Mga komyuter, ‘di lang sa COVID-19 dapat protektahan kundi pati sa mga kawatan

ni Ryan Sison - @Boses | June 05, 2021

Hindi na bago sa atin ang maka-engkuwentro ng mga nanlilimos sa mga kalsada at pampublikong transportasyon.

Ngunit kamakailan, hindi lamang basta nanlilimos ang na-engkuwentro ng ilang komyuter dahil ang namamalimos, may dala pang kutsilyo at nagbabanta sa mga pasahero.

Ang insidente ay naganap noong Lunes, Mayo 31, sa bahagi ng Ortigas Avenue Station ng EDSA Carousel.

Base sa ulat, ipinagbigay-alam ng mga pasahero na naghihintay ng bus sa naturang istasyon sa security personnel na may lalaki na may saklay ang nagbabanta sa kanila gamit ang kutsilyo at nanghihingi ng pera.

Agad na pinuntahan ng Interagency Council for Traffic (I-ACT) personnel ang lalaki para paalisin, ngunit habang papalapit, sinubukan nitong harangin ang mga bus, naitumba ang saklay at tumakbo patungo sa personnel habang hawak ang kutsilyo.

Napag-alaman ding pagala-gala ang lalaki sa iba pang istasyon kung saan nangha-harass ng komyuter at ginagambala ang bus operations.

Kaugnay nito, umapela si Transportation Secretary Arthur Tugade sa I-ACT at PNP-HPG na paigtingin ang security measures sa EDSA Carousel upang mabigyan ng proteksiyon ang mga komyuter. Kasabay nito ang paghikayat sa mga komyuter na maging mapagmatyag at agad na i-report sa mga awtoridad ang kahina-hinalang aktibidad.

Bagama’t normal nang makakita ng ilang nanlilimos sa mga pampublikong transportasyon, nakaaalarma na mayroong ganitong insidente.

Kung hindi nai-report sa personnel, posibleng may mapahamak o masaktang komyuter.

Kaya dapat lang na higpitan pa ang seguridad, hindi lamang sa EDSA Carousel kundi pati sa iba pang pampublikong transportasyon.

Sana’y magsilbing paalala ang insidenteng ito sa mga kinauukulan na hindi lamang sa COVID-19 dapat protektahan ang mga pasahero dahil kailangan din nila ng proteksiyon laban sa masasamang loob.

Tandaan na karapatan ng bawat isa ang magkaroon ng ligtas at payapang biyahe patungo sa kani-kanilang destinasyon.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Ilegal na bentahan ng gamot online, dapat ding tutukan

ni Ryan Sison - @Boses | June 04, 2021

Ngayong pandemya, kani-kanyang diskarte ang ating mga kababayan para maipagpatuloy ang kani-kanilang hanapbuhay at kahit paano ay makaraos ang araw-araw na gastsuin.

Isa na nga rito ang pag-o-online selling ng iba’t ibang produkto. At ngayon, pati ang mga vitamins, antibiotics at iba pang gamot ay ibinebenta na rin online.

Pero ang tanong, ang lahat ba ng ito ay ligtas inumin at legal na ibinebenta?

Noong Mayo 28, nasa 4,000 consumer complaints tungkol sa online transactions ang natatanggap ng Department of Trade and Industry (DTI), kung saan kasama na rito ang pagbebenta ng mga gamot.

Paliwanag ng DTI, kailangang may pisikal o aktuwal na tindahan at lisensiyado ang online seller.

Sa ilalim ng circular ng Food and Drug Administration (FDA), dapat may certificate of medical device notification, certificate of product registration at license to operate ang mga gustong magbenta ng mga gamot at medical device online.

Samantala, ayon sa Department of Health (DOH), upang makakuha ng license to operate, dapat may trained pharmacist ang drugstore.

Gayunman, paalala ng mga awtoridad, maaaring makulong nang mula 5 hanggang 15 taon at pagmultahin mula P5,000 hanggang P2 milyon ang mga online seller na mahuhuling nagbebenta ng mga gamot at food supplement nang walang permit.

Kung tutusin, noon pa ay mayroon nang online selling ng mga gamot, pero dahil mas marami nang tumatangkilik sa online selling ngayong pandemya, dapat nating matiyak na lahat ng produktong ibinebenta online ay ligtas, lalo na kung ito ay gamot.

‘Yung iba naman kasi sa atin, dedma na kung safe o hindi, basta lang makatipid. Tapos ang ending, panibagong problema pa dahil peke pala ang nabili.

Malamang, marami pa riyang kumakapit sa ganitong gawain, kaya pakiusap sa mga awtoridad, aksiyunan ang lahat ng reklamo hinggil sa mga pekeng produkto, partikular ang mga pekeng gamot. Isa pa, tiyaking mananagot ang mga ito ‘pag napatunayang ilegal ang ginagawang pagbebenta.

Hindi lamang panloloko sa mga konsumer ang ginagawa ng mga ito dahil maaari ring malagay sa panganib ang kalusugan ng sinumang iinom ng mga gamot na ito.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Police scalawags, pagsisipain sa puwesto!

ni Ryan Sison - @Boses | June 03, 2021

Matapos ang magkakasunod na insidenteng kinasasangkutan ng ilang pulis, heto at may panibago na namang pulis na buking sa pangongotong sa PNP applicant.

Kamakailan, timbog ang isang pulis na driver ng ambulansiya ng PNP Health Service na nangongotong ng P100,000 sa isang police applicant sa ikinasang entrapment operation sa Caloocan City.

Ang entrapment operation ay kasunod ng reklamo ng isang aplikante na hinihingan umano ng P100,000 ng suspek upang maproseso ng PNP recruitment.

Gayunman, hindi ito ang unang pagkakataon na nahuli ang suspek dahil napag-alaman na nagkaroon na ito ng kaso noong Abril 2020 na nag-ugat din sa reklamo ng PNP applicant.

Pinangakuan umano ng suspek ang mga aplikante na may problema sa kalusugan na makakapasa sa medical examination kapalit ng P100,000 hanggang P150,000 na bayad.

Nakaaalarma dahil kung ang suspek ay nahuli na noon at nagawa pang umulit ngayon, ano pang susunod na gagawin nito? Malamang, mayroon itong kasabwat at kailangan din itong tutukan ng mga awtoridad.

Panawagan sa mga kinauukulan, linisin ang hanay ng kapulisan sa lalong madaling panahon. Sila dapat ang nangunguna sa pagpapanatili ng peace and order, at hindi ‘yung ugat ng panibagong sakit ng ulo.

At ngayong patuloy ang recruitment sa PNP, tiyaking hindi nadaan sa ganitong modus ang mga aplikante. Kumbaga, siguraduhing may “K” magsilbi sa bayan ang mga matatanggap at hindi ‘yung mga may “lagay”.

‘Ika nga, panahon na para sipain ang mga “police scalawags” at palitan ng mga matitino at mapagkakatiwalaang pulis.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com