Basura palit grocery items kontra baha, ayos!

ni Ryan Sison - @Boses | June 12, 2021

Ngayong tag-ulan, kani-kanyang diskarte ang mga ahensiya ng gobyerno at ilang lokal na pamahalaan para maiwasan ang pagbaha na dulot ng malalakas na ulan.

Kaya naman naglunsad ng proyekto ang Metropolitan Manila Development Authority (MMDA) kung saan maaaring ipagpalit ng mga residente ang kanilang basura para sa grocery items.

Layon nitong matugunan ang problema sa basura sa Metro Manila, na maaaring maging sanhi ng pagbaha ngayong panahon ng tag-ulan.

Sa ilalim ng proyekto, puwedeng ipalit ng mga residente ang kanilang mga basura tulad ng bote at diyaryo para sa essential goods tulad ng de-lata, bigas at noodles.

Ang siste, ang mga tauhan ng barangay mismo ang pupunta sa mga bahay at iko-convert ang basurang ibibigay nila sa points, na siyang ipambibili ng mga produkto. Pagkatapos nito, magtatakda ng schedule ang barangay para sa pagpapalit ng basura at may passbook din ng grocery points na ibibigay sa mga residente.

Bukod pa rito, magsasagawa rin ng seminar ang ahensiya para ituro ang tamang composting na makatutulong din sa waste management ng mga lokal na pamahalaan.

Ngayong umpisa na ang tag-ulan, simula na rin ng kalbaryo na dala ng mga pagbaha sa iba’t ibang lugar. At ang isa ngang rason ng baha ay ang mga basura, kaya naman masasabing napapanahon ang proyektong ito para maiwasan ang pagbaha.

Isa pa, sa halip na ibalagbag ng mga residente ang basura, mas magiging responsable ang mga ito. Bukod sa mga mapananatili ang kalinisan ng kapaligiran, may makukuha pa silang grocery items na malaking pakinabang upang maibsan ang gutom. Kumbaga, win-win ang hakbang na ito dahil hindi lamang kalikasan ang makikinabang dahil ang mamamayan ay ganundin.

Kung tutuusin, matagal nang problema ang basura sa bansa, pero dahil kulang tayo sa diskarte upang madisiplina ang taumbayan, hirap tayong solusyunan ito.

Hangad nating makatulong ang proyektong ito upang mas maging disiplinado ang bawat isa at tuluyan nang matuldukan ang problema sa basura.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Bgy. officials na bigong pumigil sa mass gathering, dapat lang sampolan

ni Ryan Sison - @Boses | June 11, 2021

Responsibilidad ng mga punong barangay na mapanatili ang kaayusan at kapayapaan sa kanilang nasasakupan.

At sa panahon ng pandmeya, nadagdagan pa ang kanilang tungkulin dahil kailangan ding matiyak na sumusunod ang kanilang mga residente sa mga umiiral na health protocols kontra COVID-19.

Kabilang na rito ang pagtiyak na walang magaganap na mass gathering, na maituturing na “super-spreader” event kung saan posibleng magkaroon ng hawaan ng COVID-19.

Ngunit kung mabibigo ang mga punong barangay na pigilan ang mass gathering sa kanilang nasasakupan, nagbabala si Pangulong Rodrigo Duterte na ipaaaresto at pakakasuhan niya ang mga ito.

Kaugnay nito, inanunsyo ni Department of the Interior and Local Government (DILG) Secretary Eduardo Año na mas marami pang mga opisyal ng barangay ang sinampahan ng kaso dahil sa kabiguang ipatupad ang minimum health protocols na itinakda ng Inter-Agency Task Force (IATF).

Base sa ulat ng kalihim, sa kabuuan ay 613 ang nahuli dahil sa mass gatherings at 579 sa kanila ang pinagsabihan, 28 ang pinagmulta at anim naman ang kinailangang mag-community service.

Sa totoo lang, nakadidismaya dahil sa kabila ng mahabang panahon ng pakikipaglaban sa pandemya, tila hindi pa rin alam ng ilang opisyal ang dapat gawin sa kanilang nasasakupan.

Paalala lang, kayo dapat ang nangunguna sa pagpapatupad at pagsunod sa mga umiiral na health protocols at hindi ang pasimuno sa mga paglabag.

Tandaan na nariyan kayo sa puwesto dahil nagtiwala sa inyo ang publiko. At ngayong kailangan ng matitino at huwarang lider, patunayan ninyong kaya n’yo pasunurin ang inyong mamamayan.

Panawagan sa mga kinauukulan, patuloy na turuan ng leksiyon ang mga pabayang tserman na ito dahil hangga’t parelaks-relaks ang mga opisyal na ito habang kailangan sila ng taumbayan, walang mangyayari sa kanilang nasasakupan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Mga turista, maging responsable kung gustong maglakwatsa

ni Ryan Sison - @Boses | June 10, 2021

Mula nang payagan ng Inter-Agency Task Force (IATF) ang mga taga-NCR Plus na makapasok sa Boracay Island mula noong Hunyo 1, libu-libong turista na ang naitalang dumating sa isla.

Dahil dito, ikinatuwa ng mga lokal ang unti-unting pagbabago sa mga negosyo, ngunit para mapanatili ang kaayusan at kaligtasan sa isla, nanawagan ang mga ito na maging tapat ang mga turista sa kanilang health condition.

Ang panawagan ay kasunod ng pagkakaaresto sa mga turistang gumamit ng pekeng RT-PCR test result upang makapasok sa isla kamakailan.

Ayon sa Department of Tourism (DOT), nagdudulot ito ng abala dahil sa halip na ma-enjoy ng mga turista ang pagbisita sa isla, kailangang i-pull out ang mga ito at isailalim sa swab testing at quarantine, kaya hinihikayat ng ahensiya ang lahat na sumunod sa mga lehitimong requirement.

Sa totoo lang, maraming gustong mamasyal at maglibang habang may pandemya, pero kaakibat nito ang responsibilidad na sumunod sa lahat ng ipinatutupad na health protocols at iwasang mameke ng mga kinakailangang dokumento.

Ang nangyayari kasi, puro sarili na lang ang iniisip ng ilan nating kababayan, kaya ang ending, nagdudulot ito ng pangamba sa mga negosyong nagsisimulang bumangon mula sa pagkalugi.

Sa panahon ng pandemya, ikonsidera natin ang bawat isa. Maliit o malaki man, ang lahat ng ating ginagawa ay mayroong epekto sa ating kapwa.

Kaya pakiusap sa lahat — turista man o hindi — maging responsable tayo sa lahat ng ating ginagawa at gagawin dahil hindi lamang ito para sa ating sarili kundi maging sa ating mga kababayan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com