Madlang pipol, dapat handa rin sa pagluwag ng quarantine restrictions

ni Ryan Sison - @Boses | July 15, 2021

Bago ang nakatakdang pag-aanunsiyo ng pamahalaan sa bagong quarantine classifications para sa Hulyo 16 hanggang 30, kani-kanyang suhestiyon ang mga eksperto tungkol dito.

Habang tinitingnan pa ng Department of Health (DOH) at Malacañang ang posibilidad ng pagpapanatili ng National Capital Region (NCR) at iba pang high-risk provinces sa general community quarantine (GCQ) hanggang Disyembre, ipinayo naman ng OCTA Research Group na panatilihin ang GCQ sa Metro Manila hanggang katapusan ng Hulyo dahil nananatili pa rin ang banta ng COVID-19, lalo na ang Delta variant.

Ayon kay Dr. Ranjit Rye ng OCTA Resarch Group, maaari namang magluwag sa pagbubukas ng mga business establishment, ngunit kailangan pa ring mapanatili ang istriktong health protocols sa rehiyon.

Bagama’t inamin nito na gumaganda na ang sitwasyon sa Metro Manila, upang mapanatili ang ganitong kondisyon ay kailangan pa ring paigtingin ang pag-iingat, pagsunod sa health protocols at pagbabakuna.

Sa totoo lang, hindi pa talaga handa ang NCR sa mas maluwag na quarantine restrictions, lalo na ang mamamayan.

Matatandaang kasabay ng pag-iral ng vaccination program ng pamahalaan ang pagiging kampante ng ilan nating kababayan. Katwiran ng mga ito, may bakuna naman at mas safe na sa virus. Kaya ang ending, dedma sa ilang health protocols at nagpapabaya na sa kani-kanilang sarili, dagdag pa na pinapayagan nang makalabas ang mga batang nasa edad 5 pataas.

Habang hindi pa talaga posible ang mas maluwag na quarantine restrictions, panawagan natin sa lahat na ipagpatuloy ang pag-iingat.

At pakiusap naman sa mga kinauukulan, tiyaking naipatutupad at nasusunod ang health protocols sa lahat ng oras at hindi kung kailan lamang maisipan. Isa pa, siguraduhin nating magiging handa rin ang taumbayan sa oras na luwagan ang restrictions.

Tandaan na malaking hakbang pa rin ang mga ito upang makaiwas sa hawaan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Mga bagets, ‘di exempted sa health protocols

ni Ryan Sison - @Boses | July 12, 2021

Matapos payagang makalabas ang mga batang edad 5 pataas, todo-paalala ang Department of Health (DOH) sa mga magulang at publiko na ‘wag pa ring makampante.

Ayon kay treatment czar Undersecretary Leopoldo Valga, dapat pa ring sundin ng mga bata ang mga umiiral na standard health protocols habang nasa labas ng tahanan.

Gayunman, nilinaw nito na nasa kamay ng mga local government units (LGUs) ang pagpapatupad ng bagong polisiya. Paliwanag pa ng opisyal, may mga lugar na mas mataas ang quarantine restriction dahil sa mataas na bilang ng COVID-19 cases na delikado rin sa mga bata.

Matatandaang ikinatuwa ng ilang magulang ang polisiyang ito dahil sa wakas, puwede na nilang ipasyal ang kanilang anak na matagal nanatili sa kani-kanilang tahanan.

‘Yun nga lang, limitado pa rin sa mga parke, playground at beach ang puwedeng puntahan ng mga ito, habang hindi pa rin sila papayagang makapasok sa malls at iba pang establisimyento.

Gayunman, paalala natin sa lahat, ang pagluluwag na ito ay hindi pa rin dahilan upang makampante. At panawagan sa mga magulang, tiyaking mamo-monitor ninyo ang mga bata habang nasa labas ng tahanan.

Tulad ng nabanggit, kinakailangan pa ring sumunod ng mga batang nasa edad 5 pataas sa mga umiiral na protocols, kaya pakiusap sa kina nanay at tatay, kayo ang unang sumunod sa mga panuntunan upang tularan ng mga bata.

Habang tinitiyak ng pamahalaan na hindi naaapektuhan ng mga pagluluwag sa protocols ang sitwasyon ng bansa, tandaan na tayong mamamayan ay mayroon ding obligasyon at ito ay ang sumunod sa mga umiiral na patakaran.

Bilang magulang, tandaan na kayo rin ang responsable sa kaligtasan ng inyong mga anak.

‘Ika nga, bawal ang parelaks-relaks dahil nar’yan pa rin ag virus at naghihintay lang ng mabibiktima.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

COVID-19 vaccination cards, tiyaking ‘di mapepeke!

ni Ryan Sison - @Boses | July 10, 2021

Security mark sa COVID-19 vaccination cards.

Ito ang mungkahi ng grupo ng mga lokal na pamahalaan matapos ang usaping kailangang maberipika kung peke o hindi ang ipinepresentang vaccination cards sa mga tourist hub na tumatanggap ng mga turistang “fully vaccinated”.

Ayon kay League of Provinces of the Philippines (LPP) President Presbitero Velasco, Jr., dapat uniform ang lahat ng mga card para madaling beripikahin ang mga ito.

Samantala, tiniyak ng ilang lokal na opisyal sa Metro Manila na hindi mapepeke ang kanilang vaccination card.

Sa Makati City, mayroon umanong inilagay na water mark sa kanilang vaccine card at makikita lang ito sa pamamagitan ng black light. May QR code rin ito para iberipika ang detalye ng pasyente. Habang sa Muntinlupa City, may QR code rin ang vaccine card kung saan nakalagay ang datos ng pasyente tungkol sa una at ikalawang dose nito.

Matatandaang ibinalik ng gobyerno ang patakarang magpresenta ng negative RT-PCR test result ang mga fully vaccinated tuwing babiyahe matapos ianunsiyo ng Inter-Agency Task Force (IATF) na maaari nang gamitin ang vaccination card para makalusot sa destinasyon.

Bagama’t ipinaubaya na ng IATF sa LGUs kung vaccination card o RT-PCR test result ang gagamiting requirement sa mga turista, ‘wag nating isantabi ang isyung puwedeng mapeke ang vaccination card, gayung iba’t iba ang hitsura nito sa bawat lungsod.

Isa pa, may iba pang panganib na dala ang paggamit ng pekeng vaccination cards kaya dapat lang matiyak na mananatili itong authentic at hindi mapepeke.

Gayunman, paalala sa mga lokal na pamahalaan, kung may agam-agam o pangamba, dahil kayo ang may alam ng sitwasyon sa inyong lugar, nasa inyo ang desisyon sa paghihigpit o pagluluwag sa mga turista.

Tandaan na hindi dapat makompromiso ang kaligtasan ng inyong mamamayan at mga turista habang sinisikap nating ibangon ang turismo.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com