Mga aplikante ng trabaho, ‘wag piliting magpabakuna!

ni Ryan Sison - @Boses | May 18, 2021

Sa dami ng Pinoy na nawalan ng trabaho dahil sa pandemyang dala ng COVID-19, marami pa rin ang umaasang makakayod.

Kaya naman sa kabila ng panganib at takot na mahawa ng virus, todo-sikap pa rin ang marami nating kababayan na makahanap ng trabaho.

Kaugnay nito, inihayag ng Department of Health (DOH) na hindi dapat gawing requirement sa mga nag-a-apply ng trabaho ang bakuna kontra COVID-19.

Paliwanag ni Health Undersecretary Maria Rosario Vergeire, kahit mahalaga ang bakuna, dapat lamang na maging boluntaryo ito para sa isang indibidwal.

Ang paalalang ito ay kasunod ng ulat na kabilang sa company policy ng US-based Delta Air Lines ang COVID-19 vaccination para sa mga bagong empleyado.

Bagama’t nauunawaan nating malaki ang magagawa ng bakuna kontra COVID-19, dapat din nating ikonsidera ang sitwasyon ng bawat aplikante. Paano kung ang aplikante ay walang access sa bakuna? O, ‘yung iba naman ay hindi pa kumpiyansang magpabakuna?

Ilan lang ito sa mga dapat nating ikonsidera kaya hindi pa talaga uubra ang ganitong requirement.

Matatandaang sinabi ng DOH na wala pang sapat na ebidensiya na ang mga bakunado na ng 2 doses ay hindi na mahahawaan ng nasabing virus. Sa ngayon, tinitiyak lamang ng bakuna na maiiwasan ang malalang kaso ng COVID-19, na nauuwi sa hospitalisasyon at pagkamatay.

Kamakailan din ay tinutulan ng DOH ang hiling ng ilang negosyante na magpatupad ng “vaccine pass” sa mga nakatanggap na ng 2 doses ng COVID-19 vaccine, kung saan magsisilbing special permit ang vaccine pass para payagan ang mga nakakumpleto na ng bakuna na makapanatili ng matagal sa mga establisyemento.

Samantala, panawagan natin sa mga negosyante, makinig tayo sa payo ng kagawaran.

Bagama’t nauunawaan nating nag-iingat lamang ang karamihan sa atin, iwasan nating pahirapan ang ating mga kababayan na ang nais lamang ay magkaroon ng hanapbuhay sa gitna ng pandemya.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

P-Duterte: LGUs na magpapa-piyesta, lagot!

ni Ryan Sison - @Boses | May 15, 2021

Mula ngayong araw, balik na sa general community quarantine (GCQ) with ‘heightened restrictions’ ang Metro Manila at mga kalapit-lalawigan, habang ang maraming lugar naman sa bansa ay nasa modified general community quarantine (MGCQ).

Kasabay ng pagbaba ng quarantine restrictions ang babala ni Pangulong Rodrigo Duterte sa mga lokal na opisyal sakaling magkaroon ng anumang pagdiriwang ng pista dahil sila umano ang dapat managot sa posible pang pagkalat ng COVID-19.

Samantala, base sa datos ng Department of Health (DOH), mayroong pagbaba ng COVID-19 cases matapos ang surge noong Abril.

Sa kabila nito, sinabi ng DOH na ang pagbaba ng mga naitatalang kaso sa mga nakalipas na linggo ay maaaring maiugnay sa pagkaunti ng samples na natatanggap ng testing laboratories, gayundin ang hindi pagbibigay ng data sa oras ng mga laboratory.

Sa totoo lang, sobrang hilig nating mga Pinoy sa pagtitipun-tipon tuwing may okasyon, kaya naman kahit may pandemya, malamang na marami pa ring didiskarte para kahit paano ay makapagdiwang.

Gayunman, paalala na hindi porke ibinaba ang quarantine restrictions at may pagbaba ng COVID-19 cases ay relaks na rin tayo.

Tandaan na may virus pa rin sa ating paligid at kasabay nito ang mahigpit pa ring pag-iingat kontra sa sakit upang mabawasan ang hawaan.

At ngayong Pangulo na ang nagbabala, siguro naman, lahat ay susunod na. Panawagan natin sa mga lokal na pamahalaan, maging responsable kayo sa inyong mga nasasakupan.

Tiyaking walang paglabag na magaganap dahil kung mayroon, kayo rin ang mananagot.

Kaya naman panawagan sa mga awtoridad, patunayan n’yong hindi lang puro babala ang inyong ginagawa, kumbaga, ipakita ninyong kaya n’yong panagutin ang mga dapat managot.

Pakiusap sa lahat, tiis-tiis muna kung walang mga pista at iba pang pagdiriwang. Sa ngayon, iprayoridad natin ang pagsunod sa mga umiiral na health protocols upang maiwasan ang hawaan ng virus.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Slot for sale sa COVID-19 vaccine, bawal!

ni Ryan Sison - @Boses | May 14, 2021

Kasabay ng pagdating ng mga bakuna kontra COVID-19 sa bansa ang pagpapatuloy ng vaccination program ng pamahalaan.

Kani-kanyang diskarte na rin ang mga local government units (LGUs) para mabakunahan ang nasa priority list ng Department of Health (DOH) na kabilang sa A1, A2 at A3 categories na siyang mga pinakadelikado at lantad sa virus.

Ngunit sa kabila ng mahigpit na pagsunod ng LGUs sa priority list, talagang may ilan tayong kababayan na atat mabakunahan.

Kaugnay nito, kamakailan ay nagbabala ang Pamahalaang Lungsod ng Taguig sa publiko na mag-ingat sa mga taong nais pagkakitaan ang vaccination program.

Ang babala ay kasunod ng ulat na natanggap ng pamahalaan hinggil sa modus na pag-aalok ng slot para sa pagpapabakuna sa pamamagitan ng social media at panghihingi ng bayad.

Paglilinaw ng LGU, ang may mga kumpirmadong slot lamang mula sa Taguig City Health Office ang maaaring mabakunahan sa vaccination site.

Bagama’t hindi talaga nawawala ang posibilidad na may manamantala sa vaccination program, nakadidismaya dahil heto at nangyayari na pala.

Kung tutuusin, ito ang mga nais nating maiwasan dahil ‘ika nga, kahit ano’ng kalamidad at kahit pandemya pa ‘yan, talagang may nananamantala.

Totoong madiskarte tayong mga Pinoy, pero utang na loob, gamitin ito nang tama at iwasang manlamang ng kapwa. Hindi na nga kayo nakatutulong sa pandemya, dagdag-problema pa.

Kaya paalala sa taumbayan, huwag basta maniwala sa mga ganitong alok. Tiyakin munang lehitimo ang impormasyon bago maniwala.

Samantala, panawagan sa mga kinauukulan, tugisin at tiyak na maparurusahan ang mga nasa likod ng modus na ito dahil hindi puwedeng mapakinabangan ng mga kawatan ang ganitong gawain.

Tandaan na nasa kalagitnaan tayo ng laban kontra pandemya, kaya sa halip na maglamangan, kailangan nating magtulungan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com