LGUs, ‘di nakonsulta sa pagluluwag ng travel protocols

ni Ryan Sison - @Boses | July 08, 2021

Kung ikinatuwa ng ilan nating kababayan ang pagluluwag ng travel protocols, iba naman ang opinyon ng ilang lokal na pamahalaan hinggil dito.

Matapos ianunsiyo ng Inter-Agency Task Force on Emerging Infectious Diseases (IATF) na maaari nang gamitin ng mga “fully vaccinated” ang kanilang vaccination card para hindi na sumailalim sa COVID-19 test sa pagbiyahe, umalma ang ilang lokal na pamahalaan.

Ayon kay Quirino Governor Dakila Cua, pangulo ng Union of Local Authorities of the Philippines (ULAP), hindi sila nakonsulta sa pagpapatupad ng bagong protocol. Gayundin, hindi malinaw kung paano ito ipatutupad at wala ring inilatag na sistema sa pag-verify sa vaccination card.

Tulad ni Cua, may agam-agam din si Marinduque Governor Presbitero Velasco, president ng League of Provinces of the Philippines sa bagong patakaran.

Paliwanag nito, may kapangyarihan ang mga lokal na pamahalaan na magpatupad ng sarili nilang panuntunan. Maaari pa rin umanong igiit ng LGU na magkaroon ng antigen testing sa mga papasok sa probinisya, lalo pa’t mataas ang household infection rate roon.

Samantala, ipinauubaya naman ng Department of Tourism (DOT) sa mga LGU ang pagpapasya kung papayagan ang paggamit ng vaccination cards o RT-PCR tests.

Bagama’t marami ang natuwa sa pagluluwag ng protocols, kung hindi naman sang-ayon o maraming agam-agam ang mga lokal na pamahalaan, isip-isip muna tayo.

Nauunawaan natin ang layunin na maibangon ang ekonomiya, partikular ang sektor ng turismo, pero tulad ng paulit-ulit nating sinasabi, dapat matiyak na ligtas ang mga hakbang na nais nating gawin.

Sa sitwasyong ito, makikita ang kawalan ng koordinasyon sa mga lokal na pamahalaan, kaya nakadidismaya kung mababalewala ang kanilang mga pagsisikap para mapanatiling ligtas ang kanilang nasasakupan.

Malamang na LGUs ang sasalo ng problema kapag nagkaroon ng hawaan sa kanilang nasasakupan, kaya pakiusap sa mga kinauukulan, maging maingat sa mga nais ipinatutupad.

Kung sapat naman ang nasimulang panuntunan sa pagbiyahe, rito muna magpokus at saka magluwag kung mas mabuti na ang sitwasyon at naikonsulta sa mga kinauukulan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

LGUs, todo-diskarte sa pagbabakuna sa mga manggagawa, ayos!

ni Ryan Sison - @Boses | July 07, 2021

Malaking tulong sa mga manggagawa na nais magpabakuna, ngunit hindi makaliban sa trabaho ang “Bakuna Nights” o pagpapabakuna kontra COVID-19 sa gabi.

Ito ang sinabi ni Labor Secretary Silvestre Bello III sa pamahalaang lungsod ng Quezon City.

Dagdag pa ng kalihim, mahalagang mabakunahan ang mga manggagawa upang gumalaw ang ekonomiya, gayundin upang magbalik sa normal ang mga negosyo.

Ayon sa QC LGU, matagumpay ang isinasagawang Bakuna Nights dahil aabot na sa 20,000 ang nababakunahang manggagawa. Gayundin, balak ng lokal na pamahalaan na magkaroon ng 24-oras na pagbabakuna kung magkakaroon ng suplay nito. At bagama’t paubos na ang suplay ng bakuna, tiniyak ng lokal na pamahalaan na nakareserba ang suplay para sa mga tatanggap ng pangalawang dose ng bakuna.

Matatandaang, nagpapatupad na rin ng magdamagang bakunahan ang iba pang lungsod para sa mga manggagawang hindi kayang pumunta sa vaccination sites dahil sa oras ng trabaho.

