Mga sangkot sa mass gathering, panagutin!

ni Ryan Sison - @Boses | May 21, 2021

Sa kabila ng babala ni Pangulong Rodrigo Duterte sa mga lokal na opisyal na sila ang mananagot ‘pag nagkaroon ng pagdiriwang ng pista sa kanilang nasasakupan, mayroon pa ring naganap na selebrasyon kamakailan.

Kaugnay nito, pinaiimbestigahan na ni Parañaque City Mayor Edwin Olivarez ang naganap na pagdiriwang ng kapistahan sa Baclaran noong Lunes, upang matukoy ang mga sangkot sa mass gathering sa naturang piyesta.

Ang imbestigasyon ay kasunod ng pagkalat ng ng video ng ilang kabataang sumali sa palaro nang hindi nakasuot ng facemask.

Makikita sa video ang mga menor-de-edad na magkakadikit ang mga mukha, habang ang mga nanonood ay hindi nakasuot ng facemask at walang social distancing.

Samantala, ayon sa mga awtoridad, masasampahan ng kasong paglabag sa Article 151 ng Revised Penal Code for disobedience to person in authority in relation to Executive Order 35, at sa city ordinances and executive orders ng lungsod ang mga matutukoy sa nasabing paglabag.

Giit ng barangay chairman, wala silang natanggap na ulat hinggil sa nakunan ng video at nag-ikot naman aniya sa mga lugar ang ilang opisyal ng barangay at nagpaalala na walang gagawing pagtitipun-tipon at mga aktibidad para sa kapistahan.

Habang iniimbestigahan ang insidente, hangad nating ‘wag nang maulit ito.

Matagal nang ipinagbabawal ang mass gathering dahil sa pandemya, kaya utang na loob, ‘wag n’yo nang hintaying magmakaawa pa ang mga awtoridad para lang sumunod kayo.

Hindi lang ito ang naiulat na mass gathering sa mga nakalipas na araw dahil matatandaang nagkaroon din ng “street boxing” sa Tondo, Maynila kung saan nasa edad 16 hanggang 18 ang mga lumahok at maraming nanood.

Nakadidismaya dahil kaluluwag lang ng quarantine restrictions, pero heto at sunud-sunod pa ang mga naiuulat na pagpapasaway ng ilan nating kababayan.

Panawagan sa mga awtoridad, ‘wag nang patagalin ang imbestigasyon para malaman kung sino ang mga dapat managot. Kasunod nito, tiyaking matutunton ang mga nasa video upang maisailalim sa testing at monitoring.

Isa pa, kung mapatutunayang may kapabayaan ang mga lokal na opisyal, tiyaking mapapanagot ang mga ito upang magtanda.

Sa panahon ngayon, kailangan natin ng gawa at hindi lang puro babala. Hindi tayo dapat makampante dahil nar’yan pa rin ang virus sa paligid.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Pagdagsa sa vaccination centers, ‘di na dapat maulit

ni Ryan Sison - @Boses | May 20, 2021

Upang maiwasan ang pagdagsa ng mga nais magpabakuna kontra COVID-19, tinitiyak ng bawat vaccination centers sa iba’t ibang panig ng bansa na magkaroon ng limit ng babakunahan kada araw.

Ang siste, kailangan munang magparehistro online o sa bawat barangay, saka maghihintay ng schedule kung kailan tuturukan.

Ngunit kamakailan, tila hindi ganito ang nangyari sa ilang vaccination center sa Metro Manila kung saan dumagsa ang mga nais magpa-schedule o magpaturok.

Kaugnay nito, pinaalalahan ng health experts ang publiko na magparehistro muna bago pumunta sa vaccination centers. Gayundin, hinihikayat ng mga eksperto ang mga Pilipino na kunin ang anumang available na bakuna kontra COVID-19 dahil lahat ito ay epektibo at aprubado ng Food and Drug Administration (FDA).

Sa totoo lang, nakatutuwa na mas marami na tayong kababayan na nais magpabakuna, pero utang na loob, tiyakin nating tama ang bawat hakbang na ginagawa natin bago magpaturok.

Tulad ng nangyari kamakailan na karamihan sa mga pumunta sa vaccination centers ay nag-walk-in o pumila kahit hindi naka-schedule, na naging dahilan upang umuwi na lamang ang ilang senior citizens at persons with comorbidity.

Samantala, pakiusap sa mga lokal na pamahalaan, kasabay ng paghikayat sa ating mga residente na magpabakuna, tiyaking hindi na mauulit ang ganitong eksena. Baka sa halip na proteksiyon kontra virus ang makuha ng mga residente ay makasagap pa ng ibang sakit.

Panawagan naman sa ating mga kababayan, kung gustong magpabakuna, matuto rin tayong sumunod sa mga hakbang na itinakda ng gobyerno. ‘Pag sinabing bawal ang walk-in, bawal.

Kung patuloy na daragsa ang mga nais magpabakuna sa vaccination centers, panibagong sakit ng ulo ito sa ating LGUs.

‘Ika nga, maging tulong tayo sa bawat isa, at ang pagsunod sa mga hakbang at panuntunang itinakda ng pamahalaan ang isa sa ating malaking ambag sa laban na ito.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Protocols sa tamang handling ng COVID-19 vaccine, iwas-tapon at sayang

ni Ryan Sison - @Boses | May 19, 2021

Pagdating ng mga bakuna sa bansa, dapat matiyak na ligtas itong matatanggap, maitatabi at maipamamahagi sa mga lokal na pamahalaan.

At ang mga lokal na pamahalaan naman ang responsable sa tamang paghawak ng mga ito hanggang sa maiturok sa mga residente.

Kaugnay nito, hinimok ng mga senador ang Department of Health (DOH) na bumuo ng malinaw na protocol kung paano iingatan ang bakuna pagdating sa local level.

Paliwanag ng isang mambabatas, makatutulong kung may checklist at briefer hinggil sa tamang paghawak ng bakuna mula sa pagbiyahe hanggang sa maiturok ito dahil mahalaga umanong matiyak ang kalidad ng bakuna at masunod ang deadline, pati na ang paglalabas ng mga ito mula sa freezer.

Matatandaang mahigit 7,000 AstraZeneca vaccines ang kinailangang bawiin dahil sa isyu sa handling ng LGUs.

Kung magkakaroon ng kapabayaan sa handling ng mga bakuna dahil sa kawalan ng malinaw na protocol, malamang na walang makikinabang nito. At sa halip na maiturok agad sa mga residente, baka panibagong problema pa ang dala nito.

Kaya naman dapat lang magkaroon ng maayos at malinaw na panuntunan pagdating sa pag-iingat ng mga bakuna. Sa totoo lang, hindi biro ang gastos ng gobyerno para rito kaya dapat lang na matiyak nating maitatabi ito nang maayos upang maiturok nang ligtas sa mamamayan.

Samantala, pakiusap sa mga kinauukulan, pakinggan ang suhestiyong ito ng ating mambabatas. Sa pagkakataong ito, dapat nating matiyak na naiingatan ang bawat bakunang natatanggap natin. Hindi ‘yung pagkatanggap, kani-kanya na ang LGUs at kapag may nagpabaya, sayang ang bakuna.

At habang patuloy ang pagdating at pamamahagi ng mga bakuna, pakiusap natin sa lahat — nasyonal o lokal na pamahalaan man — maging responsable tayo sa lahat ng hakbang para sa kaligtasan ng ating mamamayan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com