa ay makikita n’yo sa balita ang inyong mga mukha, ‘yan ay dahil sa inyong kapabayaan at kabiguang sumunod sa mga umiiral na protocols.

Hindi nagkulang ang pamahalaan at mga awtoridad sa pagpapaalala ng mga dapat at hindi dapat gawin, pero dedma kayo. At ngayong umaaksiyon ang media, dadaanin n’yo sa pananakit tapos magdudulot pa ng perhuwisyo.

Hangad nating magsilbi itong paalala sa lahat na maging responsible tayo sa bawat ginagawa natin. Dahil kapag nagkasakit tayo dahil sa ating kapabayaan, walang ibang dapat sisihin kundi tayo rin.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Mga gumagawa ng fake kidnapping at ibang prank, dapat lang masampolan

ni Ryan Sison - @Boses | May 11, 2021

‘Pekeng kidnapping’.

Ito ang paraan ng isang magkasintahan upang magkasama muli. Pero paano kung diskarte ng magkasintahang ito ay magiging sanhi pala ng takot at perhuwisyo sa publiko?

Kamakailan, na-‘hulicam’ ang pagdukot sa isang babae sa Baguio City. Base sa CCTV footage, makikitang naglalakad ang 30-anyos na babae kasama ang dalawang kaibigan. Habang naglalakad, isang van ang huminto sa tabi nila at sinunggaban ang biktima.

Dahil sa takot, agad na ini-report ng dalawang kaibigan ang insidente sa pulisya, na agad nagkasa ng operasyon upang mahanap ang itim na van. Gayunman, napag-alamang ang nangyaring pagdukot ay peke.

Base sa imbestigasyon, ang may pakana ng kunwaring pangingidnap ay mismong biktima at kasintahan nitong bagong laya matapos makulong dahil sa droga. Tutol umano ang pamilya ng babae sa kanilang relasyon, kaya naisip nila ang pangingidnap upang magkasama muli.

Samantala, hindi nagustuhan ng mga kaibigan ng biktima ang nangyari dahil nagdulot umano ito ng takot at trauma sa kanila, kaya naman desidido ang pulisya na sampahan ng kaso ang magkasintahan.

‘Ika nga, lahat ay gagawin para sa pag-ibig, pero utang na loob, iwasan n’yong mandamay ng ibang tao. Kung tutuusin, sayang ang resources at oras ng kapulisan. Sa halip na tumutugon ang mga ito sa iba pang insidente o kaganapan, nagsayang lang ng oras sa pekeng kidnapping. Dagdag pa ang panic at takot na idinulot nito sa publiko.

Kaya panawagan sa lahat, iwasan ang mga ganitong gawain dahil walang maidudulot na maganda. Sabi nga, iwasan nating maging abala o perhuwisyo sa isa’t isa.

At pakiusap sa mga awtoridad, patuloy na parusahan ang mga pasaway d’yan dahil hindi biro ang epekto ng ganitong mga pakulo, hindi lamang sa mga naka-engkuwentro ng pangyayari, kundi maging sa iba pa nating kababayan.

Dapat nating ipakita na seryoso tayo at kaya nating panagutin ang mga dapat managot.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com