Totoo na malaking tulong ito sa mga kababayan nating hindi na kayang maglaan ng isang araw para pumila at magpabakuna. At sa halip na um-absent, puwede na silang magpabakuna pagkatapos ng oras ng trabaho. Kumbaga, walang makokompromisong kita dahil hindi maaapektuhan ang pasok sa trabaho.

‘Ika nga, ‘pag may gusto, may paraan. Kaya naman, nakatutuwa na kani-kanya nang diskarte ang mga lokal na pamahalaan para patuloy na mabakunahan ang ating mga manggagawa.

‘Yun nga lang, dapat matiyak na tuluy-tuloy ang pagdating ng suplay ng bakuna para tuluy-tuloy din ang vaccination program. Sa ibang lungsod kasi, unang dose pa lang ay tengga na ang vaccination sites dahil sa kakulangan sa suplay ng bakuna.

Kaya naman, pakiusap sa nasyunal na pamahalaan, galaw-galaw para mas mabilis na maipamahagi ang suplay ng bakuna.

Kung naniniwala tayong ang mga manggagawa ang magpapagalaw ng ekonomiya, dapat lang silang mabakunahan sa lalong madaling panahon. At mangyayari lamang ito kung hindi pahirapan sa suplay ng bakuna.

Panawagan sa gobyerno, ‘wag nating sayangin ang pagsisikap ng mga lokal na pamahalaan para mas maraming mabakunahan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Mas maluwag na travel protocols, oks sa ekonomiya pero dapat safe

ni Ryan Sison - @Boses | July 06, 2021

Niluwagan na ng Inter-Agency Task Force for the Management of Emerging Infectious Diseases (IATF) ang mga panuntunan sa interzonal travel para sa mga fully-vaccinated person kung saan kabilang dito ang mga senior citizens.

Base sa IATF Resolution 124-B, maaaring ipakita na lamang ng interzonal travelers na fully vaccinated ang kanilang COVID-19 vaccination proof imbes na ang kanilang COVID-19 test results.

Maikokonsidera na fully vaccinated ang isang tao, dalawang linggo matapos matanggap ang ikalawang dose ng bakuna at kapag ang bakuna ay mayroong emergency use authorization o Compassionate Sspecial Permit (CSP) ng Food and Drug Administration (FDA) o mula sa Emergency Use Listing ng World Health Organization (WHO).

Samantala, kung walang vaccination card ay maaaring ipakita ang certificate of quarantine completion na mula sa Bureau of Quarantine. Gayunman, lahat ng bumabiyahe ay kailangan ding sumailalim sa health and exposure screening protocols pagdating sa kanilang destinasyon.

Sa totoo lang, good news ito para sa mga kababayan nating fully vaccinated at nais nang mamasyal sa iba’t ibang panig ng bansa. ‘Yun nga lang, bago ito ipatupad, may ilan tayong paalala at karadagang pag-iingat na dapat pa ring gawin.

Kung noon ay RT-PCR test result ang napepeke para makalusot sa checkpoint, dapat ngayon ay matiyak na lehitimo ang mga dokumentong ipakikita ng mga turista.

Mahirap kasi ‘yung sinisikap nating mapayagan ang mga nais mamasyal at mapagalaw ang ekonomiya, pero may mangilan-ngilan na sadyang pasaway.

Kaya panawagan sa mga kinauukulan, tiyaking hindi maaabuso ang pagluluwag na ito dahil ‘pag nagkataon, baka ito pa ang maging sanhi ng hawaan. Tandaan na hindi pa rin 100% ligtas sa banta ng COVID-19 ang mga fully vaccinated dahil posible pa ring tamaan ng sakit ang mga ito.

Pakiusap sa mga nais bumiyahe, maging responsible at iwasang magpasaway.

‘Wag ninyong kalimutan na ang pagpunta sa iba’t ibang lugar sa panahon ng pandemya ay may kaakibat na obligasyon.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com