DOH: COVID-19 vaccination basta nagparehistro, oks na kahit saan

ni Ryan Sison - @Boses | June 23, 2021

Maaaring mabakunahan ang sinumang Pilipino sa kahit saang parte ng bansa, basta nakapagparehistro sila sa lokal na pamahalaan.

Ito ang tiniyak ng Department of Health (DOH) upang maiwasan ang ‘walk-in’ at hindi maging sanhi ng pagsisiksikan sa mga vaccination sites.

Halimbawa, ang isang Metro Manila resident na puwede nang mabakunahan ay pumunta sa Davao, mababakunahan umano ito.

Dagdag pa ng DOH, bahagi ito ng ‘no wrong door policy’ na kanilang ipinatutupad kung saan hindi nila isinasara ang pinto sa lahat ng mga nais magpabakuna kahit hindi sila residente ng lugar na kanilang kinaroroonan.

Gayunman, hindi inirerekomenda ng DOH sa LGUs na tumanggap ng walk-in applicants dahil maaari itong magresulta ng pagsisiksikan ng mga tao at posibleng pagkalat ng virus.

Makabubuti umanong magparehistro muna sa lokal na pamahalaan ang mga nais mapabakuna bago pumunta sa vaccination centers nang sa gayun ay tiyak na malalaanan ng kanilang dose at maging maayos ang sistema.

Ngayong dumarami na ang mga nais magpabakuna kontra COVID-19, good news ito dahil hindi na magiging pahirapan ang pagpapabakuna. Isa pa, kung maiiwasan din ang siksikan sa mga vaccination centers na tumatanggap ng walk-in, mas mabuti.

Panawagan lang sa mga kinauukulan, dapat matiyak na magiging maayos ang sistemang ito at hindi magkakaroon ng kalituhan.

Samantala, paalala sa mga nais magpabakuna, tiyaking rehistrado bago pumunta sa vaccination centers. Tandaan na may limitadong doses ng bakuna na nakalaan kada araw kaya hangga’t maaari, iwasan nating mag-walk-in para iwas-siksikan at hindi sayang sa oras.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Final answer ng Palasyo: Face shield, tuloy pa rin!

ni Ryan Sison - @Boses | June 19, 2021

“While waiting for the President’s decision on the matter, the existing policy on the use of face shields remains in effect.”

Ito ang nilinaw ni Presidential Spokesman Harry Roque kahit ipinag-utos ni Pangulong Rodrigo Duterte na sa mga ospital na lamang gagamitin ang face shield ay hindi na sa mga pampublikong lugar.

Giit ng tagapagsalita, inirekomenda ng Inter-Agency Task Force (IATF) kay Pangulong Duterte na maging mandatory ang pagsusuot ng face shield sa mga enclosed/indoor spaces ng hospitals, eskuwelahan, workplaces, commercial establishments tulad ng malls at public markets, public transport at terminals at mga lugar ng pagsamba.

Matatandaang, Huwebes ng umaga nang sinabi ni Roque sa kanyang regular presidential briefing na ipinag-utos ng Pangulo ang hindi pagsusuot ng face shield, maliban na lamang sa ospital. Ngunit pagdating ng gabi, bigla itong binawi at sinabing patuloy na iiral ang mandatory na pagsusuot ng face shield.

Nangangahulugan lamang ito na patuloy ang polisiya sa pagsusuot ng face shield bilang dagdag-proteksiyon kontra COVID-19, habang hinihintay pa ang pinal na desisyon ng Pangulo.

Sa totoo lang, noon pa man ay problema na natin ang tila laban-bawing mga desisyon ng pamahalaan, na nagiging dahilan ng pagkalito ng taumbayan.

Sa halip na maging malinaw, hindi malaman ng ating mga kababayan kung kanino makikinig at masusunod, kaya ang ending, nakakagawa pa ng paglabag.

Kaya pakiusap sa mga kinauukulan, ‘wag basta-bastang magbitiw ng kautusan hangga’t hindi nagkakasundo ang mga opisyal. Kumbaga, iwasan nating madagdagan pa ang alalahanin ng taumbayan.

Bilang mga opisyal ng gobyerno, tungkulin ninyong magbigay ng malinaw at maayos na panuntunan, na siyang susundin ng taumbayan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Bentahan ng pekeng lisensiya, dagdag-problema!

ni Ryan Sison - @Boses | June 18, 2021

Sa gitna ng pandemya, talagang hindi maawat ang mga kawatan at buhay na buhay pa rin ang pinagkakakitaan kung saan kabilang dito ang bentahan ng pekeng driver’s license.

Kaugnay nito, huli sa entrapment operation ang dalawang nagbebenta ng pekeng lisensiya. Nasabat sa operasyon ang ilang piraso ng pekeng lisensiya, na napag-alamang ibinebenta ng P5, 000 ang bawat isa at online ang transaksiyon.

Giit ng isang suspek, reseller lang siya at nasa P1, 500 hanggang P2, 000 lang ang tinutubo nito.

Ayon sa mga awtoridad, lumapit ang Land Transportation Office (LTO) sa PNP-Anti Cybercrime Group para tulungan itong habulin ang mga grupong sangkot sa talamak na bentahan ng pekeng lisensiya.

Bagama’t matagal nang isyu ang bentahan ng pekeng lisensiya, nakadidismaya dahil hanggang ngayon ay buhay pa rin ang ganitong gawain. Ang masaklap pa, mataas ang demand kahit may pandemya.

Pero kung tutuusin, walang bentahan ng pekeng lisensiya kung walang bumibili.

Sa totoo lang, napakaraming masamang dulot ng pagbili at paggamit ng pekeng lisensiya.

Halimbawa nito ang pagdami ng mga “kamote drivers” o ‘yung mga inutil sa batas-trapiko at madalas nagiging sanhi ng aksidente o away sa kalsada.

Samantala, panawagan sa mga kinauukulan, ‘wag lang ang mga namemeke ang ating habulin. ‘Yung iba riyan, alam naman nilang peke ang dokumento, pero sige pa rin para lang masabing may lisensiya.

Bagama’t malaking hamon ang paghagilap at paghuli sa mga kawatan, pag-aralan din natin kung bakit namamayagpag ang ganitong mga gawain. Giit ng ilan nating kababayan, posibleng ang dahilan ng pagbili o paggamit ng pekeng lisensiya ay ang mahal na presyo ng tunay na lisensiya.

Malinaw na paglabag ang pamemeke ng anumang dokumento, kaya pakiusap sa mga awtoridad, bilis-bilisan ang pagtugon sa isyung ito. ‘Wag nating hayaang dumami pa ang problema na dala ng gawaing ito bago tayo umaksiyon.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com