Mas mabigat na parusa sa bibili at magbebenta ng COVID-19 vaccines, dapat lang!

ni Ryan Sison - @Boses | July 05, 2021

Kasunod ng pagkakabuking sa panibagong modus na Sinovac vaccines for sale kamakailan ang babala sa publiko na bibili at magbebenta ng mga bakuna.

Ayon kay Department of Health (DOH) Secretary Francisco Duque III, pananagutin ang nagbebenta ng COVID-19 vaccines dahil nakokompromiso nito ang vaccination program ng pamahalaan.

Gayundin, kinuwestiyon ng kalihim kung paano nagawang itago ng mga nagbebenta ang mga bakuna na nangangailangan nang matinding pag-iingat, lalo na sa storage nito. Kasabay nito ang paalala na hindi ipinagbibili ang anumang bakuna laban sa COVID-19.

Samantala, nagbabala rin ang pamunuan ng Philippine National Police (PNP) laban sa mga nagbebenta ng bakuna na kakasuhan at parurusahan ang mga ito. Gayunman, nilinaw ng PNP na maging ang bumibili nito ay mahaharap din sa kaso.

Nanawagan din ang pamunuan ng PNP sa publiko na kung may impormasyon sa mga taong sangkot sa pagbebenta at pagbili ng bakuna ay agad na ipagbigay-alam sa kanila.

Matatandaang naaresto ng NBI sa isang operasyon ang isang registered nurse sa isang ospital ng Maynila kasama ang dalawa na nagbebenta ng Sinovac vaccine.

Maraming nagulat at nadismaya sa ganitong kalakaran sa gitna ng pandemya dahil maraming mamamayan na naghihintay na mabakunahan nang libre, pero pinagkakakitaan na pala ng iba.

Kaya naman, hangad nating maging sapat ang paalala at babala ng mga kinauukulan upang hindi na maulit ang ganitong insidente. At kapag nagkahulihan, pasensiyahan na lang.

Samantala, paalala sa taumbayan, iwasang mag-entertain ng mga nagbebenta dahil muli, walang bakuna na ipinagbibili. Sa nasyunal na pamaalaan lamang manggagaling ang mga bakuna at ipinadadaan sa mga local government units (LGUs).

Panawagan naman natin sa mga awtoridad, ‘wag tumigil manghuli at magparusa sa mga nananamantala. Kung kinakailangan, patawan ng mas mabigat na parusa ang mga mahuhuli para magtanda at hindi na tularan

Tandaan, hangga’t may masasamang-loob na hindi naparurusahan, mauulit at mauulit lang ang kanilang pananamantala.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Iba’t ibang modus sa bakuna, nakadidismaya

ni Ryan Sison - @Boses | July 03, 2021

Kung mayroong ‘vaccine slot for sale’, mayroon na ring ‘vaccine for sale’.

Kamakailan, tatlo katao ang huli sa entrapment operation ng National Bureau of Investigation Task Force Against Illegal Drugs (NBI-TFAID) matapos makatanggap ng impormasyon na may grupong nagbebenta ng Sinovac vaccines.

Ayon sa mga awtoridad, nahuli sa operasyon ang isang nurse, isang medical technologist at isang Chinese matapos bumili ng 300 doses ng bakuna ang poseur buyer ng NBI sa halagang P840,000. Dagdag pa ng NBI, kadalasang buyer ng grupo ay pawang mga Chinese.

Gayunman, inaalam pa ng ahensiya kung saan nanggaling ang suplay ng mga bakuna.

Giit naman ng babaeng nahuli, middleman lang siya at nakita lang umano niya sa Facebook ang kalakaran.

Sa totoo lang, nakadidismaya dahil tila hindi na natapus-tapos ang mga modus sa bakuna kontra COVID-19.

Minsan tuloy, hindi na natin alam kung pinagkakakitaan na lang ba ang pandemya o talagang kapalmuks ang ilan na sinasamantala ang pangangailangan ng taumbayan.

Panawagan sa mga awtoridad, tuntunin ang pinagmulan ng suplay ng bakuna at kung mapatutunayang sa gobyerno ito nanggaling, mas malaking isyu ito.

Kaya dapat lang mapanagot ang mga dapat managot dahil malamang na ito ang dahilan kung bakit lalong pahirapan ang suplay ng bakuna.

Habang tengga at todo-hintay ang ilang lokal na pamahalaan at ating mga kababayan na mabakunahan, heto at ipinagbibili at pinagkakakitaan lang pala ang mga bakuna.

Kung ang mga ganitong uri ng modus ang magpapabagal at makakaabala sa vaccination program ng pamahalaan, dapat lang itong matuldukan sa lalong madaling panahon.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Bakuna pa more para magbukas ang mas maraming negosyo

ni Ryan Sison - @Boses | July 02, 2021

Kasabay ng unti-unting pagluluwag ng quarantine protocols sa iba’t ibang panig ng bansa ang pagbubukas ng mga negosyo.

Balik-operasyon na ang mas maraming negosyo, kabilang ang mga nasa sektor ng turismo, kaya naman mas marami na ring manggagawa ang balik-trabaho.

Kaugnay nito, sinabi ni OCTA Research fellow Dr. Guido David na maaari nang magbukas ang mga negosyo sa Metro Manila kapag nabakunahan na ang 25% hanggang 30% ng populasyon ng rehiyon.

Dagdag pa ng eksperto, lumiliit na bilang ng COVID-19 cases at nakakahinga na ang mga ospital sa mga kaso, gayundin, nananatiling mababa sa 5% ang positivity rate.

Samantala, naninindigan ang eksperto na ang bilis ng vaccination rollout ang isa sa mga ikokonsidera sa pagbubukas ng mga negosyo sa Kalakhang Maynila, habang ang average na nababakunahan sa bansa ay 270,000 kada araw.

Marami na rin aniya ang nagsusuot ng facemask at sumusunod sa social distancing, kaya mapabibilis ang muling pagsigla ng ekonomiya.

Base sa nakikita natin na mas marami nang nagpapabakuna, ito ay nangangahulugang tumataas ang kumpiyansa ng publiko sa COVID-19 vaccine.

At kung mas maraming mababakunahan, mas madali nating maaabot ang herd immunity. Ito ay nangangahulugan din na mas maraming negosyo ang makababalik at mas bibilis ang usad ng ekonomiya.

Kasabay nito ang panawagan ni Metropolitan Manila Development Authority (MMDA) chairperson Benhur Abalos sa mga employer at manggagawa na magpabakuna habang dumarami na ang mga trabahador na nagbabalik sa trabaho.

Gayunman, paalala ng mga eksperto, kailangang mahigpit pa ring ipatupad ang basic health at safety protocols kapag nagbukas na ang mga negosyo.

Tandaan na ang pagpapabakuna ng mamamayan ay malaking hakbang upang makamit natin ang sapat na proteksiyon kontra COVID, gayundin, ang muling pag-usad ng ating ekonomiya.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com