Mala-piyestang filing of candidacy, bawal!

ni Ryan Sison - @Boses | June 26, 2021

Mala-piyestang paghahain ng kandidatura ang nakasanayan nating eksena tuwing nalalapit ang eleksiyon.

Ngunit ngayong may pandemya, ipagbabawal ng Commission on Elections (Comelec) ang pagbibitbit ng mga tao sa pagsusumite ng certificate of candidacy (COC) ng mga nais lumahok sa halalan 2022.

Ayon sa tagapagsalita ng Comelec, lilimitahan sa dalawa o tatlo ang kasama ng kakandidato na papasok sa mga Comelec office upang maiwasan ang mass gathering at maging mabilis ang proseso.

Gayundin, maghihigpit ang Comelec sa mga kawani ng media na magko-cover at maglalabas ng mga panuntunan tungkol dito.

Samantala, pinag-aaralan na ng Comelec kung maaaring magkaroon ng online filing ng COC sa kabila ng pag-amin na inaayos pa nila ang isyu dahil batay sa batas, dapat personal ang pagpa-file ng COC. Gayunman, bukas ang ilang mambabatas na pag-aralan ang bagong sistema at amyendahan ang batas.

Dapat lang namang iwasan ang mala-piyestang ganap sa paghahain ng kandidatura dahil sa totoo lang ay wa’ ‘wenta ‘to, lalo na ngayong iniiwasan natin ang mass gathering.

Tutal, hindi pa naman kampanya at paghahain pa lang ng kandidatura, simplehan lang muna natin.

Malayo man sa nakasanayan na sandamakmak na supporter at media ang nakaabang sa mga nais kumandidato, ngayon, kumalma muna tayo.

Kung pilit nating sinasabi sa taumbayan na umiwas sa mga pagtitipon dahil puwede itong maging sanhi ng hawaan, dapat tayong mga nagnanais na maging lider ay ganundin.

‘Ika nga, kung talagang nais mong magsilbi sa bayan, hindi na kailangang maging pabonggahan sa mga ganitong bagay dahil ang dapat bongga at pinaghahandaan ay ang maayos de-kalidad na serbisyo sa bayan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Pananakot sa mga ayaw magpabakuna, tama na!

ni Ryan Sison - @Boses | June 25, 2021

Sa kabila ng babala ni Pangulong Rodrigo Duterte na aarestuhin ang sinumang hindi magpapabakuna kontra COVID-19, tiniyak ni PNP Chief Gen. Guillermo Eleazar na walang panghuhuli na magaganap.

Ayon sa PNP chief, nakipag-ugnayan na siya kay Justice Secretary Menardo Guevarra kung saan sinabi umano ng kalihim na walang batas na gagamiting batayan sa pag-aresto sa mga ayaw magpabakuna.

Gayunman, naniniwala ang opisyal na hindi kailangang pilitin ang mga ayaw magpabakuna dahil marami na ang kumbinsido na makatutulong ito bilang panlaban sa COVID-19.

Kung tutuusin, may punto ang PNP chief dahil kamakailan, makikitang pinipilahan na ang vaccination sites, gayundin, maraming nagbabakasakaling maturukan kapag nag-walk-in.

Samantala, sa halip na pagbantaan at takutin nang takutin ang taumbayan, mas maiging himukin sa mas magandang paraan ang publiko na magpabakuna.

Kung gusto talaga nating maturukan ang lahat, napakaraming paraan para makumbinsi ang taumbayan.

Sa totoo lang, kulang lang tayo sa diskarte at naunahan ng takot ang publiko kaya nagkaroon ng malaking vaccine hesitancy. Ngunit kung magiging mas madiskarte tayo, tiyak na papayag din ang marami nating kababayan na magpaturok.

Tulad ng palagi nating sinasabi, palawakin pa ang information drive tungkol sa bakuna at bigyan ng kaalaman ang publiko hinggil sa kung paano makatutulong ang bakuna upang malabanan ang malalang epekto ng virus.

Ang ipinupunto lang natin, tama na ang puro babala at pananakot dahil hindi ito nakatutulong. Mas mabuting magpokus tayo sa mga makatotohanan at epektibong hakbang upang mas marami tayong mahikayat na magpabakuna.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Balik-eskuwela ng mga bagets, ‘wag munang ipilit kung ‘di talaga safe

ni Ryan Sison - @Boses | June 24, 2021

“Dito sa face-to-face, I think I am not inclined to agree with you. I’m sorry but, mahirap, I cannot gamble on the health of the children.”

Ito ang sinabi ni Pangulong Rodrigo Duterte kay DepEd Secretary Leonor Briones sa meeting ng Inter-Agency Task Force, kamakailan.

Nangangahulugan ito na hindi pa rin payag si P-Duterte na ibalik ang face-to-face classes hangga’t hindi nagkakaroon ng herd immunity laban sa COVID-19.

Dagdag pa ng Pangulo, papayagan lamang niya ang face-to-face classes kapag nabakunahan na ang lahat.

Matatandaang unang ipinanukala ng DepEd ang pagdaraos ng face-to-face classes sa mga lugar na mababa ang COVID-19 cases.

Sa totoo lang, marami pang dapat pag-aralan at ikonsidera kung nais nating ibalik ang face-to-face classes, kaya panawagan sa mga kinauukulan, ‘wag nating madaliin ang bagay na ito.

Siyempre, dapat matiyak na may sapat na proteksiyon ang mga mag-aaral at guro, gayundin, dapat siguradong hindi ito magiging sanhi ng panibagong hawaan.

Ngayong napakarami pang kailangang mabakunahan mula sa iba’t ibang priority groups, sikapin muna nating magkaroon ng herd immunity bago isulong ang mga ganitong gawain.

Samantala, kung nais nating maipagpatuloy ang pag-aaral ng mga kabataan sa gitna ng pandemya, pag-aralang mabuti kung paano mas magiging epektibo ang distance learning.

Matatandaang hindi naging madali ang taong ito para sa mga guro, mag-aaral at maging mga magulang, kaya suhestiyon natin, ito muna ang inyong tutukan.

Tingnang mabuti kung may natutunan ba talaga ang mga mag-aaral kung paano pa mas mapabubuti ang ganitong sistema ng edukasyon.

‘Ika nga, pokus muna sa tunay na problema bago sumabak sa iba pang mga bagay.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com